ନୂଆଦିଲ୍ଲୀ, ୧୪।୧୧: ଇଂଲଣ୍ଡ ଷ୍ଟାର ଅଲରାଉଣ୍ଡର ବେନ୍ ଷ୍ଟୋକ୍ସଙ୍କୁ ଛାଡ଼ିଲା ଚେନ୍ନାଇ ସୁପର କିଙ୍ଗସ୍(ସିଏସକେ)। ୨୦୨୨ ନିଲାମୀରେ ଷ୍ଟୋକ୍ସଙ୍କୁ ୧୬.୨୫ କୋଟି ଟଙ୍କା ବ୍ୟୟରେ କିଣିଥିଲା ସିଏସକେ। ଆଇପିଏଲ ୨୦୨୪ ପାଇଁ ଆଉ ଗୋଟିଏ ମାସରୁ କମ ସମୟ ବାକି ଥିବା ବେଳେ ସମସ୍ତ ଟିମ୍ ସେମାନେ ଚାହୁଁଥିବା ଖେଳାଳିଙ୍କୁ ରିଲିଜ କରିବା ଆରମ୍ଭ କରିଛନ୍ତି। ଏହାରି ମଧ୍ୟରେ ସିଏସକେ ଷ୍ଟୋକ୍ସଙ୍କୁ ଛାଡିବାକୁ ନିଷ୍ପତ୍ତି ନେଇଛି।
୨୦୨୪ ଆଇପିଏଲରେ ଷ୍ଟୋକ୍ସଙ୍କ ଉପଲବ୍ଧତା ଉପରେ ଅନେକ ସନ୍ଧେହ ରହିଛି, କାରଣ ଆଗକୁ ସେ ତାଙ୍କ ବାମ ଆଣ୍ଠୁରେ ଅପରେସନ କରାଇ ପାରନ୍ତି। ଯେଉଁଥିରୁ ସୁସ୍ଥ ହେବାକୁ ତାଙ୍କୁ ଦୁଇ ମାସ ସମୟ ଲାଗିବ। ରିପୋର୍ଟ ଅନୁଯାୟୀ ସିଏସକେ ଟିମ୍ ମ୍ୟାନେଜମେଣ୍ଟ ଏହି ବିଷୟରେ ଷ୍ଟୋକ୍ସଙ୍କ ସହିତ ଆଲୋଚନା କରିଛନ୍ତି।
ଏହି ସମ୍ପର୍କରେ ଜଣେ ସିଏସକେ ଅଧିକାରୀ କହିଛନ୍ତି, “ଷ୍ଟୋକ୍ସଙ୍କୁ ଛାଡିବା କଥା ଆମେ କେବେ ବିଚାର କରିବୁ ନାହିଁ କାରଣ ସେ ଜଣେ ବଡ ମ୍ୟାଚ୍ ଖେଳାଳି ଅଟନ୍ତି ଏବଂ ଆମେ ତାଙ୍କୁ ସର୍ବୋଚ୍ଚ ସମ୍ମାନରେ ରଖିଥାଉ। କିନ୍ତୁ ଯଦି ସେ ଆଗାମୀ ସିଜନରେ ଉପଲବ୍ଧ ହେବେ ନାହିଁ, ତେବେ ଆମେ ୧୬ କୋଟି ଟଙ୍କା ବ୍ୟୟ କରିବୁ ଯାହା ବଦଳରେ ଆମେ କିଛି ଭଲ ଖେଳାଳି ଦଳରେ ସାମିଲ କରିପାରିବୁ। ”