ସେଞ୍ଚୁରିୟନ,୨୭।୧୨: ଭାରତ ଏବଂ ଦକ୍ଷିଣ ଆଫ୍ରିକା ମଧ୍ୟରେ ତିନି ଟେଷ୍ଟ ସିରିଜର ପ୍ରଥମ ଟେଷ୍ଟ ମ୍ୟାଚ ସେଞ୍ଚୁରିୟନରେ ଖେଳାଯାଉଛି। ଏହି ମ୍ୟାଚରେ ଓପନର କେ.ଏଲ ରାହୁଲ ଏବଂ ମୟଙ୍କ ଅଗ୍ରୱାଲ ଚମତ୍କାର ଇନିଂସ ଖେଳିଛନ୍ତି। ଏଥି ସହିତ ଦଳର ଷ୍ଟାର ବ୍ୟାଟ୍ସମ୍ୟାନ ଚେତେଶ୍ୱର ପୂଜାରାଙ୍କ ଫ୍ଲପ ସୋ ଜାରି ରହିଛି। ପୂଜାରା ଏହି ମ୍ୟାଚରେ କୌଣସି ରନ ସ୍କୋର କରିପାରିନଥିଲେ ଏବଂ ଖାତା ନ ଖୋଲି ପାଭିଲିୟନକୁ ଫେରିଥିଲେ। ଏହା ସହିତ ତାଙ୍କ ନାମରେ ଏକ ଲଜ୍ଜାଜନକ ରେକର୍ଡ ଯୋଡା ଯାଇଛି। ତିନି ନମ୍ବରରେ ବ୍ୟାଟିଂ କରୁଥିବାବେଳେ ସେ ସର୍ବାଧିକ ଥର ‘ଶୂନ’ରେ ଆଉଟ୍ ହୋଇଥିବା ବ୍ୟାଟ୍ସମ୍ୟାନ ହୋଇଛନ୍ତି। ଏହି ପରିପ୍ରେକ୍ଷୀରେ ସେ ପୂର୍ବତନ କ୍ରିକେଟର ଦିଲୀପ ଭେଙ୍ଗସରକାରଙ୍କ ରେକର୍ଡ ଭାଙ୍ଗିଛନ୍ତି। ତିନି ନମ୍ବରରେ ଖେଳିବାବେଳେ ପୂଜାରା ନବମ ଥର ପାଇଁ ଖାତା ଖୋଲିପାରି ନ ଥିଲେ। ଟିମ ଇଣ୍ଡିଆର ବର୍ତ୍ତମାନର କୋଚ ତଥା ପୂର୍ବତନ ବ୍ୟାଟ୍ସମ୍ୟାନ ରାହୁଲ ଦ୍ରାବିଡ ଏହି ପ୍ରସଙ୍ଗରେ ତୃତୀୟ ସ୍ଥାନରେ ଅଛନ୍ତି। ସେ ତିନି ନମ୍ବରରେ ଆକାଉଣ୍ଟ ନ ଖୋଲି ସାତଥର ଆଉଟ୍ ହୋଇଛନ୍ତି।
ଏକଦା ଟିମ ଇଣ୍ଡିଆର ଓ୍ବାଲ୍ କୁହାଯାଉଥିବା ଚେତେଶ୍ୱର ପୂଜାରା ବହୁତ ଖରାପ ଫର୍ମ ସହିତ ସଂଘର୍ଷ କରୁଛନ୍ତି। ତାଙ୍କ ବ୍ୟାଟରୁ ରନ ଆସୁନାହିଁ। ଦକ୍ଷିଣ ଆଫ୍ରିକା ବିପକ୍ଷରେ କୌଣସି ରନ ସ୍କୋର ନକରି ଚେତେଶ୍ୱର ପୂଜାରା ଆଉଟ ହୋଇଥିଲେ। ନ୍ୟୁଜିଲାଣ୍ଡ ବିପକ୍ଷ ପ୍ରଥମ ମ୍ୟାଚରେ ପୂଜାରା ଭଲ ପ୍ରଦର୍ଶନ କରିପାରି ନ ଥିଲେ। ସେ ପ୍ରଥମ ଇନିଂସରେ ୨୬ ରନ ଏବଂ ଦ୍ୱିତୀୟ ଇନିଂସରେ ମାତ୍ର ୨୨ ରନ ସଂଗ୍ରହ କରିଥିଲେ। ୨୦୧୯ ମସିହାରୁ ଚେତେଶ୍ୱର ପୂଜାରା ଟେଷ୍ଟ କ୍ରିକେଟରେ କୌଣସି ଶତକସ୍କୋର କରିବାରେ ସକ୍ଷମ ହୋଇନାହାଁନ୍ତି। ଭାରତୀୟ ଚୟନକର୍ତ୍ତା ତାଙ୍କୁ ଅନେକ ସୁଯୋଗ ଦେଇଛନ୍ତି । ଘରୋଇ କ୍ରିକେଟ ରେ ଭଲ ପ୍ରଦର୍ଶନ କରିଥିବା ଅନେକ ଯୁବକ ତାଙ୍କ ସ୍ଥାନ ନେବାକୁ ପ୍ରସ୍ତୁତ। ଯଦି ଦକ୍ଷିଣ ଆଫ୍ରିକା ବିପକ୍ଷ ଦ୍ୱିତୀୟ ଇନିଂସରେ ମଧ୍ୟ ତାଙ୍କ ବ୍ୟାଟ କାମ ନ କରେ, ତେବେ ସେ ଦଳରୁ ବାହାରକୁ ଯିବା ନିଶ୍ଚିତ। ଯୁବ ଶ୍ରେୟସ ଆୟର ଏବଂ ହନୁମା ବିହାରୀ ତାଙ୍କ ସ୍ଥାନ ନେବାକୁ ପ୍ରସ୍ତୁତ । ପୂଜାରାଙ୍କ ମନ୍ଥର ଗତି ପାଇଁ ସମାଲୋଚନା ମଧ୍ୟ କରାଯାଇଛି। ସେ ଭାରତ ପାଇଁ ୯୧ ଟି ଟେଷ୍ଟ ମ୍ୟାଚରେ ୬୫୪୨ ରନ ସଂଗ୍ରହ କରିଛନ୍ତି।
