କୋଷାଗୁମୁଡ଼ା,୯।୪: ବଢୁଥିବା କରୋନା ସଂକ୍ରମଣକୁ ଦୃଷ୍ଟିରେ ରଖି ନବରଙ୍ଗପୁର ଜିଲା କୋଷାଗୁମୁଡ଼ା ବ୍ଲକରୁ ଛତିଶଗଡ଼ର ଜଗଦଲପୁର ରାସ୍ତାକୁ ପ୍ରଶାସନ ସିଲ୍ କରିଛି। କୋଷାଗୁମୁଡ଼ା ବ୍ଲକ ସୀମାନ୍ତ ତଥା ଡିଆର୍ଡିଏ ଆଉଁଳି ଗ୍ରାମରେ ପୋଲିସ ମୁତୟନ କରାଯାଇଛି। ପଡ଼ୋଶୀ ଛତିଶଗଡ଼ରେ ଏବେ କରୋନା ବଢ଼ିବାରେ ଲାଗିଛି। ସାପ୍ତାହିକ ହାଟ ପାଇଁ ଲୋକେ କୋଷାଗୁମୁଡ଼ାକୁ ଆସୁଛନ୍ତି। ଫଳରେ ଏଠାରେ ସଂକ୍ରମଣ ବଢିବା ଆଶଙ୍କା କରି ପ୍ରଶାସନ ପକ୍ଷରୁ ସୀମା ସିଲ୍ ନିଷ୍ପତ୍ତି ନିଆଯାଇଛି। କିନ୍ତୁ ଛତିଶଗଡ଼ ବେପାରୀ ଗଳାବାଟ ଦେଇ ଶୁକ୍ରବାର ହୋଇଥିବା କୋଷାଗୁମୁଡ଼ା ସାପ୍ତାହିକ ହାଟକୁ ଆସିଥିବା ଜଣାପଡିଛି। ତେଣୁ ଆସନ୍ତା ଶୁକ୍ରବାର ହେବାକୁ ଥିବା ସାପ୍ତାହିକ ହାଟ ବନ୍ଦ ରହିବ ବୋଲି ପ୍ରଶାସନ ପକ୍ଷରୁ ସୂଚନା ଦିଆଯାଇଛି।
