ଖୋର୍ଦ୍ଧା ଅଫିସ,୩।୭: ଖୋର୍ଦ୍ଧା ଟାଉନ ଥାନା ଅନ୍ତର୍ଗତ ଗୁରୁଜଙ୍ଗ ଚତରାଶଙ୍ଖ ନିକଟରେ ଶନିବାର ଅପରାହ୍ନରେ ସାମାନ୍ୟ ବଚସାରୁ ଦୁଇ ଯୁବକଙ୍କ ମଧ୍ୟରେ ଗଣ୍ଡଗୋଳ ହୋଇଥିଲା। ଏଥିରେ କ୍ରୋଧାନ୍ବିତ ହୋଇ ଜଣେ ଅନ୍ୟ ଜଣେ ଯୁବକଙ୍କୁ କଟୁରିରେ ଗୋଡ଼ାଇ ହାଣିଥିଲେ। ତାଙ୍କ ଶରୀରର ବିଭିନ୍ନ ସ୍ଥାନରେ କ୍ଷତ ଚିହ୍ନ ରହିଛି। ସେ ହେଲେ ରାସନ ତନ୍ତି। ଘର ଗୁରୁଜଙ୍ଗ ଅଞ୍ଚଳର ବୋଲି କୁହାଯାଉଛି। ଗୁରୁତର ଅବସ୍ଥାରେ ତାଙ୍କୁ ଭୁବନେଶ୍ୱରର ଏକ ମେଡିକାଲରେ ଭର୍ତ୍ତି କରାଯାଇଛି। ଅନ୍ୟପଟେ ଆକ୍ରମଣକାରୀ ସନ୍ତୋଷ ବାରିକ ସାମାନ୍ୟ ଆହତ ହୋଇଥିବା ଜଣାପଡ଼ିଛି। ତେବେ ସନ୍ତୋଷ ଆକ୍ରମଣ ପରେ କଟୁରି ଧରି ଚାଲି ଚାଲି ଯାଉଥିବା ସିସିଟିଭି କ୍ୟାମେରାରେ କଏଦ ହୋଇଛି। ଖବରପାଇ ପୋଲିସ ଘଟଣାସ୍ଥଳରେ ପହଞ୍ଚିବା ସହ ସିସିଟିଭି ଫୁଟେଜ ଆଧାରରେ ତଦନ୍ତ ଚଳାଇଛି।
ମୁତାବକ, ଶନିବାର ଅପରାହ୍ନରେ ଉଭୟଙ୍କ ମଧ୍ୟରେ କୌଣସି କାରଣକୁ ନେଇ ପ୍ରଥମେ ବଚସା ପରେ ହାତାହାତି ହୋଇଥିଲେ। ସନ୍ତୋଷ ଏକ ଠେଙ୍ଗାରେ ରାସନଙ୍କୁ ଆକ୍ରମଣ କରିଥିଲେ। ରାସନ ଧରିଥିବା କଟୁରିରେ ସନ୍ତୋଷଙ୍କୁ ଆକ୍ରମଣ କରିଥିଲେ। ଏଥିରେ ସନ୍ତୋଷ ସାମାନ୍ୟ ଆହତ ହୋଇଥିଲେ। ସନ୍ତୋଷ ଉତ୍କ୍ଷିପ୍ତ ହୋଇ କଟୁରି ଛଡାଇ ନେଇ ପ୍ରଥମେ ରାସନର ମୁଣ୍ଡକୁ ଚୋଟ ମାରିଥିଲେ। ସେଠାରୁ ସେ ଖସିଯିବାକୁ ଉଦ୍ୟମ ବେଳେ ଗୋଡ଼ାଇ ହାଣିଥିଲେ। ତଳେ ପଡିଯିବା ପରେ ହାତ, ଗୋଡ, ପିଠିକୁ ହାଣି ସେଠାରୁ ସନ୍ତୋଷ ଫେରାର ହୋଇଯାଇଥିଲେ। ରାସ୍ତାକଡରେ ଆହତ ଅବସ୍ଥାରେ ଜଣେ ଯୁବକ ପଡିଥିବା ଖବରପାଇ ଟାଉନ ପୋଲିସ ପହଞ୍ଚି ରାସନଙ୍କୁ ଉଦ୍ଧାର କରି ଖୋର୍ଦ୍ଧା ମେଡିକାଲ ପଠାଇଥିଲା। ସ୍ବାସ୍ଥ୍ୟାବସ୍ଥା ଗୁରୁତର ହେବାରୁ ତାଙ୍କୁ ଭୁବନେଶ୍ୱରର ଏକ ମେଡିକାଲକୁ ସ୍ଥାନାନ୍ତର କରାଯାଇଛି। ଆକ୍ରମଣ କାରୀଙ୍କ ବ୍ରାଉନସୁଗାର କାରବାର ସହିତ ସମ୍ପୃକ୍ତି ରହିଥିବା ଏବଂ ତାଙ୍କର ଜଣେ ସମ୍ପର୍କୀୟ ଟାଉନ ଥାନାରେ ହୋମଗାର୍ଡ ଭାବେ କାର୍ଯ୍ୟ କରୁଥିବା ଚର୍ଚ୍ଚା ହେଉଛି।
