ଦେଓରିଆ,୨୦।୭: କେନ୍ଦ୍ର ଓ ରାଜ୍ୟ ସରକାର ଗରିବ ଲୋକଙ୍କ ପାଇଁ ଭଲ ସ୍ବାସ୍ଥ୍ୟ ସେବା ଯୋଗାଇ ଦେଉଛନ୍ତି ବୋଲି ଡିଣ୍ଡିମ ପିଟୁଛନ୍ତି। ହେଲେ ସେସବୁ ଯୋଜନା ବାଟବଣା ହେବାରେ ଲାଗିଛି। ପୁଣି କରୋନା କାଳରେ ସ୍ବାସ୍ଥ୍ୟ ସେବାର ଏଭଳି ଦୃଶ୍ୟ ସାମ୍ନାକୁ ଆସୁଛି ଯାହା ଅତ୍ୟନ୍ତ ଦୁଃଖଦାୟକ ଓ ମର୍ମାହତ କରିଦେବା ଭଳି। ଯେଉଁଠି ହସ୍ପିଟାଲର ଡାକ୍ତର, କର୍ମଚାରୀ ଓ ନର୍ସ ଦିନରାତି ଏକ କରି ଓ ନିଜ ଜୀବନକୁ ବାଜି ଲଗାଇ ରୋଗୀଙ୍କ ସେବା କରୁଛନ୍ତି। ସେଇଠି କେତେକ ହସ୍ପିଟାଲର କର୍ମଚାରୀ ନିଜ ଲୋଭଖୋର ମନଭାବ ଯୋଗୁ ରୋଗୀ ଅବହେଳିତ ହେବା ସହ ବହୁ ସମସ୍ୟାର ସମ୍ମୁଖୀନ ହେଉଥିବା ଦେଖିବାକୁ ମିଳିଛି। ଏହାର ଜ୍ୱଳନ୍ତ ନଗ୍ନ ଉଦାହରଣ ଦେଖିବାକୁ ମିଳିଛି ଉତ୍ତରପ୍ରଦେଶ ଦେଓରିଆରେ।
ଦେଓରିଆର ଏକ ହସ୍ପିଟାଲର କର୍ମଚାରୀ ଜଣେ ରୋଗୀଙ୍କୁ ଓ୍ବାର୍ଡ ପର୍ଯ୍ୟନ୍ତ ଷ୍ଟ୍ରେଚରରେ ନେବାକୁ ପରିବାର ଲୋକଙ୍କୁ ଲାଞ୍ଚ ମାଗିଥିଲେ। ତେବେ ରୋଗୀଙ୍କ ସମ୍ପର୍କୀୟ ଲାଞ୍ଚ ଦେବାକୁ ମନା କରିବାରୁ ଉକ୍ତ କର୍ମଚାରୀ ଷ୍ଟ୍ରେଚରରେ ତାଙ୍କୁ ନେବାକୁ ମନା କରିଦେଇଥିଲେ ଏବଂ ନିଜେ ନେଇଯିବାକୁ କହିଥିଲେ। ଫଳରେ ରୋଗୀଙ୍କ ସାଙ୍ଗରେ ଆସିଥିବା ତାଙ୍କ ସ୍ତ୍ରୀ ଓ କୋମଳମତି ଶିଶୁ ବାଧ୍ୟ ହୋଇ ଷ୍ଟ୍ରେଚରକୁ ନିଜେ ଠେଲି ଠେଲି ଓ୍ବାର୍ଡକୁ ନେଇଥିଲେ। ତେବେ ଶିଶୁର ଏହି ଷ୍ଟ୍ରେଚର ଠେଲିବା ଦେଖିଲେ ଯାହାର ଆଖିରେ ବି ଲୁହ ଆସିଯିବ। ଏଥିସହ ଗରିବଙ୍କ ପ୍ରତି ସରକାରଙ୍କ ଯୋଜନା କେତେ କାର୍ଯ୍ୟକାରୀ ହେଉଛି ଏହାକୁ ଦେଖିଲେ ସ୍ପଷ୍ଟ ବାରି ହୋଇପଡ଼ିବ। ଏହି ଘଟଣାକୁ ସ୍ଥାନୀୟ ମହଲରେ ନିନ୍ଦା କରାଯିବା ସହ ଚଚ୍ଚାର ବିଷୟ ପାଲଟିଛି।