କୁତ୍ରା,୧୬।୧(ଡି.ଏନ.ଏ): ସୁନ୍ଦରଗଡ ଜିଲା କୁତ୍ରାରେ ଟ୍ରାଫିକ ବ୍ୟବସ୍ଥାକୁ ନେଇ ଖବର ପ୍ରକାଶ ହେବା ପରେ କୁତ୍ରା ପୋଲିସର ନିଦ ଭାଙ୍ଗିଲା। ୧୦ ନମ୍ବର ରାଜ୍ୟ ରାଜପଥ ଉପରେ ନିୟମିତ ଦୁର୍ଘଟଣା ଘଟି ଅନେକ ଧନ ଜୀବନ ନଷ୍ଟ ହେଉଥିଲା। ପୋଲିସ ଓ ପ୍ରଶାସନ ପକ୍ଷରୁ କୌଣସି ପ୍ରକାର ପଦକ୍ଷେପ ଗ୍ରହଣ କରାଯାଉ ନ ଥିଲା। ଜେଏସ୍ଡବ୍ଲ୍ୟୁ, ସ୍କାନ୍ ଷ୍ଟିଲ, ଏଲ୍ଆଣ୍ଡଟି ପକ୍ଷରୁ ପୋଲିସକୁ ଚେକପୋଷ୍ଟ ପ୍ରଦାନ କରାଯାଉଛି କିନ୍ତୁ ପୋଲିସ ତାର ବ୍ୟବହାର ଠିକ ଭାବରେ କରୁ ନ ଥିଲା। କେବଳ ଦୁର୍ଘଟଣା ଘଟୁଥିଲେ ଏହା ଦେଖିବାକୁ ମିଳୁଥିବା ବେଳେ ଅନ୍ୟ ସମୟରେ ରାସ୍ତା କଡରେ ପଡିରହୁଥିଲା। ରବିବାର ଓ ବୁଧବାର ହାଟ ପାଳି ଥିବାରୁ ରାଜ୍ୟ ରାଜପଥ ଉପରେ ପ୍ରବଳ ଭିଡ ପରିଲକ୍ଷିତ ହୁଏ। ଏହାସହିତ ଦୁର୍ଘଟଣା ମଧ୍ୟ ବଢିଥାଏ। ସୁନ୍ଦରଗଡ ଏବଂ ରାଉରକେଲା ପଟରୁ ଦ୍ରୁତଗତିରେ ଭାରିଯାନ ଆସି ଦୁର୍ଘଟଣା ଘଟାଇଥାନ୍ତି। ଏହାକୁ ରୋକିବା ପାଇଁ ପୋଲିସ ପକ୍ଷରୁ କୌଣସି ପ୍ରକାର ବ୍ୟବସ୍ଥା ନ ଥିଲା। ଏହାକୁ ନେଇ ୧୩ ତାରିଖ ଦୈନିକ ଧରିତ୍ରୀ ଖବର କାଗଜରେ ଟ୍ରାଫିକ ବ୍ୟବସ୍ଥାକୁ ନେଇ ଖବର ପ୍ରକାଶିତ ହେବା ପରେ ପୋଲିସ ରାଜ୍ୟ ରାଜପଥ ଉପରେ ଚେକପୋଷ୍ଟ ଲଗାଇଛି। ଏହାସହ ପ୍ରତ୍ୟେକ ହାଟପାଳିରେ ଦୁଇଜଣ ପୋଲିସ କର୍ମଚାରୀଙ୍କୁ ଟ୍ରାଫିକ ବ୍ୟବସ୍ଥା ନିରୀକ୍ଷଣ କରିବା ପାଇଁ ଦାୟିତ୍ୱ ଦିଆଯାଇଛି। ଅନ୍ୟପକ୍ଷେ ପୂର୍ବତନ ମନ୍ତ୍ରୀ ମଙ୍ଗଳା କିଷାନ ଦୁର୍ଘଟଣା ରୋକିବାକୁ ରାଜ୍ୟ ରାଜପଥ ଉପରେ ରୋଡ୍ ପାରି ହେବା ପାଇଁ ଛୋଟ ଓଭର ବ୍ରିଜ ନିର୍ମାଣ କରିବା ପାଇଁ ପ୍ରଶାସନର ଦୃଷ୍ଟି ଆକର୍ଷଣ କରିଛନ୍ତି।