ନୂଆଦିଲ୍ଲୀ,୧୨।୫: ଚଳିତ ଆଇପିଏଲ୍ ସିଜନ୍ରେ ଭଲ ପ୍ରଦର୍ଶନ କରୁଥିଲା ଚେନ୍ନାଇ ସୁପରକିଙ୍ଗ୍ସ। ମହେନ୍ଦ୍ର ସିଂହ ଧୋନୀଙ୍କ ନେତୃତ୍ୱାଧୀନ ସିଏସ୍କେ ଟିମ୍ ଟୁର୍ନାମେଣ୍ଟ ସ୍ଥଗିତ ହେବା ଆଗରୁ ୭ ମ୍ୟାଚ୍ ଖେଳିଥିବା ବେଳେ ସେଥିରୁ ୫ ମ୍ୟାଚ୍ ଜିତିଥିଲା। ଏଥିସହ ସେ ପଏଣ୍ଟ ତାଲିକାର ଦ୍ୱିତୀୟ ସ୍ଥାନରେ ରହିଥିଲା। ଏବେ ଆଇପିଏଲ୍ ସ୍ଥଗିତ ହେବା ପରେ ସିଏସ୍କେ ପକ୍ଷରୁ ଏକ ଭିଡିଓ ଶେୟାର କରାଯାଇଛି, ଯାହାକୁ ଦେଖି ପ୍ରଶଂସକମାନେ ଭାବୁକ ହେଉଛନ୍ତି। ଉକ୍ତ ଭିଡିଓରେ ଦଳର ଯାତ୍ରା ଦେଖିବାକୁ ମିଳୁଛି। ପୁଣିଥରେ ଟୁର୍ନାମେଣ୍ଟ ଆରମ୍ଭ ହେଲେ ଯେଉଁଭଳି ଆରମ୍ଭ କରିଥିଲେ, ସେହିଭଳି ଶେଷ କରିବାକୁ ଦମ୍ଦାର ପ୍ରତ୍ୟାବର୍ତ୍ତନ କରିବେ ବୋଲି ଉକ୍ତ ଭିଡିଓରେ କୁହାଯାଉଛି।
ସିଏସ୍କେ ପକ୍ଷରୁ ଶେୟାର କରାଯାଇଥିବା ୫ ମିନିଟର ଭିଡିଓ କିଛି ସମୟ ମଧ୍ୟରେ ଭାଇରାଲ ହୋଇଥିଲା। ମାର୍ଚ୍ଚ ୨ରେ ଧୋନୀ ଚେନ୍ନାଇ ପହଞ୍ଚିବା ସମୟଠାରୁ ଆରମ୍ଭ କରି ଖେଳାଳିମାନଙ୍କ ଥଟ୍ଟାମଜା ସବୁକିଛି ଦେଖିବାକୁ ମିଳିଛି। ପ୍ରଶଂସକମାନେ ଭିଡିଓ ଦେଖି ଭାବୁକ ହେବା ସହ ପ୍ରତିକ୍ରିୟା ରଖୁଛନ୍ତି। ଅନେକ ପୁଣିଥରେ ପଡ଼ିଆରେ ନିଜ ପସନ୍ଦର ଟିମ୍କୁ ଦେଖିବାକୁ ଚାହୁଁଥିବା କହିଛନ୍ତି।