ବଲାଙ୍ଗୀର ଅଫିସ, ୨୪ା୪: ବଲାଙ୍ଗୀର ଭୀମଭୋଇ ମେଡିକାଲ କଲେଜ ଓ ହସ୍ପିଟାଲର ପ୍ରଥମ ବର୍ଷ ଏମ୍ବିବିଏସ୍ ଛାତ୍ର ନିଶାନ୍ତ କୁମାର (୧୯)ଙ୍କ ମୃତ୍ୟୁ ର଼୍ୟାଗିଂ ଯୋଗୁ ହୋଇଛି ବୋଲି ତାଙ୍କ ମାତାପିତା ଅଭିଯୋଗ କରିବାର ପ୍ରାୟ ୨୪ ଘଣ୍ଟା ପରେ ଏନେଇ ସାଂଘାତିକ ତଥ୍ୟ ସାମ୍ନାକୁ ଆସିଛି। କଲେଜ ଭିତରେ ସିନିୟର ଛାତ୍ରମାନେ ର଼୍ୟାଗିଂ କରୁଥିବା ନେଇ ମୃତ ଛାତ୍ର ନିଶାନ୍ତ ବିଦେଶରେ ରହୁଥିବା ତାଙ୍କର ଜଣେ ବନ୍ଧୁଙ୍କୁ ମୋବାଇଲ ଚାଟିଂ କରି ସୂଚନା ଦେଇଥିବା ଜଣାପଡ଼ିଛି। ଉକ୍ତ ମୋବାଇଲ ଚାଟିଂ ସୋସିଆଲ ମିଡିଆରେ ଭାଇରାଲ ହେବା ପରେ ଘଟଣାଟି ଆଲୋଡ଼ନ ଖେଳାଇ ଦେଇଛି।
ଭାଇରାଲ ହୋଇଥିବା ମୋବାଇଲ ଚାଟିଂରେ ତାଙ୍କୁ କିଭଳି ମେଡିକାଲ କଲେଜ କ୍ୟାମ୍ପସରେ ସିନିୟର ଛାତ୍ରମାନେ ର଼୍ୟାଗିଂ କରୁଥିଲେ ତା’ର ସୂଚନା ଦେଇଛନ୍ତି। ଶନିବାର ନିଶାନ୍ତଙ୍କ ମାତାପିତା ପୁଅକୁ ଏବଂ କଲେଜରେ ର଼୍ୟାଗିଂ ସମ୍ପର୍କରେ ଯାହା ଅଭିଯୋଗ କରିଥିଲେ ଭାଇରାଲ ହୋଇଥିବା ଚାଟିଂରେ ତାହା ପ୍ରତିଫଳନ ହୋଇଛି। କ୍ୟାମ୍ପସରେ ଚାଲିଥିବା ସ୍ପୋର୍ଟମିଟ୍, ଭଲିବଲ କୋର୍ଟ ତିଆରିରେ ଜୁନିୟର ଛାତ୍ରମାନଙ୍କୁ ଉପସ୍ଥିତ ରହିବାକୁ ବାଧ୍ୟ କରାଯାଉଥିବା ଏବଂ ପ୍ରତିଦିନ କିଭଳି ୩/୪ ଘଣ୍ଟା ବରବାଦ କରାଯାଉଥିଲା ସେ ଉଲ୍ଲେଖ କରିଛନ୍ତି। ଜୁନିୟର ଛାତ୍ରଙ୍କୁ ପାର୍କ ଓ କଲେଜ ବାହାରକୁ ଯିବା ପାଇଁ ବାରଣ କରାଯାଇଥିବା କୁହାଯାଇଛି। ନିଶାନ୍ତ ତାଙ୍କର ଯେଉଁ ବନ୍ଧୁଙ୍କୁ ଏହି ଚାଟିଂ କରିଛନ୍ତି ସେ ଏସବୁ ଘଟଣାକୁ କଲେଜ କର୍ତ୍ତୃପକ୍ଷଙ୍କ ଦୃଷ୍ଟିକୁ ଆଣି ଅଭିଯୋଗ କରିବାକୁ ପରାମର୍ଶ ଦେଇଛନ୍ତି। ତେବେ ଏଭଳି ଅଭିଯୋଗ ଆଣିଲେ ତାଙ୍କ ପ୍ରତି ର଼୍ୟାଗିଂ ଭୟ ବଢ଼ିବ ବୋଲି ନିଶାନ୍ତ ଆଶଙ୍କା କରିଛନ୍ତି। ନିଶାନ୍ତଙ୍କୁ ର଼୍ୟାଗିଂ ସମ୍ପର୍କରେ ଅନ୍ୟ ଦୁଇ ବନ୍ଧୁଙ୍କ ଚାଟିଂ ମଧ୍ୟ ଭାଇରାଲ ହୋଇଛି। ସେଥିରେ ଦୁଇ ବନ୍ଧୁଙ୍କ ମଧ୍ୟରୁ ଜଣେ ନିଶାନ୍ତଙ୍କ ସହ ମୃତ୍ୟୁ ପୂର୍ବରୁ କଥା ହୋଇଥିବା ଏବଂ ସେଠାରେ ର଼୍ୟାଗିଂ ହେଉଥିବା ନେଇ ନିଶାନ୍ତ ଉଲ୍ଲେଖ କରିଥିବା ଚର୍ଚ୍ଚା କରିଛନ୍ତି।
ଅନ୍ୟପକ୍ଷରେ ଶନିବାର ମୃତଦେହ ବ୍ୟବଚ୍ଛେଦ ପରେ ବିଳମ୍ବିତ ରାତିରେ ନିଶାନ୍ତଙ୍କ ପିତା ପ୍ରଫେସର କ୍ରିଷ୍ଣକୁମାର ଟାଉନ୍ ଥାନାରେ ତାଙ୍କ ପୁଅକୁ ର଼୍ୟାଗିଂ ଓ ହତ୍ୟା ସମ୍ପର୍କରେ ଅଭିଯୋଗ କରିଥିଲେ। ଏ ନେଇ ଟାଉନ୍ ଥାନାରେ ଏକ ମାମଲା (୧୯୧/୨୨) ରୁଜୁ ହୋଇଛି। ଅନ୍ୟପକ୍ଷେ ର଼୍ୟାଗିଂ ଅଭିଯୋଗକୁ ଭୀମଭୋଇ ମେଡିକାଲ କଲେଜ କର୍ତ୍ତୃପକ୍ଷ ବାରମ୍ବାର ଖଣ୍ଡନ କରୁଥିବା ଏବଂ ହାଲୁକା ଭାବେ ନେଉଥିବା ନେଇ ବଲାଙ୍ଗୀର ବୁଦ୍ଧିଜୀବୀ ମହଲରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। ତୁରନ୍ତ ଏହାର ଏକ ଉଚ୍ଚସ୍ତରୀୟ ତଦନ୍ତ କରାଯିବାକୁ ଦାବି ହୋଇଛି। ଘଟଣା ସମ୍ପର୍କରେ ସଦର ଏସ୍ଡିପିଓ ତୋଫାନ ବାଗଙ୍କୁ ପଚରାଯିବାରୁ ଛାତ୍ର ମୃତ୍ୟୁ ଘଟଣାର ତଦନ୍ତ ଜାରି ରହିଛି ଓ ସବୁଦିଗକୁ ଅନୁସନ୍ଧାନ କରାଯାଉଛି ବୋଲି କହିଛନ୍ତି।