ଭୁବନେଶ୍ୱର,୩।୮ (ବ୍ୟୁରୋ): ଭାରତ ସମେତ ବିଭିନ୍ନ ଦେଶରେ କ୍ରେଡିଟ୍ ଗୋଲ୍ଡ ଲୋନ୍ ଆପ୍ ସମେତ ଅନ୍ୟାନ୍ୟ ଲୋନ ଆପ୍ରେ ହୋଇଥିବା ବଡ଼ଧରଣର ଠକେଇ ଓ ନିର୍ଯାତନା ମାମଲାର ତଦନ୍ତକୁ ଜୋର୍ଦାର କରିଛି କ୍ରାଇମବ୍ରାଞ୍ଚର ଅର୍ଥନୈତିକ ଅପରାଧ ଶାଖା (ଇଓଡବ୍ଲ୍ୟୁ)। ଫେରାର ଥିବା ମାଷ୍ଟରମାଇଣ୍ଡ ୩ ଚାଇନା ନାଗରିକଙ୍କ ସହଯୋଗୀ ଥିବା ଜଣେ ଚାଟାର୍ଡ ଆକାଉଣ୍ଟାଣ୍ଟ୍ଙ୍କୁ ଇଓଡବ୍ଲ୍ୟୁ ଦିଲ୍ଲୀରୁ ଗିରଫ କରିଛି। ସେ ହେଲେ ଗୁଡ଼ଗାଓଁ ୱେଷ୍ଟ୍ ଥାନା ଅନ୍ତର୍ଗତ ପଶ୍ଚିମ ବିହାର ଅଞ୍ଚଳର ନୀରଭ ଗୁପ୍ତା ଓରଫ ରମଣ। ତାଙ୍କଠାରୁ ଲାପଟପ୍, ମୋବାଇଲ, ସେଲ କମ୍ପାନୀ ସମ୍ବନ୍ଧୀୟ ଦସ୍ତାବିଜ୍ ଜବତ ହୋଇଛି। ଗତ ଶନିବାର ନୀରଭଙ୍କୁ ଗିରଫ କରାଯିବା ପରେ ନୂଆଦିଲ୍ଲୀ ତିସ୍-ହଜାରି କୋର୍ଟରେ ହାଜର କରାଯାଇଥିଲା। ସେଠାରୁ ଇଓଡବ୍ଲ୍ୟୁ ତାଙ୍କୁ ଟ୍ରାଞ୍ଜିଟ୍ ରିମାଣ୍ଡରେ ଆଣି ମଙ୍ଗଳବାର ଭୁବନେଶ୍ୱର ଏସ୍ଡିଜେଏମ୍ କୋର୍ଟକୁ ଚାଲାଣ କରିଥିଲା। ଜାମିନ ନାମଞ୍ଜୁର ହେବାରୁ ତାଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି। ଏହି ମାମଲାରେ ମାଷ୍ଟରମାଇଣ୍ଡ୍ କୁହାଯାଉଥିବା ୩ ଚାଇନା ନାଗରିକ ସେନ୍ ଝେନ୍ହୁଆ ଓରଫ ଟୋନି, କୁଆନ୍ ହୋଙ୍ଗ୍ୱେ ଓରଫ ପୌଲ ଓ ୟାଙ୍ଗ୍ ହେୟିଙ୍ଗ୍ ଓରଫ ଡୋରିସ୍ଙ୍କୁ ଧରିବାକୁ ଲୁକ୍ ଆଉଟ୍ ସର୍କୁଲାର ଜାରି ହୋଇଛି। ଏହାପୂର୍ବରୁ ଅନ୍ୟତମ ସହଯୋଗୀ ତଥା ଭାରତୀୟ ମୁଖ୍ୟ ନୀତିନ ମଲ୍ଲିକ ଗିରଫ ହୋଇ ଜେଲରେ ଅଛନ୍ତି।
