କଣ୍ଟିପାଳ,୨୭ା୮ (ସୁଶାନ୍ତ କୁମାର ସାହୁ )ଢିପଜମିଗୁଡ଼ିକୁ ଚାଷ ଉପଯୋଗୀ କରିବା ପାଇଁ ସରକାରୀସ୍ତରରେ ଚେକ୍ଡ୍ୟାମ୍ ନିର୍ମାଣ ବ୍ୟବସ୍ଥା କରାଯାଇଛି। ଏହାଦ୍ୱାରା ବର୍ଷା ସମୟରେ ନାଳଗୁଡ଼ିକରେ ପ୍ରବାହିତ ଜଳକୁ ଗଚ୍ଛିତ ରଖାଯାଇ ଜମିକୁ ଜଳସେଚନ କରାଯାଇଥାଏ। ମାତ୍ର କେନ୍ଦୁଝର ଜିଲା ଆନନ୍ଦପୁର ବ୍ଲକ୍ କଣ୍ଟିପାଳ ପଞ୍ଚାୟତରେ ଏହାର ବ୍ୟତିକ୍ରମ ଦେଖାଯାଇଛି। ନିମ୍ନମାନର କାର୍ଯ୍ୟ ଯୋଗୁ ଚେକ୍ ଡ୍ୟାମ୍ ନିର୍ମାଣର ୧୦ ଦିନରେ କାନ୍ଥ ଭାଙ୍ଗିଯାଇଥିବା ବେଳେ ଏବେ ଅନ୍ୟ ଏକ କାନ୍ଥକୁ ବାଉଁଶ ଢିରାରେ ରଖାଯାଇଛି। ପୁନର୍ବାର ଉକ୍ତ ଚେକ୍ଡ୍ୟାମ୍ କାର୍ଯ୍ୟ କରିବା ପାଇଁ ସ୍ଥାନୀୟ ଚାଷୀ ଦାବି କରିଛନ୍ତି।
ସୂଚନା ଅନୁଯାୟୀ, କଣ୍ଟିପାଳ ପଞ୍ଚାୟତରେ କଣ୍ଟିପାଳ ଅଁଳାପାଳକୁ ଯିବା ରାସ୍ତାରେ ରହିଥିବା ଚାଷଜମିଗୁଡ଼ିକରେ ଜଳସେଚନର ବ୍ୟବସ୍ଥା ପାଇଁ ୧୦ ଲକ୍ଷ ଟଙ୍କା ବ୍ୟୟ ଅଟକଳରେ ଚେକ୍ ଡ୍ୟାମ୍ ନିର୍ମାଣ ହୋଇଥିଲା। ମାତ୍ର ନିର୍ମାଣ ହେବାର ୧୦ ଦିନ ମଧ୍ୟରେ ଚେକ୍ ଡ୍ୟାମ୍ର କିଛି ଭାଗ ଧସିଯାଇଥିଲା। ଠିକାଦାରଙ୍କ ସହ ସରକାରୀ ବାବୁମାନଙ୍କ ମଧୁଚନ୍ଦ୍ରିକା ଯୋଗୁ ଜିଓଟ୍ୟାଗ୍ କରା ନ ଯାଇ ନିମ୍ନମାନର କାର୍ଯ୍ୟ କରାଯାଇଥିବାରୁ ଭାଙ୍ଗିଯାଇଥିବା ଚାଷୀମାନେ ଅଭିଯୋଗ କରିଥିଲେ। ଏ ନେଇ ୨୧ ଜୁଲାଇ ୨୦୨୩ରେ ଗଣମାଧ୍ୟମରେ ଖବର ମଧ୍ୟ ପ୍ରସାରଣ ହୋଇଥିଲା। ମାତ୍ର ବିନା ଜିଓଟ୍ୟାଗ୍ରେ କାର୍ଯ୍ୟ ହୋଇଥିବାରୁ ବିଲ୍ ପାସ୍ ହୋଇପାରିନାହିଁ। ଫଳରେ ଧସିଯାଇଥିବା ସ୍ଥାନ ମରାମତି ହୋଇ ନ ଥିବା ବେଳେ ଅନ୍ୟ ଏକ ସ୍ଥାନ ଧସିଯାଇଛି। ଉକ୍ତ ସ୍ଥାନରେ ବାଉଁଶ ଢିରା ଦେଇ ରଖାଯାଇଥିବା ଦେଖିବାକୁ ମିଳିଛି। ଏ ନେଇ କନିଷ୍ଠ ଯନ୍ତ୍ରୀ ଜିତମୋହନ ଟୁଡୁ କହିଛନ୍ତି, କାର୍ଯ୍ୟର ଜିଓଟ୍ୟାଗ୍ ନ ହୋଇ କାର୍ଯ୍ୟ ହୋଇଛି। ତେଣୁ ସେ ବିଷୟରେ କିଛି କହିପାରିବେ ନାହିଁ।