ନୂଆପଡ଼ା ଅଫିସ,୯।୪: କଳାହାଣ୍ଡି ପରେ ନୂଆପଡ଼ା ଜିଲାରେ ଶୁକ୍ରବାରଠାରୁ ‘ମୁଖ୍ୟମନ୍ତ୍ରୀ ବାୟୁ ସ୍ବାସ୍ଥ୍ୟ ସେବା’ କାର୍ଯ୍ୟକ୍ରମ ଆରମ୍ଭ ହୋଇଛି। ଏହି ସେବା ପାଇଁ କଟକ ବଡମେଡିକାଲ ଏବଂ ବୀର ସୁରେନ୍ଦ୍ର ସାଏ ମେଡିକାଲରୁ ୭ଜଣ ବିଶେଷଜ୍ଞ ଡାକ୍ତରୀ ଟିମ୍ ଶୁକ୍ରବାର ସ୍ବତନ୍ତ୍ର ବିମାନ ଯୋଗେ ନୂଆପଡା ଗୋତମା ଏୟାର ଷ୍ଟ୍ରିପ ପଡ଼ିଆରେ ଅବତରଣ କରିଥିଲେ। ସେଠାରୁ ଜିଲା ମୁଖ୍ୟ ଚିକିତ୍ସାଳୟକୁ ଯାଇଥିଲେ। ଦିନତମାମ ୨୯୫ଜଣ ରୋଗୀଙ୍କ ପରୀକ୍ଷା ଏବଂ ଚିକିତ୍ସା କରିଥିଲେ। ସେମାନଙ୍କ ମଧ୍ୟରୁ ୪ ଜଣ ରୋଗୀଙ୍କ ଅସ୍ତ୍ରୋପ୍ରଚାର କରାଯାଇଛି। ଏହି ଟିମ୍ରେ କାର୍ଡିଓଲୋଜି ସ୍ପେଶାଲିଷ୍ଟ, ୟୁରୋଲୋଜି ସ୍ପେଶାଲିଷ୍ଟ, ନେଫ୍ରୋଲୋଜି ସ୍ପେଶାଲିଷ୍ଟ ଡାକ୍ତରମାନେ ସାମିଲଥିଲେ। ଶନିବାର ସ୍ବତନ୍ତ୍ର ବିମାନରେ ପ୍ରତ୍ୟାବର୍ତ୍ତନ କରିବା କାର୍ଯ୍ୟକ୍ରମ ରହିଛି। ପ୍ରତ୍ୟେକ ମାସ ମୁଖ୍ୟମନ୍ତ୍ରୀ ବାୟୁ ସ୍ବାସ୍ଥ୍ୟ ସେବା କାର୍ଯ୍ୟ କରାଯିବ। ଏଣିକି ଦ୍ୱାର ମୁହଁରେ ମାଗଣା ଅସ୍ତ୍ରୋପ୍ରଚାର ସହ ରୋଗୀମାନେ ନିଜ ଜିଲା ମୁଖ୍ୟ ଚିକିତ୍ସାଳୟରେ ମାଗଣା ସେବା ପାଇ ପାରିବେ। ମୁଖ୍ୟମନ୍ତ୍ରୀ ବାୟୁ ସ୍ବାସ୍ଥ୍ୟ ସେବା ବିଶେଷଜ୍ଞ ଡାକ୍ତରମାନେ ବିମାନରେ ଆସି ଚିକିତ୍ସା ପ୍ରଦାନ କରିବେ। ଉଦ୍ଘାଟନ କାର୍ଯ୍ୟକ୍ରମରେ ନୂଆପଡା ଜିଲାପାଳ ସ୍ବାଧାଦେବ ସିଂ, ଜିଲା ମୁଖ୍ୟ ଚିକିତ୍ସା ଅଧିକାରୀ ଚୌଧୁରୀ ଶୋଭାରାଣୀ ମିଶ୍ର, ନୂଆପଡା ବିଧାୟକ ରାଜେନ୍ଦ୍ର ଢୋଲକିଆ ପ୍ରମୁଖ ଯୋଗଦେଇଥିଲେ।
