ଚେନ୍ନାଇ, ୨୫।୬- ବର୍ତ୍ତମାନ ସୋସିଆଲ ମିଡିଆରେ ଜେଣ୍ଡର ସ୍ବାପ୍ ଜରିଆରେ କ୍ରିକେଟର୍ଙ୍କ ‘ଫିମେଲ ଭର୍ସନ’ ବା ମହିଳା ଅବତାର ରୂପ ଦେଖିବାକୁ ମିଳୁଛି। ବିଭିନ୍ନ ଷ୍ଟାର୍ କ୍ରିକେଟର୍ଙ୍କ ମହିଳା ରୂପର ଫଟୋ ଏବେ ସୋସିଆଲ ମିଡିଆରେ ବେଶ୍ ଭାଇରାଲ୍ ହେବାରେ ଲାଗିଛି। ଏଥିରେ ମହିଳା ରୂପରେ କ୍ରିକେଟର୍ଙ୍କୁ ଚିହ୍ନିବା ମଧ୍ୟ କଷ୍ଟକର ହୋଇପଡ଼ିଛି। ଏହିକ୍ରମରେ ଗୁରୁବାର ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ଫ୍ରାଞ୍ଚାଇଜ ଚେନ୍ନାଇ ସୁପର୍ କିଙ୍ଗ୍ସ (ସିଏସ୍କେ) ଦଳ ଏହାର କିଛି ପ୍ରମୁଖ ଖେଳାଳିଙ୍କ ମହିଳା ଅବତାର ଫଟୋ ଇନ୍ଷ୍ଟାଗ୍ରାମରେ ଶେୟାର କରିଛି। ସିଏସ୍କେ ପକ୍ଷରୁ ଶେୟାର କରାଯାଇଥିବା ୧୨ ଜଣିଆ ମହିଳା ଅବତାର ତାଲିକାର ପ୍ରଥମ ଧାଡ଼ିର ବାମରୁ ଅଧିନାୟକ ମହେନ୍ଦ୍ର ସିଂ ଧୋନୀ, ସୁରେଶ ରାଇନା, ଶେନ୍ ଓ୍ବାଟସନ ଓ ଅମ୍ବାତି ରାୟୁଡୁ ରହିଛନ୍ତି। ସେହିଭଳି ଦ୍ୱିତୀୟ ଲାଇନର ବାମରୁ କେଦାର ଯାଦବ, ଶାର୍ଦ୍ଦୁଳ ଠାକୁର, ରବୀନ୍ଦ୍ର ଜାଡେଜା ଓ ଫାଫ୍ ଡୁ ପ୍ଲେସିସ ଏବଂ ଅନ୍ତିମ ତଥା ୩ୟ ଲାଇନରେ ଦୀପକ ଚହର, ମିଚେଲ ସାଣ୍ଟନର, ଲୁନ୍ଗୀ ଏନ୍ଗିଡି ଓ ଡ୍ବେନ ବ୍ରାଭୋଙ୍କ ମହିଳା ଅବତାର ଫଟୋ ରହିଛି। ଏହି ଫଟୋ ତଳେ ସିଏସ୍କେ ପକ୍ଷରୁ କ୍ୟାପସନରେ ଲେଖା ଯାଇଛି ‘ଚେନ୍ନାଇ ସୁପର କିଙ୍ଗ୍ସର ରାଣୀମାନେ ତୁମକୁ ସମସ୍ତେ ଭଲ ପାଆନ୍ତି’। ଏହି ଫଟୋଟି ଏବେ ଚାରିଆଡ଼େ ଭାଇରାଲ୍ ହେବାରେ ଲାଗିଛି।