ଅହମ୍ମଦାବାଦ,୩।୩: ଭାରତୀୟ ଟେଷ୍ଟ ଟିମ୍ର ଅଭିଜ୍ଞ ବ୍ୟାଟ୍ସମ୍ୟାନ୍ ଚେତେଶ୍ୱର ପୂଜାରା ଇଂଲଣ୍ଡ ବିପକ୍ଷ ଚତୁର୍ଥ ଟେଷ୍ଟରେ ରେକର୍ଡ କରିପାରନ୍ତି। ଏଥିପାଇଁ ମାତ୍ର ୪୫ରନ୍ର ଆବଶ୍ୟକତା ରହିଛି। ଯଦି ସେ ଚତୁର୍ଥ ଟେଷ୍ଟରେ ରନ୍ କରିନିଅନ୍ତି ତେବେ ଇଂଲଣ୍ଡ ବିପକ୍ଷରେ ୧୦୦୦ ଟେଷ୍ଟ ରନ୍ କରିଥିବା ୪ର୍ଥ ଭାରତୀୟ କ୍ରିକେଟର ପାଲଟିବେ। ତାଙ୍କ ପୂର୍ବରୁ ସୁନିଲ ଗାଭାସ୍କର, ଗୁଡପ୍ପା ବିଶ୍ୱନାଥ ଏବଂ ଭାରତୀୟ ଅଧିନାୟକ ବିରାଟ କୋହଲି ଏହା କରିଛନ୍ତି।
ତେବେ ମହାନ୍ ବ୍ୟାଟ୍ସମ୍ୟାନ୍ ସଚିନ ତେନ୍ଦୁଲକର ଏହି ସ୍ବତନ୍ତ୍ର କ୍ଲବରେ ସାମିଲ ହୋଇପାରି ନାହାନ୍ତି। ଇଲଂଣ୍ଡ ବିପକ୍ଷରେ ସେ ୧୫ ଟେଷ୍ଟ ଖେଳିଥିବା ବେଳେ ୯୬୦ରନ୍ କରିପାରିଥିଲେ। ଅପରପକ୍ଷେ ସବୁଠାରୁ ଅଧିକ ରନ୍ କରିଥିବା ଖେଳାଳି ହେଉଛନ୍ତି ଗାଭାସ୍କର। ସେ ୨୨ଟେଷ୍ଟ ଖେଳି ୧୩୩୧ରନ୍ କରିଛନ୍ତି। ଏହାପରେ ଗୁଡପ୍ପା ୧୭ ଟେଷ୍ଟ ଖେଳି ୧୦୨୨ରନ୍ କରିଛନ୍ତି। କୋହଲି ୧୨ ଟେଷ୍ଟରେ ୧୦୧୫ରନ୍ କରିବାରେ ସଫଳ ହୋଇଛନ୍ତି। ଏଣୁ ଚତୁର୍ଥ ଟେଷ୍ଟରେ ଭଲ ପ୍ରଦର୍ଶନ କରି ଗୁଡପ୍ପାଙ୍କୁ ପଛରେ ପକାଇ ଦ୍ୱିତୀୟ ସ୍ଥାନ ହାସଲ କରିପାରନ୍ତି ସେ।
ପୁଜାରା ଏଯାବତ ଇଂଲଣ୍ଡ ବିପକ୍ଷରେ ୧୨ ଟେଷ୍ଟ ଖେଳି ୯୫୫ରନ୍ କରିଛନ୍ତି। ନିକଟରେ ଖେଳାଯାଇଥିବା ତିନୋଟି ଟେଷ୍ଟରେ କେବଳ ଗୋଟିଏ ଅର୍ଦ୍ଧଶତକ ମାରିଛନ୍ତି ସେ। ଏଣୁ ସେ ଚତୁର୍ଥ ଟେଷ୍ଟରେ ବଡ଼ ପାଳି ଖେଳି ପ୍ରଶଂସକଙ୍କୁ ଖୁସି କରି ନିଜ ପାଇଁ ରେକର୍ଡ କରିବେ ବୋଲି ଆଶା କରାଯାଉଛି।
