ପୁରୀ ଅଫିସ, ୩୦ା୧୦: ଗତ ୨୫ତାରିଖରେ ହୋଇଥିବା ସୂର୍ଯ୍ୟୋପରାଗ ସମୟରେ ହେତୁବାଦୀ ପରିଚୟ ଦେଇ କେତେଜଣ ବ୍ୟକ୍ତି ଚିକେନ୍ ବିରିୟାନୀ ଖାଇବା ସହ ବ୍ରାହ୍ମଣ ସମାଜକୁ ଆକ୍ଷେପ କରି ଅପମାନିତ ମନ୍ତବ୍ୟ ଦେଇଥିବା ଅଭିଯୋଗ ଆଣି ରାଜ୍ୟ ଶାକଦ୍ୱୀପୀ ବ୍ରାହ୍ମଣ ମହାସଂଘ ପୁରୀ ଜିଲା ଶାଖା ପକ୍ଷରୁ ରବିବାର ହେତୁବାଦୀ ସଙ୍ଗଠନ ବିରୋଧରେ ଟାଉନ ଥାନା ଅଧିକାରୀଙ୍କୁ ଏତଲା ଦିଆଯାଇଛି। ମହାସଂଘ ପକ୍ଷରୁ ଅଭିଯୋଗ ପତ୍ରରେ ଦର୍ଶାଯାଇଛି, ଗତ ୨୫ତାରିଖରେ ସୂର୍ଯ୍ୟୋପରାଗ ହୋଇଥିଲା। ଏହି ଦିନ ପରାଗ ସମୟରେ ଓଡ଼ିଶାର ସନାତନ ଧର୍ମର ଲୋକେ ହିନ୍ଦୁ ଶାସ୍ତ୍ର ଏବଂ ଜ୍ୟୋତିର୍ବିଦ୍ଙ୍କ ଦ୍ୱାରା ସ୍ଥିରୀକୃତ ସମୟ ଅନୁସାରେ ଦେବନୀତି ଓ ପାକନୀତି ପାଳନ କରିଥିଲେ। କିନ୍ତୁ ହେତୁବାଦୀ ସଙ୍ଗଠନର ସଦସ୍ୟମାନେ ଜ୍ୟୋତିଷ ଶାସ୍ତ୍ର, ବ୍ରାହ୍ମଣ ଓ ହିନ୍ଦୁ ସମାଜକୁ ଆକ୍ଷେପ କରି ଅଶାଳୀନ ମନ୍ତବ୍ୟ ଦେଇଥିଲେ। ସେହିପରି ଉକ୍ତ ଦିନ ସର୍ବସାଧାରଣ ସ୍ଥାନରେ ଚିକେନ ବିରିୟାନୀ ଖାଇ ଗଣମାଧ୍ୟମରେ ଧର୍ମ ବିରୋଧରେ ଅପପ୍ରଚାର କରିଥିଲେ। ଆଗାମୀ ଚନ୍ଦ୍ରଗ୍ରହଣ ଦିନ ସେମାନେ ଏହାର ପୁନରାବୃତ୍ତି କରିବେ ବୋଲି ଧମକପୂର୍ଣ୍ଣ ମନ୍ତବ୍ୟ ଦେଇ ଗଣମାଧ୍ୟମରେ ପ୍ରଚାର କରୁଛନ୍ତି। ତେଣୁ ସେମାନଙ୍କ ବିରୋଧରେ ତୁରନ୍ତ ଆଇନ ଅନୁଯାୟୀ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ବୋଲି ମହାସଂଘ ଦାବି କରିଛି। ଏତଲା ଦେବା ସମୟରେ ମହାସଂଘର ସଭାପତି କବିରାଜ ମହାପାତ୍ର ଏବଂ ସଦସ୍ୟମାନେ ଉପସ୍ଥିତ ଥିଲେ।