ଇଓଡବ୍ଲ୍ୟୁ ଏସ୍ପି ଦିଲୀପ ତ୍ରିପାଠୀ କହିଛନ୍ତି, ଚାର୍ଟାର୍ଡ ଆକାଉଣ୍ଟାଣ୍ଟ ନୀରଭ ଠକେଇ ପାଇଁ ସେଲ୍ କମ୍ପାନୀ ଖୋଲିବା ଦାୟିତ୍ୱରେ ଥିଲେ। ସେ କ୍ରାମଲିଙ୍ଗ୍ଟୋନ୍ ଟେକ୍ନୋଲୋଜି ପ୍ରାଇଭେଟ୍ ଲିମିଟେଡ୍, ଟୋଡଲର୍ ଟେକ୍ନୋଲୋଜି ପ୍ରାଇଭେଟ୍ ଲିମିଟେଡ୍, ଟ୍ୟାକ୍ସ ଡୋଲର ଟେକ୍ନୋଲୋଜି ପ୍ରାଇଭେଟ୍ ଲିମିଟେଡ୍, କେନାଇଟ୍ ଏଞ୍ଜେଲ୍ ଟେକ୍ନୋଲୋଜି ପ୍ରାଇଭେଟ୍ ଲିମିଟେଡ୍ ଓ ରୋଜ୍ ଇସ୍ଲାଣ୍ଡ୍ ଟେକ୍ନୋଲୋଜି ପ୍ରାଇଭେଟ୍ ଲିମିଟେଡ୍ ସମେତ ୫ଟି ସେଲ କମ୍ପାନୀ ଖୋଲିଛନ୍ତି। ଏଥିସହ ରୋହିତ୍ ସ୍ମାର୍ଟ ସଫ୍ଟ, ଜଗଦ୍ଦୀଶ ସ୍ମାର୍ଟ ସଫ୍ଟ ଓ କମଲ୍ସିଂ ସମେତ ୩ଟି (ଓପିସିଏସ୍) ୱାନ୍ ପର୍ସନ୍ କମ୍ପାନୀ ଖୋଲିଛନ୍ତି। ଏଥିସହ ଭାରତୀୟ ମୁଖ୍ୟ ନିତୀନଙ୍କ ସହଯୋଗରେ ମାଷ୍ଟରମାଇଣ୍ଡ୍ ଥିବା ଚାଇନା ନାଗରିକଙ୍କୁ ଉକ୍ତ ସେଲ୍ କମ୍ପାନୀ ବିକ୍ରି କରୁଥିଲେ। ପ୍ରତି କମ୍ପାନୀ ପିଛା ସେ ୩୦ ଲକ୍ଷ ଟଙ୍କା ନେଉଥିଲେ। ସେହିଭଳି କମ୍ ଦରମାରେ ଉକ୍ତ ସେଲ କମ୍ପାନୀର ନିର୍ଦ୍ଦେଶକ ଯୋଗାଡ଼ କରୁଥିଲେ। ନୀରଭଙ୍କ ସହଯୋଗରେ ମାଷ୍ଟରମାଇଣ୍ଡ୍ ଚାଇନା ନାଗରିକମାନେ ଠକେଇ ଟଙ୍କା ନେଣଦେଣ କରୁଥିଲେ। ଏଥିପାଇଁ ସେ ସେମାନଙ୍କ ମଧ୍ୟରେ ନିୟମିତ ଯୋଗାଯୋଗ ରହୁଥିଲେ। ଅଲିପେ କ୍ୟୁଆର୍ କୋଡ୍ ମାଧ୍ୟମରେ ମଧ୍ୟ ସେ ଟଙ୍କା ନେଉଥିଲେ ବୋଲି ଜଣାପଡ଼ିଛି।
ସୂଚନାଯୋଗ୍ୟ, ଭୁବନେଶ୍ୱରର ଶକ୍ତିପ୍ରସାଦ ଦାସ ‘କ୍ରେଡିଟ୍ ଗୋଲ୍ଡ’ ଆପ୍କୁ ଡାଉନ୍ଲୋଡ୍ କରିବା ପରେ ତାଙ୍କ ପାଖକୁ ୯ ହଜାର ଟଙ୍କାର ଲୋନ୍ ଆସିଥିଲା। ହ୍ବାଟ୍ସଆପ୍ ଦ୍ୱାରା କଲ୍ କରାଯାଇ ୧୫ ହଜାର ୬୨୭ ଟଙ୍କା ଲୋନ୍ ଭରିବାକୁ କୁହାଯିବା ପରେ ସେ ରାଜି ନ ହେବାରୁ ତାଙ୍କୁ ବିଭିନ୍ନ ନମ୍ବରରେ କଲ୍ କରାଯାଇ ଗାଳିଗୁଲଜ ସହ ଅଶ୍ଳୀଳ ଫଟୋ ପଠାଯାଇ ମାନସିକ ନିର୍ଯାତନା ଦିଆଯାଇଥିଲା। ଅଭିଯୋଗ ପରେ ଇଓଡବ୍ଲ୍ୟୁ ଜୁଲାଇ ୨ରେ ଏକ ମାମଲା (ନଂ.୧୩/୨୨) ରୁଜୁ କରି ତଦନ୍ତ ଆରମ୍ଭ କରିଥିଲା।