ଛତ୍ରପୁର,୧୫ା୪(ଡି.ଏନ୍.ଏ): ମହାତ୍ମାଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମ ନିଯୁକ୍ତି ଯୋଜନା (ଏମ୍ଜିଏନ୍ଆର୍ଇଜିଏସ୍)ର ସଫଳ ରୂପାୟନରେ ଗଞ୍ଜାମ ଜିଲା ଜାତୀୟସ୍ତରରେ ରେକର୍ଡ ସୃଷ୍ଟି କରିଥିବା ବେଳେ ଛତ୍ରପୁର ବ୍ଲକ ପୂରା ପଛରେ ରହିଛି। ଛତ୍ରପୁର ବ୍ଲକ ଅଧିକ ଶ୍ରମ ଦିବସ ସୃଷ୍ଟି କରିବା ଓ ଶହେ ଦିନ କାମ ଯୋଗାଇବାରେ ଜିଲାର ୨୨ ନମ୍ବର ସ୍ଥାନରେ ରହିଛି । ଗଞ୍ଜାମ ଜିଲା ୨୦୨୨-୨୩ ଆର୍ଥିକ ବର୍ଷରେ ୯୯ ହଜାର ୪୮୮ ଜଣ ପରିବାରକୁ ଶହେ ଦିନିଆ କାମ ଯୋଗାଇ ଦେଇପାରିଛି। ଜିଲାରେ ପାତ୍ରପୁର ବ୍ଲକ ୭୪୧୩ ପରିବାରକୁ ଶହେ ଦିନର କାମ ଯୋଗାଇ ୧ନଂ ରହିଥିବା ବେଳେ ଚିକିଟି ବ୍ଲକ ୭୦୦୩ ପରିବାରକୁ କାମ ଯୋଗାଇ ୨ୟ ସ୍ଥାନ,ହିଞ୍ଜିଳି ୬୯୭୦ ପରିବାରକୁ କାମ ଯୋଗାଇ ୩ୟ ସ୍ଥାନ ରହିଥିବା ବେଳେ ଛତ୍ରପୁର ବ୍ଲକ ୨୧୬୬ ପରିବାରକୁ ଶହେ ଦିନର କାମ ଯୋଗାଇ ୨୨ ନଂ ସ୍ଥାନ ତଥା ଶେଷରେ ରହିଛି । ସେହିପରି ଗଞ୍ଜାମ ଜିଲା ୨୦୨୨-୨୩ ଆର୍ଥିକ ବର୍ଷରେ ୨ କୋଟି ୭୪ଲକ୍ଷ ୧୭ ହଜାର ୯୫୯ ଶ୍ରମଦିବସ ସୃଷ୍ଟି କରିଥିବା ବେଳେ ବୁଗୁଡା ବ୍ଲକ ଲକ୍ଷ୍ୟଧାର୍ଯ୍ୟର ୯୨ ପ୍ରତିଶତ ହାରରେ ୧୨ଲକ୍ଷ ୭୨ହଜାର ୮୪୫ ଶ୍ରମ ଦିବସ ସୃଷ୍ଟି କରି ଜିଲାରେ ପ୍ରଥମ ସ୍ଥାନରେ ରହିଛି । ସାନଖେମୁଣ୍ଡି ବ୍ଲକ ଲକ୍ଷ୍ୟଧାର୍ଯ୍ୟ ଠାରୁ ୯୦ ପ୍ରତିଶତ ହାରରେ ୧୭ଲକ୍ଷ ୪୫ ହଜାର ୧୭୧ ଶ୍ରମ ଦିବସ ସୃଷ୍ଟି କରି ୨ୟ ସ୍ଥାନ, ହିଞ୍ଜିଳି ୮୫ ପ୍ରତିଶତ ହାରରେ ୧୧ଲକ୍ଷ ୬୬ ହାଜର ୨୯୪ ଶ୍ରମ ଦିବସ ସୃଷ୍ଟି କରି ୩ୟ ସ୍ଥାନ ରହିଥିବା ବେଳେ ଛତ୍ରପୁର ବ୍ଲକ ଲକ୍ଷ୍ୟଧାର୍ଯ୍ୟ ଠାରୁ ୬୩ ପ୍ରତିଶତ ହାରରେ ୮ଲକ୍ଷ ୧୯ ହଜାର ୯୪୦ ଶ୍ରମ ଦିବସ ସୃଷ୍ଟି କରି ଶେଷରେ ରହିଛି। ଜିଲା ସଦର ମହକୁମା ହୋଇ ବି ଏହି ଯୋଜନାର ସଫଳ କାର୍ଯ୍ୟକାରିତା ଏଠାରେ ଫେଲ ମାରିଛି।
