ପୁରୀ ଅଫିସ, ୧୩ା୪: ମହାପ୍ରଭୁଙ୍କ ବିଶ୍ୱପ୍ରସିଦ୍ଧ ଘୋଷଯାତ୍ରା ଆସନ୍ତା ଜୁନ ୨୦ରେ ଅନୁଷ୍ଠିତ ହେବାକୁ ଯାଉଛି। ଏଥିପାଇଁ ପବିତ୍ର ଅକ୍ଷୟ ତୃତୀୟାଠାରୁ ରଥଖଳାରେ ରଥ ନିର୍ମାଣ କାର୍ଯ୍ୟ ଆରମ୍ଭ ହେବ। ତେଣୁ ପର୍ଯ୍ୟାୟ କ୍ରମେ ରଥକାଠ ଆସି ପୁରୀରେ ପହଞ୍ଚୁଛି। ଏହି କ୍ରମରେ ବୁଧବାର ପଞ୍ଚମ ପର୍ଯ୍ୟାୟରେ ଭଞ୍ଜନଗର ମୁଜାଗଡ଼ ବନାଞ୍ଚଳ ଉତ୍ତର ଘୁମୁର ବନଖଣ୍ଡରୁ ୨୫ ଖଣ୍ଡ ରଥକାଠ ଏକ ବଡ଼ ଟ୍ରକ ଯୋଗେ ଆସିଛି। ତନ୍ମଧ୍ୟରେ ୪୦ ଫୁଟିଆ ୨୦ ଖଣ୍ଡ ଧଉରା ଏବଂ ୫ ଖଣ୍ଡ ଫାସିକାଠ ରହିଛି। ବୁଧବାର ସୁଦ୍ଧା ୨୦୬ ଖଣ୍ଡ କାଠ ପୁରୀ ବଡ଼ଦାଣ୍ଡରେ ପହଞ୍ଚତ୍ଛି।
ସୂଚନାଯୋଗ୍ୟ, ପୂର୍ବରୁ ନୟାଗଡ଼ ବନଖଣ୍ଡରୁ ପ୍ରଥମ ପର୍ଯ୍ୟାୟରେ ୧୦୪, ଦ୍ୱିତୀୟ ପର୍ଯ୍ୟାୟରେ ୨୪ ଏବଂ ତୃତୀୟ ପର୍ଯ୍ୟାୟରେ ବୌଦ୍ଧ ବନଖଣ୍ଡରୁ ୨୮ ଖଣ୍ଡ ଧଉରା ଓ ଚତୁର୍ଥ ପର୍ଯ୍ୟାୟରେ ୨୫ ଖଣ୍ଡ ଅସନ କାଠ କାଠ ଆସି ପୁରୀରେ ପହଞ୍ଚତ୍ଥିଲା। ବୁଧବାର ୨୫ ଖଣ୍ଡ କାଠ ଆସିଛି। ଫଳରେ ଏବେସୁଦ୍ଧା ମୋଟ ୨୦୬ ଖଣ୍ଡ କାଠ ପହଞ୍ଚିସାରିଛି। ରଥଯାତ୍ରା ପାଇଁ ମୋଟ ୮୬୫ ଖଣ୍ଡ କାଠ ଆବଶ୍ୟକ ଥିବାବେଳେ ପୂର୍ବ ବର୍ଷରୁ ୧୧୮ ଖଣ୍ଡ କାଠ ବଳକା ରହିଛି। ତେଣୁ ଚଳିତ ରଥଯାତ୍ରା ପାଇଁ ୭୪୭ ଖଣ୍ଡ କାଠର ଆବଶ୍ୟକତା ରହିଛି। ଏ ପର୍ଯ୍ୟନ୍ତ ମୋଟ ୨୦୬ ଖଣ୍ଡ କାଠ ପୁରୀରେ ପହଞ୍ଚିଥିବା ବେଳେ ବଳକା କାଠ ପର୍ଯ୍ୟାୟ କ୍ରମେ ଆସିବ। ୮୧ ଖଣ୍ଡ କାଠ କଟକର ଶ’ମିଲସ୍ଥିତ ଖପୁରିଆ କରତ କଳରେ ପହଞ୍ଚି ସାରିଛି। ପରମ୍ପରା ଅନୁଯାୟୀ, ରାମନବମୀରେ କଟକସ୍ଥିତ ଶ’ ମିଲ୍ରେ ରଥକାଠ ଚିରଟ କାମ ଆରମ୍ଭ ହୋଇଛି। ଶ୍ରୀପଞ୍ଚମୀ ତିଥିରେ ରଥକାଠ ଅନୁକୂଳ ହେବ। ଆବଶ୍ୟକ ଥିବା ରଥ କାଠ ପର୍ଯ୍ୟାୟ କ୍ରମେ ପୁରୀକୁ ଆସିବ ବୋଲି ଶ୍ରୀମନ୍ଦିର ବରିଷ୍ଠ ତତ୍ତ୍ୱାବଧାରକ ସୁଦର୍ଶନ ମେକାପ ସୂଚନା ଦେଇଛନ୍ତି। ନୟାଗଡ଼ ଜିଲାର ନବୀନ ବେହେରାଙ୍କ କହିବା ଅନୁଯାୟୀ, ରଥକାଠ ନେଇ ସେ ଉତ୍ତର ଘୁମୁସର ବାଇବିଲ ଗ୍ରାମରୁ ଗତ ୧୦ ତାରିଖରେ ପୁରୀ ଅଭିମୁଖେ ବାହାରିଥିଲେ। ରଥକାଠକୁ ଗ୍ରାମବାସୀ ପୂଜାଚ୍ଚର୍ନା କରିଥିଲେ। ଏପରିକି ଯେଉଁ ଗ୍ରାମ ଦେଇ ତାଙ୍କ ଗାଡ଼ି ଆସିଥିଲା, ସେହି ସବୁ ଗ୍ରାମର ବାସିନ୍ଦା ରଥକାଠକୁ ପୂଜାର୍ଚ୍ଚନା କରିଥିଲେ। ସେ ମହାପ୍ରଭୁଙ୍କ କାର୍ଯ୍ୟ କରି ବହୁତ ଖୁସି ଅଛନ୍ତି। ଆଗକୁ ମହାପ୍ରଭୁ ତାଙ୍କୁ ଏପରି କାର୍ଯ୍ୟ କରିବା ପାଇଁ ଆଶୀର୍ବାଦ ଦିଅନ୍ତୁ ବୋଲି ବେହେରା କହିଛନ୍ତି।