ରାଜସ୍ଥାନ,୪।୪ : ରାଜସ୍ଥାନର ମୁଖ୍ୟମନ୍ତ୍ରୀ ତଥା ପୂର୍ବତନ ମୁଖ୍ୟମନ୍ତ୍ରୀ ଉଭୟ କରୋନାରେ ସଂକ୍ରମିତ ହୋଇଛନ୍ତି। ମୁଖ୍ୟମନ୍ତ୍ରୀ ଅଶୋକ ଗେହଲୋଟ ଏବଂ ପୂର୍ବତନ ମୁଖ୍ୟମନ୍ତ୍ରୀ ବସୁନ୍ଧରା ରାଜେ ସିନ୍ଧିଆ ଟୁଇଟ କରି ସେମାନଙ୍କ ନମୁନା ପରୀକ୍ଷା ରିପୋର୍ଟ କୋଭିଡ ପଜିଟିଭ ଆସିଥିବା ବିଷୟରେ ସୂଚନା ଦେଇଛନ୍ତି।
ମଙ୍ଗଳବାର ଗେହଲୋଟ ଟୁଇଟ କରି ଲେଖିଛନ୍ତି ଗତ କିଛି ଦିନ ହେବ ସାରା ଦେଶରେ କରୋନା ମାମଲା ବୃଦ୍ଧି ପାଇଛି। ମୁଁ ନିଜେ ସାମାନ୍ୟ ଲକ୍ଷଣ ସହିତ କୋଭିଡରେ ସଂକ୍ରମିତ ହୋଇଛି। ଡାକ୍ତରଙ୍କ ପରାମର୍ଶ ଅନୁଯାୟୀ ମୁଁ ଆଗାମୀ କିଛି ଦିନ ପାଇଁ ମୋ ବାସଭବନରୁ କାର୍ଯ୍ୟ ଜାରି ରଖିବି। ଆପଣ ସମସ୍ତେ ନିଜ ନିଜର ଯତ୍ନ ନିଅନ୍ତୁ ଏବଂ କୋଭିଡ ପ୍ରୋଟୋକଲ ଅନୁସରଣ କରନ୍ତୁ ।
ଏଥି ସହିତ ପୂର୍ବତନ ମୁଖ୍ୟମନ୍ତ୍ରୀ ବସୁନ୍ଧରା ରାଜେ ଟୁଇଟ କରି ଲେଖିଛନ୍ତି , ମୋ ନମୁନା ରିପୋର୍ଟ କରୋନା ପଜିଟିଭ ଆସିଛି। ଡାକ୍ତରଙ୍କ ପରାମର୍ଶରେ ମୁଁ ସମ୍ପୂର୍ଣ୍ଣ ଆଇସୋଲେଶନରେ ରହିଛି। ଯେଉଁମାନେ ମୋ ସହିତ ଯୋଗାଯୋଗ କରିଥିଲେ,ସେମାନେ ନିଜକୁ ପରୀକ୍ଷା କରାନ୍ତୁ ଏବଂ ସତର୍କତା ଅବଲମ୍ବନ କରନ୍ତୁ।
ରବିବାର ଭାଜପା ମୁଖ୍ୟାଳୟରେ ବିଧାନସଭା ପାର୍ଟି ଏବଂ କୋର କମିଟିର ବୈଠକରେ ବସୁନ୍ଧରା ରାଜେ ଯୋଗ ଦେଇଥିଲେ। ଏହି ବୈଠକରେ ରାଜ୍ୟ ଭାଜପାର ବଡ ନେତାମାନେ ଉପସ୍ଥିତ ଥିଲେ ଏବଂ ପାର୍ଟି ଅଫିସରେ ମଧ୍ୟ ଭିଡ଼ ଜମିଥିଲା। ଏଭଳି ପରିସ୍ଥିତିରେ ଅନ୍ୟ ଭାଜପା ନେତାଙ୍କ ରିପୋର୍ଟ ମଧ୍ୟ କରୋନା ପଜିଟିଭ୍ ହୋଇପାରେ ବୋଲି ଆଶଙ୍କା କରାଯାଉଛି।
ଅପରପକ୍ଷରେ ଅଶୋକ ଗେହଲୋଟଙ୍କ ସ୍ବାସ୍ଥ୍ୟ ସକାଳୁ ଖରାପ ଥିଲା। ତେଣୁ ତାଙ୍କର ଅମୃତସରକୁ ଯିବା କାର୍ଯ୍ୟକ୍ରମ ବାତିଲ କରାଯାଇଥିଲା। ଆସନ୍ତା କିଛି ଦିନ ପାଇଁ, ସେ ତାଙ୍କ ବାସଭବନରୁ ସରକାରୀ କାର୍ଯ୍ୟ କରିବେ ଏବଂ ଭିଡିଓ କନଫରେନ୍ସ ମାଧ୍ୟମରେ ବିଭାଗୀୟ ବୈଠକରେ ଯୋଗଦେବେ ବୋଲି ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ କୁହାଯାଇଛି।