ମୁମ୍ବାଇ,୨୧।୪: ଇଣ୍ଡିଆନ ପ୍ରିମିୟର ଲିଗ୍(ଆଇପିଏଲ୍)ର ଗୁରୁବାର ମ୍ୟାଚର ଅନ୍ତିମ ଓଭରରେ ମହେନ୍ଦ୍ର ସିଂ ଧୋନୀଙ୍କ ବିସ୍ଫୋରକ ବ୍ୟାଟିଂ ବଳରେ ଚେନ୍ନାଇ ସୁପର କିଙ୍ଗ୍ସ (ସିଏସ୍କେ) ୩ ଉଇକେଟରେ ମୁମ୍ବାଇ ଇଣ୍ଡିଆନ୍ସକୁ ହରାଇ ଦେଇଛି। ପ୍ରଥମେ ବ୍ୟାଟିଂ କରିଥିବା ମୁମ୍ବାଇ ୨୦ ଓଭରରେ ୭ ଉଇକେଟ ହରାଇ ୧୫୫ ରନ୍ କରିଥିବା ବେଳେ ସିଏସ୍କେ ସମାନ ଓଭରରେ ସମାନ ସଂଖ୍ୟକ ଉଇକେଟ ହରାଇ ମ୍ୟାଚ୍ ଜିତି ନେଇଥିଲା। ଚଳିତ ସିଜନରେ ଡିଫେଣ୍ଡିଂ ଚାମ୍ପିୟନ ଚେନ୍ନାଇ ଦ୍ୱିତୀୟ ବିଜୟ ହାସଲ କରିଛି। ଅନ୍ୟପକ୍ଷରେ ଲଗାତର ୭ମ ପରାଜୟ ସହ ମୁମ୍ବାଇର ପ୍ଲେ-ଅଫ୍ ଆଶା ମଉଳି ଯାଇଛି।
ଟସ୍ ଜିତି ରବୀନ୍ଦ୍ର ଜାଡେଜା ନେଇଥିବା ବୋଲିଂ ନିଷ୍ପତ୍ତିକୁ ପ୍ରଥମ ଓଭରରେ ଉଚିତ ପ୍ରମାଣ କରି ଦେଖାଇଥିଲେ ମୁକେଶ ଚୌଧାରୀ। ସେ ପ୍ରଥମ ଓଭରରେ ହିଁ ଅଧିନାୟକ ରୋହିତ ଶର୍ମା ଓ ଇଶାନ କିଷନଙ୍କୁ ପ୍ୟାଭିଲିଅନ ବାଟ ଦେଖାଇଥିଲେ। ମୁମ୍ବାଇର ଦୁଇ ଓପନର ଖାତା ଖୋଲି ପାରି ନ ଥିଲେ। ତା’ ପରେ ନିୟମିତ ବ୍ୟବଧାନରେ ଡଓ୍ବୋଲ୍ଡ ବ୍ରେଭିସ(୪), ସୂର୍ଯ୍ୟକୁମାର ଯାଦବ (୩୨), ହ୍ରିତିକ ଶୋକିନ (୨୫), କିରନ ପୋଲାର୍ଡ (୧୪) ଓ ଡାନିଏଲ ସାମ୍ସ (୫) ଆଉଟ୍ ହୋଇଥିଲେ। ଶେଷ ଆଡ଼କୁ ତିଲକ ବର୍ମାଙ୍କ ଅପରାଜିତ ୫୧ (୩ ଚୌକା ଓ ୨ ଛକା) ରନ୍ ଓ ଜୟଦେବ ଉନାଡକଟ (୧୯) ଆଟାକିଂ ବ୍ୟାଟିଂ କରି ଦଳୀୟ ସ୍କୋରକୁ ୧୫୫/୭ରେ ପହଞ୍ଚାଇଥିଲେ। ସିଏସ୍କେ ପକ୍ଷରୁ ମୁକେଶ ସର୍ବାଧିକ ୩ ଉଇକେଟ ନେଇଥିବା ବେଳେ ଡ୍ବେନ ବ୍ରାଭୋ ୨ ଉଇକେଟ ହାତେଇଥିଲେ। ଜବାବରେ ସିଏସ୍କେ ମଧ୍ୟ ପ୍ରାରମ୍ଭରୁ ଦୁଇ ଉଇକେଟ ହରାଇଥିଲା। ତୃତୀୟ ଉଇକେଟ ପାଇଁ ରବିନ ଉଥପ୍ପା (୩୦) ଏବଂ ଅମ୍ବାତି ରାୟୁଡୁ (୪୦) ୫୦ ରନ୍ ଯୋଡ଼ିଥିଲେ। ପରବର୍ତ୍ତୀ ୪୦ ରନ୍ରେ ୪ ଉଇକେଟ ପଡ଼ିଯିବାରୁ ସିଏସ୍କେର ଇନିଂସ ଦିଗହରା ହୋଇଯାଇଥିଲା। କିନ୍ତୁ ମହେନ୍ଦ୍ର ସିଂ ଧୋନୀ ( ୧୩ ବଲରେ ୨୮* ରନ୍, ୩ ଚୌକା ଓ ୧ ଛକା) ଅନ୍ତିମ ବଲରେ ଚୌକା ମାରି ମୁମ୍ବାଇ ହାତରୁ ମ୍ୟାଚ୍ ଛଡ଼ାଇ ନେଇଥିଲେ। ସିଏସ୍କେ ୨୦ ଓଭରରେ ୭ ଉଇକେଟ ହରାଇ ୧୫୬ ରନ୍ କରି ମ୍ୟାଚ୍ ଜିତି ନେଇଥିଲା।
