ଚେନ୍ନାଇ: କରୋନା କାଳରେ ବଦଳିଛି ଚିନ୍ତାଧାରା। ପରିସ୍ଥିତି ସହ ଲଢ଼ିବା ପାଇଁ ମଣିଷ ଆପଣାଉଛି ଭଳିକି ଭଳି ଉପାୟ। ଏବେ ସଂକ୍ରମଣର ସଂଖ୍ୟା କମୁଥିଲେ ହେଁ ବିପଦ ପୁରା ଟଳିନାହିଁ। ଏଣୁ ସରକାରଙ୍କ ପକ୍ଷରୁ ସଚେତନ କରାଯିବା ସହ କିଛି କଥାରେ ଏବେ ବି କଟକଣା ଲାଗି ରହିଛି। ସେଥିରୁ ଗୋଟିଏ ହେଲା ବିବାହ ଉତ୍ସବ। ପ୍ରଥମେ ବିବାହ ଉତ୍ସବକୁ ମନା କରାଯିବା ପରେ ଏହାକୁ ସାମାନ୍ୟ କୋହଳ କରାଯାଇଛି। ଫଳରେ ବହୁଳ ମାତ୍ରାରେ ବିବାହ ଅନୁଷ୍ଠିତ ହେଉଥିବା ଦେଖିବାକୁ ମିଳୁଛି। ହେଲେ ଅଧିକ ଅତିଥିଙ୍କୁ ମନା ହୋଇଥିବାରୁ ଅନେକ ସମ୍ପର୍କୀୟ ଭୋଜି ଖାଇବାରୁ ବଞ୍ଚିତ ହେଉଛନ୍ତି। ହେଲେ ଚେନ୍ନାଇର ଏକ ପରିବାର ଏହି ଅସୁବିଧାକୁ ଏଡ଼ାଇବା ପାଇଁ ନିଆରା ଉପାୟ ବାଛିଥିଲେ, ଯାହାକି ଏବେ ଚର୍ଚ୍ଚାରେ। ସୋସିଆଲ ମିଡିଆରେ ମଧ୍ୟ ଉକ୍ତ କାମର ପ୍ରଶଂସା କରାଯାଉଛି।
ମହାମାରୀ କରୋନା ଯୋଗୁ ସବୁ କାମ ପରି ବିବାହ ମଧ୍ୟ ଅନଲାଇନ୍ରେ ହେଉଛି। ବନ୍ଧୁ ତଥା ସମ୍ପର୍କୀୟମାନେ ଅନ୍ଲାଇନ୍ରେ ବରବଧୂଙ୍କୁ ଆଶୀର୍ବାଦ ଦେଉଛନ୍ତି। ହେଲେ ସ୍ବାଦିଷ୍ଟ ବ୍ୟଞ୍ଜନଗୁଡ଼ିକୁ ଖାଇବାରୁ ବଞ୍ଚିତ ହେଉଥିବାରୁ ଦୁଃଖ ପ୍ରକାଶ କରିବା ସହ ପୂର୍ବ ଦିନଗୁଡିକୁ ମନେ ପକାଉଛନ୍ତି। ଏହାକୁ ଦୃଷ୍ଟିରେ ରଖି ଚେନ୍ନାଇର ଏକ ପରିବାର ନିଜର ୭୦୦ ଅତିଥିଙ୍କ ଘରକୁ ବିବାହର ଭୋଜି ପଠାଇଥିଲେ। ପୁଅର ବାପା ବିବାହକୁ ଭଲ ଭାବରେ କରିବାକୁ ଚାହୁଁଥିଲେ। ଏଣୁ ସେ ‘ବିବାହ ଭୋଜି’ କୁ ସମସ୍ତଙ୍କ ଘରକୁ ପଠାଇବାକୁ ଯୋଜନା କରିଥିଲେ।
ପୁଅର ଭର୍ଚୁଆଲ ବିବାହକୁ ନିମନ୍ତ୍ରିତ ହୋଇଥିବା ଅତିଥିମାନେ ଏହି ଭୋଜି ଖାଇପାରିଥିଲେ। ଅତିଥିମାନଙ୍କୁ ରଙ୍ଗୀନ ବ୍ୟାଗ୍ରେ ବଡ଼ ବଡ ଟିଫିନରେ ଖାଇବା ସହ କଦଳିପତ୍ର ମିଳିଥିଲା। ଏଥିରେ ମୋଟ ୧୨ ପ୍ରକାରର ବ୍ୟଞ୍ଜନ ରହିଥିଲା। ଘରେ ଭୋଜି ପହଞ୍ଚିଥିବା ଦେଖି ଅତିିଥିମାନେ ମଧ୍ୟ ଖୁସି ହୋଇଯାଇଥିଲେ। ଏବେ ବିବାହର କାର୍ଡ ସହ ଭୋଜିର ଫଟୋ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି।
