ନୂଆଦିଲ୍ଲୀ,୨।୧୧: ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିଓ୍ବାଲ ଓ ଉପ ମୁଖ୍ୟମନ୍ତ୍ରୀ ମନୀଷ ସିସୋଦିଆଙ୍କ ସମେତ ୧୧ ଜଣଙ୍କ ନାମରେ ୨୦୧୮ରେ ଏକ ନିର୍ଯାତନା ମାମଲା ଦାୟର କରିଥିଲେ ପୂର୍ବତନ ମୁଖ୍ୟ ସଚିବ ଅଂଶୁ ପ୍ରକାଶ। ଗତ ଅଗଷ୍ଟରେ ଏହି ମାମଲାରୁ କୋର୍ଟ କେଜରିଓ୍ବାଲ ଓ ସିସୋଦିଆଙ୍କୁ ଦୋଷମୁକ୍ତ କରିଥିଲେ। କେବଳ ଏଏପି ବିଧାୟକ ଅମାନତୁଲା ଖାନ ଓ ପ୍ରକାଶ ଜାଓର୍ବଲଙ୍କ ବିରୋଧରେ ମାମଲା ଚାଲିଥିଲା। କୋର୍ଟଙ୍କ ରାୟକୁ ସ୍ବତନ୍ତ୍ର କୋର୍ଟରେ ଚ୍ୟାଲେଞ୍ଜ କରିଛନ୍ତି ପୂର୍ବତନ ମୁଖ୍ୟ ସଚିବ।
ରୋଜ ଆଭେନ୍ୟୁ ଡିଷ୍ଟ୍ରିକ୍ଟ କୋର୍ଟ ସୋମବାର କେଜରିଓ୍ବାଲ ସମେତ ଅନ୍ୟମାନଙ୍କୁ ନୋଟିସ ଜାରି କରିଛନ୍ତି। ଏହି ମାମଲାର ଶୁଣାଣି ଆସନ୍ତା ୨୩ ତାରିଖ ହେବ।
ପ୍ରକାଶଙ୍କ ଆବେଦନ ଅନୁଯାୟୀ, ୨୦୧୮ ଫେବୃୟାରୀରେ ତାଙ୍କୁ ମୁଖ୍ୟମନ୍ତ୍ରୀଙ୍କ ବାସଭବନରେ ବିଜ୍ଞାପନ ସମ୍ପର୍କୀତ ବୈଠକରେ ଯୋଗଦେବାକୁ ଡକା ଯାଇଥିଲା। ସେଠାରେ କେଜରିଓ୍ବାଲ ଓ ସିସୋଦିଆଙ୍କ ସମେତ ୧୧ ଜଣ ଏଏପି ବିଧାୟକ ତାଙ୍କୁ ନିର୍ଯାତନା ଦେଇଥିଲେ। କିନ୍ତୁ ବୈଠକରେ ଉପସ୍ଥିତ ଥିବା ବ୍ୟକ୍ତିମାନେ ଜନ ପ୍ରତିନିଧି ହୋଇଥିବାରୁ ସେମାନଙ୍କୁ ଅତିରିକ୍ତ ମୁଖ୍ୟ ମେଟ୍ରୋପଲିଟାନ ମାଜିଷ୍ଟ୍ରେଟ୍ ସଚିନ ଗୁପ୍ତା ଦୋଷ ମୁକ୍ତ କରିଥିଲେ।