ଜଟଣୀ,୧୧।୯(ରବୀନ୍ଦ୍ର ନାଥ ମହାକୁଡ଼): ଗଣେଶପୂଜା ପାଇଁ ଚଳଚଞ୍ଚଳ ହୋଇଉଠିଛି ଜଟଣୀ ସହର। ଏଥିପାଇଁ ବିଭିନ୍ନ ବ୍ୟବସାୟୀ ସଂଘ, ସାହିବସ୍ତି ଓ କ୍ଲବ ପକ୍ଷରୁ ଧୁମଧାମରେ ଗଣେଶପୂଜା ପାଳନ ପାଇଁ ଆରମ୍ଭ ହୋଇଯାଇଛି ପ୍ରସ୍ତୁତି। ସମସ୍ତେ ନିଜ ତୋରଣକୁ ଅନ୍ୟଠୁ ଭିନ୍ନ ଓ ଆକର୍ଷଣୀୟ ଢଙ୍ଗରେ ପ୍ରସ୍ତୁତ କରୁଛନ୍ତି। ଏହି ପରିପ୍ରେକ୍ଷୀରେ ଗୋପବନ୍ଧୁ ବ୍ୟବସାୟୀ ସଂଘ ପୂଜା କମିଟି ମଧ୍ୟ ଜୋରଦାର ପ୍ରସ୍ତୁତି ଚଳାଇଛି। ଏଥର ୬୦ ଫୁଟ ଉଚ୍ଚର ସୁନ୍ଦର କପଡା ତୋରଣ ସହିତ ୫୦ ଫୁଟର ଡିଜିଟାଲ ଲାଇଟ ଗେଟ୍ ଦର୍ଶକଙ୍କୁ ଆକୃଷ୍ଟ କରିବ ବୋଲି ସଂଘ ପକ୍ଷରୁ କୁହାଯାଇଛି। ପୂଜାରେ ୧୧ ଲକ୍ଷରୁ ଊର୍ଦ୍ଧ୍ୱ ଟଙ୍କା ଖର୍ଚ୍ଚ ହେବାକୁ ଥିବା ବେଳେ ଦର୍ଶକ ତଥା ଶ୍ରଦ୍ଧାଳୁଙ୍କୁ ଆକୃଷ୍ଟ କରିବା ପାଇଁ ପୂଜା ସମୟରେ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହେବ। ଶ୍ରଦ୍ଧାଳୁ ମଣ୍ଡପରେ ୮ ଫୁଟ୍ର ଗଣେଶଙ୍କ ସହିତ ମା’ଲକ୍ଷ୍ମୀ ଏବଂ ସରସ୍ବତୀଙ୍କୁ ଦର୍ଶନ କରିବେ। ଏଥିସହ ମହାପ୍ରଭୁ ଶ୍ରୀଜଗନ୍ନାଥଙ୍କ ୨୦ଟି ବେଶ ଦର୍ଶନ ପାଇଁ ଶ୍ରଦ୍ଧାଳୁଙ୍କ ଗହଳି ଜମିବ ବୋଲି କମିଟି ଆଶା ରଖିଛି। ଗଣେଶ ପୂଜା ଆରମ୍ଭ ଏବଂ ଭସାଣି ଦିନ କମିଟି ପକ୍ଷରୁ ପ୍ରଭୁଙ୍କ ନିକଟରେ ବିଭିନ୍ନ ଫଳ ଓ ମିଷ୍ଟାନ୍ନ ଭୋଗ ଲାଗି ହୋଇଥାଏ। ପ୍ରତିଦିନ ପାଳି ମୁତାବକ ସ୍ଥାନୀୟ ବ୍ୟବସାୟୀ ବିଭିନ୍ନ ଭୋଗ ଲାଗି କରିଥାନ୍ତି। ଭସାଣି ଦିନ ପ୍ରଭୁଙ୍କ ନିକଟରେ ଖେଚୁଡ଼ି ଭୋଗ କରାଯାଇଥାଏ। ଯାହାକୁ ଭସାଣି ଯାତ୍ରାରେ ସାମିଲ ହୋଇଥିବା ଶ୍ରଦ୍ଧାଳୁଙ୍କୁ ବଣ୍ଟନ କରାଯାଇଥାଏ। ପ୍ରତିବର୍ଷ ଭଳି ଏଥର ମଧ୍ୟ ଠାକୁରଙ୍କ ନିକଟରେ ୬୦କେଜିର