ନୂଆଦିଲ୍ଲୀ, ୨୨|୭ (ପି.ଟି.): ଆଇ-ଲିଗ୍ ୨୦୧୮-୧୯ ଚାମ୍ପିୟନ ଚେନ୍ନାଇ ସିଟି ଏଏଫ୍ସି କପ୍ ଗ୍ରୁପ୍ ପର୍ଯ୍ୟାୟରେ ଏହାର ଅବଶିଷ୍ଟ ମ୍ୟାଚ୍ ମାଳଦ୍ୱୀପରେ ଖେଳିବ। ବହୁ ଦେଶରେ କୋଭିଡ୍-୧୯ ପଜିଟିଭ୍ ସଂଖ୍ୟା ବୃଦ୍ଧି ପାଇବାରେ ଲାଗିଥିବାରୁ ଏସିଆନ ଫୁଟ୍ବଲ କନଫେଡେରେଶନ (ଏଏଫ୍ସି) ଏହି ନିଷ୍ପତ୍ତି ନେଇଛି। ମ୍ୟାଚଗୁଡ଼ିକ ଗୋଟିଏ ଭେନ୍ୟୁରେ ଅନୁଷ୍ଠିତ ହେବ ବୋଲି ମାଳଦ୍ୱୀପ କ୍ରୀଡ଼ା ମନ୍ତ୍ରୀ ଅହମ୍ମଦ ମାହଲୁଫ୍ ପ୍ରକାଶ କରିଛନ୍ତି। ମାଳଦ୍ୱୀପ ଫୁଟ୍ବଲ ଆସୋସିଏଶନ (ଏଫ୍ଏଏମ୍) ଏକ ମାତ୍ର ଜାତୀୟ ମହାସଂଘ ଭାବେ ଗ୍ରୁପ୍ ‘ଇ’ ମ୍ୟାଚ୍ ଗୁଡ଼ିକର ଆୟୋଜନ ପାଇଁ ଆଗ୍ରହ ଦେଖାଇଥିଲା। ଏହି ଗ୍ରୁପ୍ରେ ସ୍ଥାନୀୟ ଦଳ ମାଜିୟା, ଟିସି ସ୍ପୋଟର୍ସ ଏବଂ ବାଂଲାଦେଶର ବସୁନ୍ଧରା କିଙ୍ଗ୍ସ ରହିଛନ୍ତି। ଚେନ୍ନାଇ ସିଟି ଏହାର ଗତ ମ୍ୟାଚ ମାର୍ଚ୍ଚ ୧୪ରେ ଖେଳିଥିଲା। ଅକ୍ଟୋବର ୨୩ରେ ଟିସି ସ୍ପୋଟର୍ସ ବିପକ୍ଷରେ ଦଳ ପୁଣି ଏହାର ଅଭିଯାନ ଆରମ୍ଭ କରିବ। ମ୍ୟାଚଗୁଡ଼ିକ ମାଲେସ୍ଥିତ ରାମ୍ସି ଧାଣ୍ଡୁ ନ୍ୟାଶନାଲ ଷ୍ଟାଡିୟମରେ ଖେଳାଯିବ। ଚେନ୍ନାଇ ସିଟି ମାଜିୟା ବିପକ୍ଷ ଏହାର ପ୍ରଥମ ଗ୍ରୁପ୍ ମ୍ୟାଚ୍ ୨-୨ରେ ଡ୍ର ରଖିଥିଲା। ଦଳର ଆହୁରି ୫ଟି ମ୍ୟାଚ୍ ବାକି ରହିଛି। କରୋନା ଭାଇରସ୍ ଯୋଗୁ ଏଏଫ୍ସିର ମହାଦେଶୀୟ ପ୍ରତିଯୋଗିତାଗୁଡ଼ିକ ମାର୍ଚ୍ଚରେ ସ୍ଥଗିତ ରଖିଥିଲା।
