ଛତ୍ରପୁର,୧୩।୭(ଡି.ଏନ୍.ଏ.):ଗଞ୍ଜାମ ଜିଲା ଛତ୍ରପୁର ବ୍ଲକର ବିଭିନ୍ନ ସ୍ଥାନରେ କରୋନା ପଜିଟିଭ ଚିହ୍ନଟ ହେଉଛନ୍ତି। ଏ ନେଇ ଗୋଟିଏ ବ୍ୟାଙ୍କ ଶାଖାକୁ ୫ ଦିନ ଓ ୫ ଟି ଗାଁକୁ ସ୍ଥାନୀୟ ସରପଞ୍ଚମାନେ ୭ ଦିନ ଶଟଡାଉନ ଘୋଷଣା କରିଛନ୍ତି।
ମିଳିଥିବା ସୂଚନା ଅନୁସାରେ ଛତ୍ରପୁର ବ୍ଲକ ପୁଲିଂଗିର ବ୍ୟାଙ୍କ ଅଫ ଇଣ୍ଡିଆ ଶାଖାର ଜଣେ କର୍ମଚାରୀ କରୋନା ପଜିଟିଭ ହୋଇଛନ୍ତି। ଏହାପରେ ସ୍ଥାନୀୟ ସରପଞ୍ଚ ନରସିଂହ ରେଡ୍ଡୀ ଜିଲାପାଳ କ୍ଷମତା ପ୍ରୟୋଗ କରି ଉକ୍ତ ବ୍ୟାଙ୍କ ଶାଖାକୁ ୫ ଦିନ ଶଟଡାଉନ ଘୋଷଣା କରିଛନ୍ତି। ଫଳରେ ବ୍ୟାଙ୍କ ସମ୍ପୂର୍ଣ୍ଣ ବନ୍ଦ ହୋଇଯାଇଛି।
ସେହିପରି ପଜିଟିଭ ବାହାରିବାରୁ ଏହି ବ୍ଲକ ଅଧୀନ ପୋଟଲାମପୁର ପଞ୍ଚାୟତର ହଂସପୁର, ମୁନିସିପେଣ୍ଠ ଓ ଗାଙ୍ଗପୁର -୧ ଗାଁ କୁ ସରପଞ୍ଚ ସୁବାସିନୀ ବାରିକ ଏବଂ ଆର୍ଜିପଲ୍ଲୀ ପଞ୍ଚାୟତ ଅଧୀନ କେ ଆର୍ଜିପଲ୍ଲୀ ଓ ସାନ ଆର୍ଜିପଲ୍ଲୀର ଓଡିଆରପି କଲୋନୀକୁ ସ୍ଥାନୀୟ ସରପଞ୍ଚ ଏମ୍ ଲକ୍ଷ୍ମୀ ୭ ଦିନ ପାଇଁ ଶଟଡାଉନ ଘୋଷଣା କରିଛନ୍ତି
