ମୁମ୍ବାଇ,୨୮।୩: ବଲିଉଡ଼ ଅଭିନେତା ତଥା ପୂର୍ବତନ ଏମପି ଗୋବିନ୍ଦା ଗୁରୁବାର ମୁଖ୍ୟମନ୍ତ୍ରୀ ଏକନାଥ ଶିନ୍ଦେଙ୍କ ନେତୃତ୍ୱରେ ଶିବସେନାରେ ଯୋଗ ଦେଇଛନ୍ତି। ମୁମ୍ବାଇ ଉତ୍ତର ପଶ୍ଚିମରେ ଶିବସେନାର ଉଦ୍ଧବ ବାଲାସାହେବ ଠାକରେଙ୍କ ପ୍ରାର୍ଥୀ ଅମୋଲ କୀର୍ତ୍ତିକରଙ୍କ ବିରୋଧରେ ତାଙ୍କୁ ପ୍ରାର୍ଥୀ କରାଯାଇପାରେ ବୋଲି ଚର୍ଚ୍ଚା ହେଉଛି। ବୁଧବାର ରାତିରେ ଗୋବିନ୍ଦା ଶିବସେନା ଅଧିକାରୀ ତଥା ପୂର୍ବତନ ବିଧାୟକ କୃଷ୍ଣ ହେଗଡେଙ୍କୁ ଭେଟିଥିଲେ। ହେଗଡେ କହିଥିଲେ ଯେ ଗୋବିନ୍ଦା ଜାତୀୟ ସ୍ତରରେ କାମ କରିବାକୁ ଇଚ୍ଛା ପ୍ରକାଶ କରିଛନ୍ତି।
ଶିବସେନାରେ ଆନୁଷ୍ଠାନିକ ଭାବେ ଯୋଗଦେବା ପରେ ଗୋବିନ୍ଦା ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଜଣାଇବା ସହ କହିଥିଲେ ଯେ ସେ ୧୪ ବର୍ଷର ‘ବନବାସ’ପରେ ସକ୍ରିୟ ରାଜନୀତିରେ ପ୍ରବେଶ କରୁଛନ୍ତି। ସେ କହିଛନ୍ତି ଯେ ୧୪ବର୍ଷ ବନବାସ ପରେ ମୁଁ ରାଜନୀତିରେ ପ୍ରବେଶ କରିଛି କାରଣ ଗତ ୧୦ବର୍ଷ ମଧ୍ୟରେ କରାଯାଇଥିବା କାର୍ଯ୍ୟ ମୋତେ ବହୁତ ପ୍ରଭାବିତ କରିଛି। ମୋଦି ଜୀ ଆଣିଥିବା ରାମରାଜ୍ୟ ଏବଂ ଗତ ଦୁଇ ବର୍ଷ ମଧ୍ୟରେ ମୁମ୍ବାଇରେ ମୁଁ ଦେଖିଥିବା ଏକନାଥ ଶିନ୍ଦେ ଜୀଙ୍କ କାରଣରୁ ମୁଁ ଶିବସେନାରେ ଯୋଗ ଦେଇଛି।
ବଡ ପରଦାର ଛୋଟେ ମିଆଁ କହିଛନ୍ତି ଯେ ମୁଁ ଟିକେଟ ପାଇବା ଆଶାରେ ଆସି ନାହିଁ, କିନ୍ତୁ ମୋତେ ଯାହା ଦାୟିତ୍ୱ ଦିଆଯାଇଛି, ମୁଁ ଏହାକୁ ସଚ୍ଚୋଟତାର ସହ ପୂରଣ କରିବି। ଯଦି ମୋତେ ସୁଯୋଗ ମିଳେ, ମୁଁ ଲଢିବାକୁ ପ୍ରସ୍ତୁତ ହେବି, କିନ୍ତୁ ଟିକେଟ୍ ପାଇବା ଆଶାରେ ମୁଁ ଶିବସେନାରେ ଯୋଗ ଦେଇ ନାହିଁ।
ସେକହିଛନ୍ତି ଯେ ଦଳ ପାଇଁ ମୋର ଯାହା ସହଯୋଗ ଅଛି, ମୁଁ ଏହାକୁ ସଚ୍ଚୋଟତାର ସହ କରିବି। ମୋର ଏଠାକୁ ଆସିବା ହେତୁ ଅନେକ ଲୋକଙ୍କୁ ଏହା ଲଙ୍କା ଖାଇବା ଭଳି ଲାଗିଛି। ସେମାନଙ୍କର ଯୋଜନା ବି ଫସର ଫାଟି ଯାଇଛି। ସୂଚନାଯୋଗ୍ୟ, ୨୦୦୪ ସାଧାରଣ ନିର୍ବାଚନରେ ଗୋବିନ୍ଦା ଉତ୍ତର ମୁମ୍ବାଇର ଆସନରୁ କଂଗ୍ରେସ ଟିକେଟରେ ପ୍ରତିଦ୍ୱନ୍ଦ୍ୱିତା କରିଥିଲେ ଏବଂ ଭେଟେରାନ ଭାଜପା ନେତା ରାମ ନାୟକଙ୍କୁ ପରାସ୍ତ କରିଥିଲେ। ତେବେ ତାଙ୍କ କାର୍ଯ୍ୟକାଳ ଶେଷ ହେବା ପରେ ଗୋବିନ୍ଦା ପୁନର୍ବାର ଅଭିନୟ ଆରମ୍ଭ କରିଥିଲେ ଏବଂ ଏହା ପରେ ରାଜନୀତିରେ ପ୍ରବେଶ କରି ନ ଥିଲେ।