ଲୋକପ୍ରିୟ କଳାକାର ଏବଂ କମେଡିର ବାଦଶାହ ଚାର୍ଲି ଚାପଲିନ୍ଙ୍କ ନାଁ ତ ଶୁଣିଥିବେ। ହସେଇ ହସେଇ ବେଦମ କରୁଥିବା ଏହି କଳାକାର ଦର୍ଶକଙ୍କ ମନ କିଣି ନେଇଥିଲେ। ଜୀବନରେ ସବୁ ଅସୁବିଧା ଏବଂ ଯନ୍ତ୍ରଣାରେ ସେ ଲୋକଙ୍କୁ ହସାଇବାକୁ ଶିଖିଥିଲେ। ତେବେ ଏକ ଦୁଃଖଦ ଖବର ସାମ୍ନାକୁ ଆସିଛି। କମେଡି କିଙ୍ଗ ଚାର୍ଲି ଚାପଲିନଙ୍କ ଝିଅ ଅଭିନେତ୍ରୀ ଜୋସେଫିନ ଚାପଲିନଙ୍କ ୭୪ବର୍ଷ ବୟସରେ ଦେହାନ୍ତ ହୋଇଛି। ସୂଚନା ଅନୁଯାୟୀ, ଜୋସେଫିନ ଜୁଲାଇ ୧୩ରେ ପ୍ୟାରିସରେ ମୃତ୍ୟୁ ବରଣ କରିଛନ୍ତି।
ଜୋସେଫିନ ମାର୍ଚ୍ଚ ୨୮, ୧୯୪୯ରେ କାଲିଫର୍ନିଆର ସାଣ୍ଟା ମୋନିକାରେ ଜନ୍ମ ଗ୍ରହଣ କରିଥିଲେ। ବାପା ଚାର୍ଲି ଚାପଲିନ ଏବଂ ମାଆ ଓନା ଓ’ନିଲଙ୍କ ସେ ୮ଟି ସନ୍ତାନ ମଧ୍ୟରୁ ୩ୟ ସନ୍ତାନ ଥିଲେ। ୧୯୫୩ରେ ପିତାଙ୍କ ’ଲାଇମଲାଇଟ’ରୁ ଅଳ୍ପ ବୟସରେ ନିଜ କ୍ୟାରିଅର୍ ଆରମ୍ଭ କରିଥିଲେ। ସେ ଅନେକ ଚଳଚ୍ଚିତ୍ରରେ ଅଭିନୟ କରିଛନ୍ତି। ୧୯୭୨ରେ ସେ ପିଆର ପାଓଲୋ ପାସୋଲିନ ପୁରସ୍କାର ପ୍ରାପ୍ତ ‘ଦି କ୍ୟାଣ୍ଟରବେରୀ ଟେଲ୍ସ’ ଏବଂ ରିଚାର୍ଡ ବାଲଡୁଚିଙ୍କ ‘ଲାଉଡର୍ ଡେସ ଫାଉଭ୍ସରେ ଅଭିନୟ କରିଛନ୍ତି।