ଭବାନୀପାଟଣା/ଗୋଲାମୁଣ୍ଡା/କୋକସରା,୫।୩(ସ୍ବପ୍ର/ଡି.ଏନ୍.ଏ.): ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ରବିବାର ନୂଆପଡା ଜିଲା ଗସ୍ତ ସାରି କଳାହାଣ୍ଡି ଜିଲାର ଗୋଲାମୁଣ୍ଡା ବ୍ଲକ ବୃନ୍ଦାବାହାଲ ହାଇସ୍କୁଲ ଖେଳପଡ଼ିଆ ନିକଟରେ ଥିବା ଅସ୍ଥାୟୀ ହେଲିପ୍ୟାଡରେ ଓହ୍ଲାଇଥିଲେ। ପରେ ସେଠାରେ ଅନୁଷ୍ଠିତ ସାଧାରଣ ସଭାରେ ଯୋଗଦେଇ ୫୨୭.୪ କୋଟି ଟଙ୍କା ବ୍ୟୟରେ ନିର୍ମିତ ଜିଲାର ୯୩ଟି ପ୍ରକଳ୍ପର ଉଦ୍ଘାଟନ କରିଥିଲେ । ଏଥିରେ ରାସ୍ତା ଓ ସେତୁ, ଶିକ୍ଷା, ଜଳସମ୍ପଦ ପ୍ରକଳ୍ପ, ପାନୀୟ ଜଳ ଯୋଗାଣ, ମିଶନ ଶକ୍ତି, ସ୍ବାସ୍ଥ୍ୟ, ପର୍ଯ୍ୟଟନ ଓ ପରିବହନ ଆଦି ଭିତ୍ତିଭୂମି ପ୍ରକଳ୍ପ ରହିଛି। ଏହାସହ ୧୫୭୩.୪୨ କୋଟି ଟଙ୍କାରେ ନିର୍ମାଣ ହେବାକୁ ଥିବା ୧୧୩ଟି ପ୍ରକଳ୍ପର ଶିଳାନ୍ୟାସ କରିଥିଲେ । ଏହି ଅବସରରେ ମୁଖ୍ୟମନ୍ତ୍ରୀ ବୃନ୍ଦାବାହାଲ ଠାରେ ଆୟୋଜିତ ସାଧାରଣ ସଭାକୁ ସମ୍ବୋଧିତ କରିଥିଲେ ା ବୃନ୍ଦାବାହାଲ ସଭାକାର୍ଯ୍ୟ ପରେ ମୁଖ୍ୟମନ୍ତ୍ରୀ ବସ ଯୋଗେ ବିଜୁ ଏକ୍ସପ୍ରେସ ୱେ ରାସ୍ତାରେ ୧୫ କିମି ଦୂର ଗୋଡ଼ଭଞ୍ଜା ଗୋଳେଇ ଛକ ପର୍ଯ୍ୟନ୍ତ ରୋଡ଼ ଶୋ କରିଥିଲେ। ପରେ ସେଠାରୁ ଆମପାଣି ପର୍ଯ୍ୟନ୍ତ ଯାଇଥିଲେ । ସେଠାରେ ଜିଲା ମଧ୍ୟ ଦେଇ ଯାଇଥିବା ୭୦ କି.ମି (ଆମପାଣି-ଗୋଲାମୁଣ୍ଡା) ବିଜୁ ଏକ୍ସପ୍ରେସ ୱେ ରାସ୍ତାର ଲୋକାର୍ପିତ କରିଥିଲେ । ଏହି ଅବସରରେ ମୁଖ୍ୟମନ୍ତ୍ରୀ ଅଭିଭାଷଣରେ ଜୟ ବୁଢ଼ାରଜା କହିବା ସହ ବିଜୁ ଏସ୍କପ୍ରେସ ଓ୍ବେ ପାଇଁ ଆପଣମାନେ ଖୁସିତ କହି ବିଦାୟ ନେଇଥିଲେ। ଏହାପରେ ହେଲିକେପ୍ଟର ଯୋଗେ ଉତ୍କେଲା ଉଡାଜାହାଜ ପଡିଆକୁ ଯାଇ ବିମାନ ଯୋଗେ ଭୁବନେଶ୍ୱର ଫେରି ଯାଇଥିଲେ । କାର୍ଯ୍ୟକ୍ରମରେ ଜିଲାର ବୃନ୍ଦାବାହାଲ, ଧର୍ମଗଡ଼ ଓ ଆମପାଣିଠାରେ ପ୍ରାୟ ୩୦ ହଜାରୁ ଊଦ୍ଧର୍ବ ଲୋକ ସାମିଲ ହୋଇଥିଲେ।