କୋରାପୁଟ,୨୩ା୩(ଅମିତାଭ ବେହେରା): ଆସନ୍ତା ଏପ୍ରିଲ ୨ରେ ଆରମ୍ଭ ହେବାକୁ ଥିବା ଖଡ଼ି ଛୁଆଁ ଏବଂ ପ୍ରବେଶ ଉତ୍ସବ କାର୍ଯ୍ୟକ୍ରମ ପାଇଁ ନିମନ୍ତ୍ରଣ ବଣ୍ଟନ ଆରମ୍ଭ ହୋଇଯାଇଛି। ଚଳିତ ଶିକ୍ଷାବର୍ଷ ଶିଶୁବାଟିକା ଏବଂ ପ୍ରଥମ ଶ୍ରେଣୀରେ ନାମଲେଖା ପାଇଁ ମୁଖ୍ୟମନ୍ତ୍ରୀଙ୍କ ନିମନ୍ତ୍ରଣପତ୍ରକୁ ଅଭିଭାବକମାନଙ୍କୁ ବାଣ୍ଟିବା କାର୍ଯ୍ୟ ରବିବାର ଆରମ୍ଭ ହୋଇଯାଇଛି। ରଙ୍ଗବାଲି କୁମ୍ଭାଠାରେ ମୁଖ୍ୟ ଉନ୍ନୟନ ଅଧିକାରୀ ବେଣୁଧର ଶବର,ଜିଲା ଶିକ୍ଷା ଅଧିକାରୀ ଡ. ପ୍ରଶାନ୍ତ କୁମାର ମହାନ୍ତି ଏବଂ ଜିଲା ସାମାଜିକ ମଙ୍ଗଳ ଅଧିକାରୀ ପୁଷ୍ପାଞ୍ଜଳି ପଟ୍ଟନାୟକ ଯୋଗ୍ୟ ଅଭିଭାବକମାନଙ୍କ ଘରକୁ ଯାଇ ସରକାରୀ ବିଦ୍ୟାଳୟରେ ଏପ୍ରିଲ ୨ ତାରିଖରେ ନିଜ ପିଲାଙ୍କ ସହ ଯାଇ ନାମ ଲେଖାଇବାକୁ କହି ନିମନ୍ତ୍ରଣପତ୍ର ବଣ୍ଟନ କରିଥିବା ଜଣାପଡ଼ିଛି।
ସେହିପରି ବଡ଼ଚିନ୍ଦ୍ରିଠାରେ ଜିଲା ମଙ୍ଗଳ ଅଧିକାରୀ ସୁନିଲ କୁମାର ତାଣ୍ଡି, ଜିଲା ଶିକ୍ଷା ଅଧିକାରୀ ଡ. ପ୍ରଶାନ୍ତ କୁମାର ମହାନ୍ତି ଏବଂ ସିଆରସିସି ପ୍ରଦୀପ କୁମାର ପାତ୍ର ନିମନ୍ତ୍ରଣପତ୍ର ବଣ୍ଟନ କରିଥିବା ବେଳେ ପୋଡ଼ଗଡଠାରେ ଅତିରିକ୍ତ ଜିଲା ଶିକ୍ଷାଧିକାରୀ ଅର୍ପିତା ପ୍ରଧାନ ଅଭିଭାବକମାନଙ୍କୁ ନିମନ୍ତ୍ରଣପତ୍ର ବାଣ୍ଟିଥିବା ଜଣାପଡିଛି। ୫+ ବର୍ଷ ବୟସର ପିଲା ଶିଶୁବାଟିକାରେ ପ୍ରାଥମିକ ଶ୍ରେଣୀ ଥିବା ବିଦ୍ୟାଳୟରେ ନାମ ଲେଖାଇ ପାରିବେ ବୋଲି ସୂଚନା ମିଳିଛି। ଯେଉଁ ପିଲାଙ୍କ ବୟସ ୬+ ବର୍ଷ ସେମାନେ ପ୍ରଥମ ଶ୍ରେଣୀରେ ନାମ ଲେଖାଇ ପାରିବେ ବୋଲି ଜଣାପଡ଼ିଛି। ଯେଉଁ ସରକାରୀ ବିଦ୍ୟାଳୟରେ ପ୍ରାଥମିକ ଶ୍ରେଣୀ ରହିଛି ସେହି ବିଦ୍ୟାଳୟଗୁଡ଼ିକରେ ଏପ୍ରିଲ ୨ ରୁ ୫ ତାରିଖ ଯାଏ ଏହି କାର୍ଯ୍ୟକ୍ରମ ଚାଲିବ। ତେଣୁ ମାର୍ଚ୍ଚ୨୮ ପୂର୍ବରୁ ଯୋଗ୍ୟ ଅଭିଭାବକମାନଙ୍କ ଘରକୁ ଯାଇ ନିମନ୍ତ୍ରଣପତ୍ର ବାଣ୍ଟିବାକୁ ସମସ୍ତ ବିଦ୍ୟାଳୟଗୁଡ଼ିକୁ ନିର୍ଦ୍ଦେଶ ଦିଆଯାଇଛି।
