ଢେଙ୍କାନାଳ ଅଫିସ, ୨୨।୧୦: ଢେଙ୍କାନାଳ ବନ ବିଭାଗ ଏବଂ ବିଦ୍ୟୁତ୍ ବିଭାଗ ମଧ୍ୟରେ ଏକ ସମନ୍ବୟ ବୈଠକ ଗୁରୁବାର ଅନୁଷ୍ଠିତ ହୋଇଯାଇଛି। ବିଦ୍ୟୁତ୍ ଚାର୍ଜ କରି ବନ୍ୟଜନ୍ତୁ ଶିକାର କଲେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଏଥିରେ ନିଷ୍ପତ୍ତି ହୋଇଛି।
ଢେଙ୍କାନାଳ ବିଦ୍ୟୁତ୍ ଡିଭିଜନ ନିର୍ବାହୀଯନ୍ତ୍ରୀଙ୍କ କାର୍ଯ୍ୟାଳୟରେ ଅନୁଷ୍ଠିତ ଏହି ବୈଠକରେ ବିଦ୍ୟୁତ୍ ବିଭାଗ ନିର୍ବାହୀ ଯନ୍ତ୍ରୀ ବେଣୁଧର ଦାସ ଅଧ୍ୟକ୍ଷତା କରିଥିଲେ। ହିନ୍ଦୋଳ, ଢେଙ୍କାନାଳ, କାମାକ୍ଷାନଗର ଓ ଗଁଦିଆ ରେଞ୍ଜ୍ରେ ହାତୀ ଉପଦ୍ରବ ବଢୁଛି। ଭବିଷ୍ୟତରେ ଯେପରି କୌଣସି ଅଘଟଣ ନ ଘଟେ ସେଥିଲାଗି ପଦକ୍ଷେପ ନେବାକୁ ବିସ୍ତୃତ ଆଲୋଚନା କରାଯାଇଥିଲା। ବନ ଅଧିକାରୀ ଓ କର୍ମଚାରୀ ହାତୀପଲ ଗତିବିଧି ଉପରେ ନଜର ରଖିବା ଏବଂ ଏ ସମ୍ପର୍କରେ ବିଦ୍ୟୁତ୍ ବିଭାଗକୁ ଅବଗତ କରିବାକୁ କୁହାଯାଇଛି। ଶିକାର କିମ୍ବା ଫସଲ ସୁରକ୍ଷା ଲାଗି ବେଆଇନ ଭାବେ ହୁକିଂ କରି ଧରାପଡ଼ିଲେ ତ୍ୱରିତ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ନିର୍ଦ୍ଦେଶ ଦିଆଯାଇଛି।
ସେହିପରି କାମାକ୍ଷାନଗର, ମଠକରଗୋଳା, ହିନ୍ଦୋଳ, ଖଜୁରିଆକଟା, ଭାପୁର, ଗୋବିନ୍ଦପୁର, ଗଁଦିଆ, ଯୋରନ୍ଦା, ନିହଲପ୍ରସାଦ ଅଞ୍ଚଳରେ ଏଲ୍ଇଡି ସେଫ୍ଟି ଭ୍ୟାନ୍ ମାଧ୍ୟମରେ ଲୋକଙ୍କୁ ସଚେତନ କରାଯାଉଛି। ବିଦ୍ୟୁତ୍ ତାର ବିଛାଇ ଶିକାରଠାରୁ ଦୂରେଇ ରହିବାକୁ କୁହାଯାଇଛି। ଏଭଳି କାର୍ଯ୍ୟ କରୁଥିବା ଜଣାପଡ଼ିଲେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସତର୍କ କରାଯାଉଥିବା ସୂଚନା ଦିଆଯାଇଛି। ବୈଠକରେ ଟିପିସିଓଡିଏଲ୍ ନିର୍ବାହୀ ଯନ୍ତ୍ରୀ ବେଣୁଧର ଦାସ, ସହକାରୀ ଯନ୍ତ୍ରୀ ନୀଳକାନ୍ତ ସାହୁ, କାମାକ୍ଷାନଗର ସହକାରୀ ଯନ୍ତ୍ରୀ ବବୁଲ ମହାରଣା, ହିନ୍ଦୋଳ ରୋଡ୍ ସହକାରୀଯନ୍ତ୍ରୀ ସୂର୍ଯ୍ୟ କୁମାର ସାମନ୍ତରାୟ, ଗଁଦିଆ ସହକାରୀ ଯନ୍ତ୍ରୀ ଚନ୍ଦ୍ରକାନ୍ତ ବିଶ୍ୱାଳଙ୍କ ସମେତ ଢେଙ୍କାନାଳ ଏବଂ ଷଡ଼ଙ୍ଗୀ ରେଞ୍ଜ ଅଧିକାରୀ ଉପସ୍ଥିତ ଥିଲେ।