ନୂଆଦିଲ୍ଲୀ,୫।୧୧ : ଆତଙ୍କବାଦୀଙ୍କୁ ପାଣ୍ଠି ଯୋଗାଣ ମାମଲାରେ ଅଣ୍ଡର ଓ୍ବାଲର୍ଡ ଡନ୍ ଦାଉଦ ଇବ୍ରାହିମ ଏବଂ ଛୋଟା ଶକିଲଙ୍କ ସମେତ ୩ ଅନ୍ୟ ଆତଙ୍କବାଦୀଙ୍କ ବିରୋଧରେ ଚାର୍ଜଶିଟ୍ ଦାଖଲ କରାଯାଇଛି। ଏନଆଇଏ ପକ୍ଷରୁ ଏଭଳି ପଦକ୍ଷେପ ଗ୍ରହଣ କରାଯାଇଛି। ଏନଆଇଏ ଚାର୍ଜଶିଟ ଅନୁଯାୟୀ, ସମସ୍ତେ ଆତଙ୍କବାଦୀ କାର୍ଯ୍ୟକଳାପ ପାଇଁ ପାଣ୍ଠି ଯେଗାଡ଼ କରିଥିବା ଅଭିଯୋଗ ହୋଇଛି।
କେନ୍ଦ୍ରୀୟ ଅନୁସନ୍ଧାନକାରୀ ସଂସ୍ଥା କହିଛି ଯେ ଏହି ସମସ୍ତ ଅଭିଯୁକ୍ତଙ୍କ ବିରୋଧରେ ବେଆଇନ କାର୍ଯ୍ୟକଳାପ (ପ୍ରତିରୋଧ) ଅଧିନିୟମ, କଣ୍ଟ୍ରୋଲ ଅଫ ଅର୍ଗାନାଇଜଡ କ୍ରାଇମ ଆକ୍ଟ ଅଫ ମହାରାଷ୍ଟ୍ର ଏବଂ ଭାରତୀୟ ଦଣ୍ଡବିଧି ଆଇନର ଅନେକ ବିଭାଗ ଅନୁଯାୟୀ ମାମଲା ରୁଜୁ ହୋଇଛି।
ଅନୁସନ୍ଧାନରୁ ଏହା ମଧ୍ୟ ଜଣାପଡିଛି ଯେ ଗିରଫ ଅଭିଯୁକ୍ତ ଅବୁବାକର ଶେଖ, ଶବିର ଆବୁବାକର ଶେଖ ଏବଂ ମୋହମ୍ମଦ ସଲିମ କୁରେଶିଙ୍କ ବିରୋଧରେ ଚାର୍ଜ ଶିଟ ଦାଖଲ ହୋଇଛି। ଏନଆଇଏ କହିଛି ଯେ ସମସ୍ତେ ଆତଙ୍କବାଦ ବିସ୍ତାର ପାଇଁ ବିଭିନ୍ନ ଉପାୟ ମାଧ୍ୟମରେ ଟଙ୍କା ଯୋଗାଡ଼ କରୁଥିଲେ। ଏହି ମାମଲାରେ ତଦନ୍ତ ଜାରି ରହିଛି ବୋଲି ତଦନ୍ତକାରୀ ସଂସ୍ଥା କହିଛି।
ଏନଆଇଏ କହିଛି ଯେ ଅନୁସନ୍ଧାନ ବେଳେ ଏହା ଜଣାପଡିଛି ଯେ ଆତଙ୍କବାଦୀ ଗ୍ୟାଙ୍ଗର ସଦସ୍ୟ ତଥା ଏକ ସଂଗଠିତ କ୍ରାଇମ ସିଣ୍ଡିକେଟ ଡି-କମ୍ପାନୀ ବିଭିନ୍ନ ପ୍ରକାରର ବେଆଇନ କାର୍ଯ୍ୟକଳାପ କରି ଏହି ଗ୍ୟାଙ୍ଗର ଅପରାଧିକ କାର୍ଯ୍ୟକଳାପକୁ ଆଗକୁ ବଢ଼ାଇବା ପାଇଁ ଷଡଯନ୍ତ୍ର କରିଥିଲେ। ଏହି ଅଭିଯୁକ୍ତମାନେ ଲୋକଙ୍କୁ ଭୟଭୀତ କରି ବିପୁଳ ପରିମାଣର ଟଙ୍କା ଲୁଟି ନେଇଥିଲେ। ଅନୁସନ୍ଧାନକାରୀ ସଂସ୍ଥା ଏହା ମଧ୍ୟ ସୂଚାଇ ଦେଇଛି ଯେ ଉଦ୍ଧାର ହୋଇଥିବା ଅର୍ଥ ଏହାର ଆତଙ୍କବାଦୀ ଉଦ୍ଦେଶ୍ୟ ତଥା ଭାରତର ସୁରକ୍ଷା ପ୍ରତି ବିପଦ ଏବଂ ସାଧାରଣ ଲୋକଙ୍କ ମନରେ ଆତଙ୍କ ସୃଷ୍ଟି କରିବା ପାଇଁ ବ୍ୟବହୃତ ହୋଇଥିଲା।