ସିଡ୍ନୀ,୧୦।୧(ପି.ଟି.): ଭାରତ ପ୍ରଥମ ଇନିଂସରେ ଟେଷ୍ଟ ସ୍ପେଶାଲିଷ୍ଟ ଚେତେଶ୍ୱର ପୂଜାରାଙ୍କ ମନ୍ଥର ବ୍ୟାଟିଂକୁ ନେଇ ବେଶ୍ ଚର୍ଚ୍ଚା ହୋଇଛି। ପୂଜାରା ପ୍ରଥମ ଇନିଂସରେ ୧୭୬ ବଲ ଖେଳି ୫ ଚୌକା ସହ ୫୦ ରନର ଅର୍ଦ୍ଧଶତକୀୟ ପାଳି ଖେଳି ଆଉଟ ହୋଇଥିଲେ। ୧୭୪ଟି ବଲ ଖେଳି ଅର୍ଦ୍ଧଶତକ ହାସଲ କରିବା ପରେ ହିଁ ଆଉଟ ହୋଇଥିଲେ ଓ ଭାରତକୁ ସମସ୍ୟାରେ ଛାଡି ପ୍ୟାଭିଲିୟନ ଫେରିଥିଲେ। ଏଥିସହିତ ସେ ଟେଷ୍ଟ ଇତିହାସର ସବୁଠାରୁ ମନ୍ଥର ଅର୍ଦ୍ଧଶତକ ହାସଲ କରିବାର ରେକର୍ଡ ନିଜ ନାମରେ କରିଛନ୍ତି। ଏହି କ୍ରମରେ ସେ ନିଜର ରେକର୍ଡ ଭାଙ୍ଗିଛନ୍ତି। ପୂର୍ବରୁ ସେ ୨୦୧୮ରେ ଦକ୍ଷିଣ ଆଫ୍ରିକା ବିପକ୍ଷରେ ୧୭୩ଟି ବଲ ଖେଳି ଅର୍ଦ୍ଧଶତକ ହାସଲ କରିଥିଲେ। ତାଙ୍କ ଇନିଂସରେ ପୂଜାର ପୁଲ୍ କିମ୍ବା ହୁକ୍ ଶଟ୍ ଖେଳି ନ ଥିଲେ। ଏପରିକି ସେ କଟ୍ ଓ ଡାଇଭ୍ ମଧ୍ୟ କରି ନ ଥିଲେ। ତାଙ୍କର ଏହି ମନ୍ଥର ଇନିଂସକୁ ପୂର୍ବତନ ଅଷ୍ଟ୍ରେଲିଆ ଅଧିନାୟକ ରିକି ପଣ୍ଟିଂ ସମାଲୋଚନା କରିଛନ୍ତି। ତାଙ୍କର ଏହି ମନ୍ଥର ଇନିଂସ ଅନ୍ୟ ଭାରତୀୟ ବ୍ୟାଟ୍ସମ୍ୟାନଙ୍କ ଉପରେ ଚାପ ସୃଷ୍ଟି କରିଥିଲା। ସେ ମଧ୍ୟ ଷ୍ଟ୍ରାଇକ ରୋଟେଟ୍ କରିବାକୁ ପ୍ରୟାସ କରି ନ ଥିଲେ। ଫଳରେ ଭାରତ ବଡ଼ ସ୍କୋର କରିପାରି ନ ଥିଲା। ଅନ୍ୟପଟେ ଫ୍ଲାଟ୍ ପିଚ୍ ଭଳି ମନେହେଉଥିଲେ ମଧ୍ୟ ଏଠାରେ ରନ୍ ସ୍କୋର କରିବା ସହଜ ନ ଥିଲା ବୋଲି ପୂଜାରା କହିଛନ୍ତି। ଭାରତ ପ୍ରଥମ ସେସନରେ ୩୪ ଓଭରରେ ମାତ୍ର ୮୪ ରନ ସଂଗ୍ରହ କରିଥିଲା। ସ୍କୋରବୋର୍ଡ ଚାପ ଯୋଗୁ ରାହାନେ ମଧ୍ୟ ଆଉଟ ହୋଇଥିଲେ ବୋଲି କହିଲେ ଭୁଲ୍ ହେବନାହିଁ।
୩ ରନ ଆଉଟ୍
ପ୍ରଥମ ଇନିଂସରେ ଭାରତର ୩ଜଣ ବ୍ୟାଟ୍ସମ୍ୟାନ ରନ ଆଉଟ୍ ହୋଇଥିଲେ। ହନୁମା ବିହାରୀ, ରବିଚନ୍ଦ୍ରନ ଅଶ୍ୱିନ ଓ ଯଶପ୍ରୀତ ବୁମ୍ରା ସାଥୀ ଖେଳାଳିଙ୍କ ସହ ଭୁଲ୍ ବୁଝାମଣା କାରଣରୁ ରନ ଆଉଟ୍ ହୋଇଥିଲେ ଓ ଏହାର ପ୍ରଭାବ ଭାରତୀୟ ବ୍ୟାଟିଂ ଉପରେ ପଡିଥିଲା। ଗତ ୨୦ ବର୍ଷ ମଧ୍ୟରେ ତୃତୀୟଥର ପାଇଁ ଭାରତର ୩ ବ୍ୟାଟ୍ସମ୍ୟାନ ରନ ଆଉଟ୍ ହୋଇଛନ୍ତି। ଏହି କ୍ରମରେ ଭାରତ ଏକ ଅଲୋଡ଼ା ରେକର୍ଡର ଅଧିକାରୀ ହୋଇଛି। ଏହା ପୂବରୁ ୨୦୦୮ରେ ଇଂଲଣ୍ଡ ବିପକ୍ଷରେ ବୀରେନ୍ଦ୍ର ସେହ୍ବାଗ, ଭିଭିଏସ୍ ଲକ୍ଷ୍ମଣ ଓ ଯୁବରାଜ ସିଂ ରନ ଆଉଟ୍ ହୋଇଥିଲେ। ସେହିପରି ୨୦୦୧ରେ ଶ୍ରୀଲଙ୍କା ବିପକ୍ଷରେ ଭାରତର ରାହୁଲ ଡ୍ରାଭିଡ୍, ମହମ୍ମଦ କୈଫ୍ ଓ ସମୀର ଦିଘେ ରନ ଆଉଟ୍ ହୋଇଥିଲେ। ଏହି କ୍ରମରେ ଦେଖିବାକୁ ଗଲେ ଅଷ୍ଟ୍ରେଲିଆ ସବୁଠାରୁ ଆଗରେ ରହିବ। ଟେଷ୍ଟ ଇତିହାସରେ ଅଷ୍ଟ୍ରେଲିଆର ୩ ବ୍ୟାଟ୍ସମ୍ୟାନ ଗୋଟଏ ମ୍ୟାଚରେ ୮ ଥର ରନ୍ ଆଉଟ ହୋଇଛନ୍ତି। ଭାରତ ଏହି ଦୃଷ୍ଟିକୋଣରୁ ଦ୍ୱିତୀୟ ସ୍ଥାନରେ ରହିଛି। ଭାରତ ଟେଷ୍ଟ କ୍ରିକେଟରେ ୭ଥର ଏଭଳି ଘଟଣାର ଶିକାର ହୋଇଛି।