ଦୁବାଇ,୧୦।୧୦: ଇଣ୍ଡିଆନ ପ୍ରିମିୟର ଲିଗ୍ର ରବିବାର ଅନୁଷ୍ଠିତ କ୍ୱାଲିଫାୟର-୧ ମ୍ୟାଚରେ ଚେନ୍ନାଇ ୪ ଉଇକେଟରେ ଦିଲ୍ଲୀ କ୍ୟାପିଟାଲ୍ସକୁ ପରାସ୍ତ କରିଛି। ହାଇସ୍କୋରିଂ ମ୍ୟାଚରେ ଦିଲ୍ଲୀ ୨୦ ଓଭରରେ ୫ ଉଇକେଟ ହରାଇ ୧୭୨ ରନ୍ କରିଥିବା ବେଳେ ଚେନ୍ନାଇ ୧୯.୪ ଓଭରରେ ୬ ଉଇକେଟ ହରାଇ ବିଜୟ ଲକ୍ଷ୍ୟ ହାସଲ କରି ନେଇଥିଲା। ଚେନ୍ନାଇ ପ୍ରଥମ ଦଳ ଭାବେ ଫାଇନାଲରେ ପ୍ରବେଶ କରିଛି। ପରାଜିତ ହୋଇଥିଲେ ହେଁ ଦିଲ୍ଲୀର ଅଭିଯାନ ଶେଷ ହୋଇନାହିଁ। ଏହି ଦଳ ଏଲିମିନେଟରର ବିଜେତା ଦଳକୁ କ୍ୱାଲିଫାୟର-୨ରେ ଭେଟିବ।
୧୭୩ ରନ ବିଜୟ ଲକ୍ଷ୍ୟ ନେଇ ପଡ଼ିଆକୁ ଓହ୍ଲାଇଥିବା ଚେନ୍ନାଇ ମାତ୍ର ୩ ରନରେ ଓପନର ଫାଫ୍ ଡୁ’ପ୍ଲେସିଙ୍କ ଉଇକେଟ ହରାଇ ପ୍ରାରମ୍ଭିକ ବ୍ୟାଟିଂ ବିପର୍ଯ୍ୟୟରେ ପଡ଼ିଥିଲା। ମାତ୍ର ଋତୁରାଜ ଗାଏକ୍ୱାଡ ଓ ରବିନ ଉଥପ୍ପା ଦ୍ୱିତୀୟ ଉଇକେଟରେ ଶତକୀୟ ଭାଗୀଦାରି ଗଢ଼ି ଇନିଂସ ସମ୍ଭାଳିଥିଲେ। ଦୁହେଁ ୭୭ ବଲ୍ରୁ ୧୧୦ ରନ କରିବା ପରେ ଲଙ୍ଗ୍ଅନ୍ରେ ଶ୍ରେୟାସ ଆୟାର ଏକ ଚିତ୍ତାକର୍ଷକ କ୍ୟାଚ ନେଇ ଉଥପ୍ପାଙ୍କ ଇନିଂସର ଅବସାନ ଘଟାଇଥିଲେ। ୪୪ ବଲ୍ର ସମ୍ମୁଖୀନ ହୋଇଉଥପ୍ପା ୭ ଚୌକା ଓ ୨ ଛକା ସହାୟତାରେ ୬୩ ରନ କରିଥିଲେ। ଶାର୍ଦ୍ଦୁଳ ଠାକୁର ବ୍ୟାଟିଂ କ୍ରମରେ ଉପରେ ଆସିଥିଲେ ହେଁ ଖାତା ଖୋଲିବା ପୂର୍ବରୁ ଆଉଟ ହୋଇ ଯାଇଥିଲେ। ଟମ୍ କୁରାନ ଗୋଟିଏ ଓଭରରେ ଏହି ୨ଟି ଯାକ ଉଇକେଟ ନେଇଥିଲେ। ଅମ୍ବାତି ରାୟୁଡ଼ୁ ୧ ରନ କରି ରନଆଉଟ ହେବାରୁ ଚେନ୍ନାଇ ଉପରେ ଚାପ ବଢ଼ିଥିଲା। ୧୨ ବଲ୍ରୁ ୨୪ ରନ ଆବଶ୍ୟକ ଥିବାବେଳେ ୧୮ତମ ଓଭରରେ ଆଭେଶ ଖାଁଙ୍କ ପ୍ରଥମ ବଲ୍ରେ ବଡ଼ ଶଟ୍ ଖେଳିବାକୁ ଯାଇ ଋତୁରାଜ ଡିପ୍ ମିଡ୍ ଉଇକେଟରେ ଅକ୍ଷର ପଟେଙ୍କ ହାତରେ ଧରା ପଡ଼ିଥିଲେ। ୫୦ଟି ବଲ୍ ଖେଳିଥିବା ଏହି ଯୁବ ଓପନର ୫ ଚୌକା ଓ ୨ ଛକା ସହାୟତାରେ ୭୦ ରନ ସ୍କୋର କରିଥିଲେ। ଫିନିଶର ଭୂମିକା ପାଇଁ ବିଶେଷ ପରିଚିତ ଅଧିନାୟକ ଅଧିନାୟକ ମହେନ୍ଦ୍ର ସିଂ ଧୋନୀ ୬ ବଲ୍ରୁ ୩ ଚୌକା ଓ ୧ ଛକା ସହାୟତାରେ ୧୮ ରନରେ ଅପରାଜିତ ରହି ମ୍ୟାଚର ପରିସମାପ୍ତି ଘଟାଇଥିଲେ। ଦିଲ୍ଲୀର ଟମ୍ କୁରାନ ୩ଟି ଏବଂ ଏନରିଚ୍ ନର୍ଜେ ଓ ଆଭେଶ ଖାଁ ଗୋଟିଏ ଲେଖାଏ ଉଇକେଟ ନେଇଥିଲେ।