ଲଣ୍ଡନ, ୧ା୮: ବ୍ରିଟେନ ପ୍ରିନ୍ସ ଚାଲର୍ସ ଆମେରିକାରେ ୯/୧୧ ଆକ୍ରମଣର ମାଷ୍ଟରମାଇଣ୍ଡ ଓସାମା ବିନ୍ ଲାଡେନ୍ଙ୍କ ଠାରୁ ଦାନ ଅର୍ଥ ଗ୍ରହଣ କରିଥିବା ନେଇ ରିପୋର୍ଟ ପ୍ରକାଶ ପାଇଛି। ଅଲ୍-କାଏଦା ସଙ୍ଗଠନର ଏହି ନିହତ ଆତଙ୍କବାଦୀଙ୍କ ପରିବାର ୨୦୧୩ରେ ଚାଲର୍ସଙ୍କ ଏକ ଦାତବ୍ୟ ସଂସ୍ଥାକୁ ପ୍ରାୟ ୧.୧୯ ନିୟୁତ ଡଲାର ଦେଇଥିଲେ। ଏପରି କି ୭୩ ବର୍ଷୀୟ ଚାଲର୍ସ ଅଲ୍-କାଏଦା ପ୍ରତିଷ୍ଠାତା ଲାଡେନ୍ଙ୍କ ସାବତ ଭାଇ ବକର(୭୬)ଙ୍କୁ ଲଣ୍ଡନରେ ଭେଟି ତାଙ୍କଠାରୁ ଏହି ଦାନ ଗ୍ରହଣ କରିବା ପାଇଁ ରାଜି ହୋଇଥିଲେ ବୋଲି ସନ୍ଡେ ଟାଇମ୍ସରେ ପ୍ରକାଶିତ ଏହି ରିପୋର୍ଟରେ ଉଲ୍ଲେଖ କରାଯାଇଛି। ତେବେ କୌଣସି ମନ୍ଦ ଉଦ୍ଦେଶ୍ୟରେ ଲାଡେନ୍ଙ୍କ ପରିବାର ଅର୍ଥ ଦାନ କରିଥିଲେ କି ନା ସେ ସମ୍ପର୍କରେ ରିପୋର୍ଟରେ ଦର୍ଶାଯାଇନାହିଁ।
ଆହୁରି କୁହାଯାଇଛି ଯେ, ଚାଲର୍ସଙ୍କ କେତେଜଣ ବରିଷ୍ଠ ପରାମର୍ଶଦାତା ଉକ୍ତ ଦାନଅର୍ଥକୁ ଫେରାଇ ଦେବା ପାଇଁ ତାଙ୍କୁ କହିଥିଲେ। ହେଲେ ଏହା ପ୍ରିନ୍ସଙ୍କ ବ୍ୟକ୍ତିଗତ ନିଷ୍ପତ୍ତି କହି ଚାଲର୍ସଙ୍କ ହାଉସ୍ ଅଫିସ୍ ଏହି ପରାମର୍ଶ ଗ୍ରହଣ କରିବାକୁ ମନା କରିଥିଲା। ପ୍ରିନ୍ସ ଅଫ୍ ଓ୍ବେଲ୍ସ ଚାରିଟେବୁଲ ଫଣ୍ଡ୍ (ପିଡବ୍ଲ୍ୟୁସିଏଫ୍) ଅଧ୍ୟକ୍ଷ ଇଆନ୍ ଚେଶିରେ କହିଛନ୍ତି, ସେତେବେଳେ ୫ ଟ୍ରଷ୍ଟି ସଦସ୍ୟ ଏହି ଡୋନେଶନ ରଖିବାକୁ ସହମତ ହୋଇଥିଲେ। ଚାଲର୍ସଙ୍କ ଆଉ ଏକ ଦାତବ୍ୟ ସଂସ୍ଥା ଜଣେ ସାଉଦି ବ୍ୟବସାୟୀଙ୍କୁ ‘ସମ୍ମାନ ପାଇଁ ଟଙ୍କା’ ଦୁର୍ନୀତିରେ ସମ୍ପୃକ୍ତି ଅଭିଯୋଗ ଆସିବା ପରେ ଗତ ଫେବୃୟାରୀରୁ ବ୍ରିଟିଶ ପୋଲିସ ଏହାର ତଦନ୍ତ କରୁଛି। ଏ ନେଇ ଉକ୍ତ ଦାତବ୍ୟ ସଂସ୍ଥା ପ୍ରିନ୍ସ ଫାଉଣ୍ଡେଶନର ମୁଖ୍ୟ ଗତବର୍ଷ ଇସ୍ତଫା ଦେଇଥିଲେ।