ବରଗଡ଼ ଅଫିସ୍,୨୮।୨: ଛତିଶଗଡ଼ ସୀମାନ୍ତ ବରଗଡ଼ ଜିଲା ପାଇକମାଳ ବ୍ଲକ ଅନ୍ତର୍ଗତ ଚର୍ଦ୍ଦାପାଲି ଗ୍ରାମକୁ ମୌଳିକ ସୁବିଧା ସୁଯୋଗ ଅପହଞ୍ଚ ହୋଇପଡ଼ିଛି। ଅଞ୍ଚଳବାସୀଙ୍କୁ ଶିକ୍ଷା, ସ୍ବାସ୍ଥ୍ୟ, ଗମନାଗମନ ଆଦି ସେବା ଠିକ୍ ଭାବେ ମିଳିପାରୁନାହିଁ। ଏଭଳି ଅଭିଯୋଗ ନେଇ ବାରମ୍ବାର ସ୍ଥାନୀୟ ପ୍ରଶାସନ, ରାଜ୍ୟ ସରକାରଙ୍କଠାରେ ଦାବି ହୋଇଆସୁଥିଲେ ମଧ୍ୟ କିଛି ସୁଫଳ ମିଳିନାହିଁ। ଏଭଳି ଅଣଦେଖା ମନୋଭାବ ଯୋଗୁ ଚର୍ଦ୍ଦାପାଲି ପଞ୍ଚାୟତର ଅଧିବାସୀ ଅରକ୍ଷିତ ପ୍ରଧାନ, ଶଙ୍କର ସାହୁ, ଦଶରଥ ନାଏକ, ରକ୍ଷପାଳ ସାହୁ, ଶେଷଦେବ ନାୟକ, ଜନତା ପ୍ରଧାନ, ପ୍ରଫୁଲ୍ଲ ପ୍ରଧାନ ପ୍ରମୁଖ ଶନିବାର ସନ୍ଧ୍ୟାରେ ପଡ଼ୋଶୀ ଛତିଶଗଡ଼ ରାଜ୍ୟର ସରେଇପାଲି ବିଧାୟକ କିସ୍ମତ ଲାଲ ନନ୍ଦଙ୍କୁ ଭେଟି ଛତିଶଗଡ଼ରେ ମିଶିବା ପାଇଁ ଆଗ୍ରହ ପ୍ରକାଶ କରିଛନ୍ତି ଏ ନେଇ ସେମାନେ ବିଧାୟକ ନନ୍ଦଙ୍କୁ ମଧ୍ୟ ଏକ ସ୍ମାରକପତ୍ର ପ୍ରଦାନ କରିଛନ୍ତି। ଏହି ଘଟଣା ଏବେ ଜିଲାରେ ଚର୍ଚ୍ଚାର ବିଷୟ ହୋଇଛି ।
ସୂଚନାଯୋଗ୍ୟ, ଲଖମରା ଓ ଚର୍ଦ୍ଦାପାଲି ମଝିରେ ପ୍ରବାହିତ ଅଙ୍ଗ ନଦୀ ଉପରେ ପୋଲ ନିର୍ମାଣ, ଚର୍ଦ୍ଦାପାଲି, ଲୁହୁରାକୋଟ, ଛତିଶଗଡ଼ ସୀମା ଏବଂ ଦେବଦର୍ହା ରାସ୍ତା ନିର୍ମାଣ ଆଦି ଦାବି ନେଇ ଅଞ୍ଚଳବାସୀ ଅନେକ ଥର ରାଜ୍ୟ ସରକାରଙ୍କ ଦୃଷ୍ଟି ଆକର୍ଷଣ କରିଛନ୍ତି । ଏହି ଦାବି ନେଇ ସ୍ଥାନୀୟ ଲୋକେ ଆନ୍ଦୋଳନକୁ ଓହ୍ଲାଇ ଥିବାବେଳେ ପୂର୍ବରୁ ବିଧାନ ସଭାରେ ମଧ୍ୟ ଅଙ୍ଗନଦୀ ପୋଲ ସମସ୍ୟା ଉପସ୍ଥାପିତ ହୋଇଥିଲା। କିନ୍ତୁ ଏପର୍ଯ୍ୟନ୍ତ ସେହି ସମସ୍ୟାର ପ୍ରତିକାର କରାଯାଇନାହିଁ। ଅପରପକ୍ଷେ ସୀମା ବିବାଦ ନେଇ ରାଜ୍ୟ ରାଜନୀତିରେ ତାତି ବଢ଼ିଚାଲିଛି। ଏଭଳି ସମୟରେ ଚର୍ଦ୍ଦାପାଲି ପଞ୍ଚାୟତବାସୀ ଛତିଶଗଡ଼ରେ ମିଶିବା ପାଇଁ ସେଠାକାର ବିଧାୟକଙ୍କୁ ଭେଟି ସ୍ମାରକପତ୍ର ପ୍ରଦାନ କରିବା ପରେ ଜିଲାରେ ରାଜନୀତି ଉଷ୍ମ ହୋଇଛି। ଏ ସମ୍ପର୍କରେ ପଦ୍ମପୁର ଉପଜିଲାପାଳ ତନ୍ମୟ କୁମାର ଦରଓ୍ବାନଙ୍କୁ ପଚାରିବାରୁ ସେ କହିଲେ, ଚର୍ଦ୍ଦାପାଲି ଛତିଶଗଡ଼ ସୀମାନ୍ତରେ ରହିଛି। ସେହି ଅଞ୍ଚଳର ସବୁ ପ୍ରକାର ବିକାଶ ପାଇଁ ପ୍ରଶାସନ ଯୋଜନା କରୁଛି। ଚର୍ଦ୍ଦାପାଲିବାସୀ ଛତିଶଗଡ଼ରେ ମିଶିବା ପାଇଁ ସେଠାକାର ବିଧାୟକଙ୍କୁ ଭେଟିଥିବା କଥା ପ୍ରଶାସନକୁ ଜଣାଇନାହାନ୍ତି। ଏହା ସତ୍ୟ ନା ମିଥ୍ୟା ତଦନ୍ତ କରାଯିବ ବୋଲି ଦରଓ୍ବାନ କହିଥିଲେ।