ଚେନ୍ନାଇ,୨୧।୪: ଡିଭନ୍ କନ୍ୱେଙ୍କ ଅପରାଜିତ ଦମ୍ଦାର ଅର୍ଦ୍ଧଶତକ ବଳରେ ଚେନ୍ନାଇ ସୁପରକିଙ୍ଗ୍ସ ଶୁକ୍ରବାର ଅନୁଷ୍ଠିତ ଇଣ୍ଡିଆନ ପ୍ରିମିୟର ଲିଗ୍ର ୨୯ତମ ମ୍ୟାଚରେ ୭ ଉଇକେଟରେ ବିଜୟୀ ହୋଇଛି। ହାଇଦ୍ରାବାଦ ନିର୍ଦ୍ଧାରିତ ୨୦ ଓଭରରେ ୭ ଉଇକେଟ ହରାଇ ୧୩୪ ରନ୍ କରିଥିବା ବେଳେ ଚେନ୍ନାଇ ୧୮.୪ ଓଭରରେ ୩ ଉଇକେଟ ହରାଇ ବିଜୟ ଲକ୍ଷ୍ୟ ହାସଲ କରିନେଇଛି। ଏହି ବିଜୟ ସହ ଚେନ୍ନାଇ ୮ ପଏଣ୍ଟ ପାଇ ଟେବୁଲର ତୃତୀୟ ସ୍ଥାନରେ ରହିଛି।
ଟସ୍ ହାରି ବ୍ୟାଟିଂ କରିଥିବା ହାଇଦ୍ରାବାଦ ପକ୍ଷରୁ ହ୍ୟାରୀ ବ୍ରୁକ୍(୧୮ ରନ୍) ଓ ଅଭିଷେକ ଶର୍ମା(୩୪ ରନ୍) ପ୍ରଥମ ଉଇକେଟରେ ୩୫ ରନ୍ ଯୋଡିଥିଲେ। ରାହୁଲ ତ୍ରିପାଠୀ ୨୧ ରନ୍ ଓ ଅଧିନାୟକ ଏଡେନ୍ ମାର୍କରାମ୍ ୧୨ ରନ୍ କରିଥିଲେ। ଉଭୟଙ୍କ ଆଉଟ୍ ପରେ ହାଇଦ୍ରାବାଦ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇ ୧୩୪ ରନ୍ କରିବାରେ ସକ୍ଷମ ହୋଇଥିଲା। ୧୩୫ ରନ୍ର ପିଛା କରି ଡେଭନ୍ କନଓ୍ବେ ଧୈର୍ଯ୍ୟର ସହ ବ୍ୟାଟିଂ କରି ୭୭ ରନ୍ର ଗୁରୁତ୍ୱପୂର୍ଣ୍ଣ ଇନିଂସ ଖେଳିଥିଲେ। ପ୍ରଥମ ଉଇକେଟରେ ଋତୁରାଜ ଗାଏକ୍ୱାଡଙ୍କ ସହିତ ସେ ୮୭ ରନ୍ ଯୋଡିଥିଲେ। ୫୭ ବଲ୍ ଖେଳି କନ୍ଓ୍ବେ ୧୨ ଚୌକା ଓ ୧ ଛକା ମାରିଥିଲେ। ଗାଏକ୍ୱାଡ ରନ୍ ଆଉଟ ହେବା ପରେ ଅଜିଙ୍କ୍ୟ ରାହାନେ ଓ ଅମ୍ବାତି ରାୟୁଡୁ ୯ ରନ୍ ଲେଖାଏ ସ୍କୋର କରି ମାର୍କଣ୍ଡେଙ୍କ ବଲରେ ଆଉଟ୍ ହୋଇଥିଲେ। ହେଲେ ମୋଇନ୍ ଅଲୀ ଚୌକା ମାରି ଦଳକୁ ବିଜୟୀ କରାଇଥିଲେ।