ଲଡୁ ଲାଗି ହେବା ସହିତ ପୂଜା ସମୟରେ ଏକ କାର୍ଯ୍ୟକ୍ରମରେ ଉକ୍ତ ଲଡୁକୁ ନିଲାମ କରାଯିବ। ପୂଜା ସମୟରେ ଏଠାରେ ଲୋକଙ୍କ ଭିଡ଼କୁ ଦୃଷ୍ଟିରେ ରଖି ଶାନ୍ତିଶୃଙ୍ଖଳା ଓ ଟ୍ରାଫିକ ସମସ୍ୟା ଦୂର ପାଇଁ କମିଶନରେଟ ପୋଲିସ ସହିତ କେତେଜଣ ଭଲ୍ୟୁଣ୍ଟିଅର ନିୟୋଜିତ ହେବେ ବୋଲି କମିଟି ପକ୍ଷରୁ ନିଷ୍ପତ୍ତି ହୋଇଛି।
ଏହି ମଣ୍ଡପରେ କେବଳ ଗଣେଶ ପୂଜା ପାଉଥିଲେ। ତେବେ ଗତ ୨୦ବର୍ଷ ହେବ ମଣ୍ଡପରେ ତ୍ରିମୂର୍ତ୍ତି ପୂଜା ପାଇଆସୁଛନ୍ତି। ୯୦ରୁ ଊର୍ଦ୍ଧ୍ୱ ବ୍ୟବସାୟୀ ପ୍ରତିଷ୍ଠାନର ମାଲିକଙ୍କ ସହଯୋଗରେ ପୂଜା ହେଉଛି। ଗଣେଶ ପୂଜାରେ ବର୍ତ୍ତମାନ ପ୍ରତିଯୋଗିତା ହେଉଥିବାରୁ ଖର୍ଚ୍ଚ ବଢ଼ିଛି। ଏଥର ଦର୍ଶକଙ୍କୁ ଆକୃଷ୍ଟ କରିବା ପାଇଁ ମହାପ୍ରଭୁ ଜଗନ୍ନାଥଙ୍କ ୨୦ବେଶ ସହିତ ୯ ଦିନ ବ୍ୟାପୀ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହେବ।
– ସୁରେନ୍ଦ୍ର କୁମାର ସାହୁ, ଗୋପବନ୍ଧୁ ଛକ ବ୍ୟବସାୟୀ ସଂଘ, ସଭାପତି
ଏହି ମଣ୍ଡପରେ ଗଣେଶ ପୂଜା ଦେଖିବା ପାଇଁ ଶ୍ରଦ୍ଧାଳୁଙ୍କ ମଧ୍ୟରେ ଉତ୍କଣ୍ଠା ରହିଥାଏ। ଏଠାରେ ପ୍ରଥମେ ସବୁଠାରୁ ବଡ଼ ଲଡୁ ଠାକୁରଙ୍କ ନିକଟରେ ଲାଗି ହେବା ଓ ପରବର୍ତ୍ତୀ ସମୟରେ ଏହାର ନିଲାମ ପ୍ରକ୍ରିିୟା ଆରମ୍ଭ ହୋଇଥାଏ। ଭିଡ଼କୁ ଦୃଷ୍ଟିରେ ରଖି ଟ୍ରାଫିକ ବ୍ୟବସ୍ଥା ଓ ଶାନ୍ତିଶୃଙ୍ଖଳା ପାଇଁ ବ୍ୟାପକ ବ୍ୟବସ୍ଥା କରାଯାଇଛି। ପ୍ରତିଦିନ ସନ୍ଧ୍ୟାରେ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହେବ, ଯାହା ଦର୍ଶକଙ୍କୁ ଆନନ୍ଦ ପ୍ରଦାନ କରିବା ସହ ଭାଇଚାର ସୃଷ୍ଟି ସଂଘର ମୁଖ୍ୟ ଉଦ୍ଦେଶ୍ୟ।
– ବିଷ୍ଣୁପ୍ରସାଦ ରାଉତ, ଗୋପବନ୍ଧୁ ଛକ ବ୍ୟବସାୟୀ ସଂଘ, ସମ୍ପାଦକ