ସମ୍ବଲପୁର/ରେଢ଼ାଖୋଲ,୨୯ା୧୦(ବ୍ୟୁରୋ/ଡି.ଏନ୍.ଏ.):ସମ୍ବଲପୁର ଜିଲା ରେଢାଖୋଲ ଉପଖଣ୍ଡ ଚାରମାଲ ଥାନା ଅଞ୍ଚଳରେ ଏକ ମାସର ଶିଶୁକନ୍ୟାକୁ ୧୫ହଜାର ଟଙ୍କାରେ ବିକ୍ରି କରାଯାଇଥିବା ଅଭିଯୋଗ ହୋଇଛି। ହେଲେ ବିକ୍ରି ନୁହେଁ, ଆର୍ଥତ୍କ ଅନଟନ ଯୋଗୁ ଖାଇବାକୁ ଦେଇ ନ ପାରି ସେ ନିଜର ଶିଶୁକନ୍ୟାକୁ ଅନ୍ୟଜଣେ ମହିଳାଙ୍କୁ ଦାନ କରିଦେଇଥିବା ଶିଶୁଟିର ମା’ କହିଛନ୍ତି। ଏ ସଂକ୍ରାନ୍ତରେ ଚାଇଲ୍ଡ ଲାଇନ ପାଖରେ ଖବର ପହଞ୍ଚିବା ପରେ ଚାରମାଲ ଥାନାରେ ଅଭିଯୋଗ ହୋଇଥିଲା। ମଙ୍ଗଳବାର ବିଳମ୍ବିତ ରାତିରେ ପୋଲିସ ଶିଶୁକନ୍ୟାକୁ ଉଦ୍ଧାର କରିଛି। ବୁଧବାର ଶିଶୁ କଲ୍ୟାଣ ସମିତିରେ ଶିଶୁକନ୍ୟାକୁ ହାଜର କରାଯାଇଥିଲା। ଶିଶୁ କନ୍ୟାର ମା’ ଓ ତାକୁ ଗ୍ରହଣ ଥିବା ଦମ୍ପତି ଉପସ୍ଥିତ ଥିଲେ। ଶିଶୁ କନ୍ୟା ବିକ୍ରି ହୋଇ ନ ଥିବା ମା’ ବୟାନ ଦେଇଛନ୍ତି। ଅନ୍ୟପଟେ ସେ ଶିଶୁକନ୍ୟାକୁ ସାଙ୍ଗରେ ନେଇ ଯିବାକୁ ଅନୁରୋଧ କରିଥିଲେ। ହେଲେ ଶିଶୁଟିକୁ ଦେବାକୁ ଶିଶୁ କଲ୍ୟାଣ ସମିତି କର୍ତ୍ତୃପକ୍ଷ ମନା କରିଦେଇଛନ୍ତି। ଏଥିପାଇଁ ଆଇନଗତ ପ୍ରକ୍ରିୟା ରହିଛି। ତାହା ପାଳନ କରାଯିବ। ମହିଳା ଜଣକ ଶିଶୁକନ୍ୟାର ମା’ ବୋଲି ପ୍ରମାଣ ଦେଲେ ତାଙ୍କୁ ପ୍ରଦାନ କରାଯିବ ବୋଲି ଶିଶୁ କଲ୍ୟାଣ ସମିତି ଅଧ୍ୟକ୍ଷ ବ୍ରଜେନ୍ଦ୍ର ପଣ୍ଡା କହିଛନ୍ତି। ଶିଶୁକନ୍ୟାକୁ ବରଗଁାସ୍ଥିତ ଆଶା ହୋମରେ ରଖାଯାଇ ଲାଳନପାଳନ କରାଯାଉଛି ବୋଲି ସେ କହିଛନ୍ତି।
ଅନ୍ୟପଟେ ଶିଶୁକନ୍ୟା ଦାନ କରିଥିବା ମହିଳା ଜଣଙ୍କ ସମସ୍ତ ସରକାରୀ ସୁବିଧାରୁ ବଞ୍ଚତ୍ତ ହୋଇଛନ୍ତି। ଆଧାର କାର୍ଡ, ଖାଦ୍ୟ ସୁରକ୍ଷା ଯୋଜନା ଓ ଆବାସ ଯୋଜନା ଭଳି ସୁବିଧା ସେ ପାଇ ନ ଥିବା କହିଛନ୍ତି। ସେହିପରି ଶିଶୁକନ୍ୟାକୁ ନେଇଥିବା ଦମ୍ପତି କହିଛନ୍ତି, ଉଭୟ ପରିବାର ମଧ୍ୟରେ ପୂର୍ବରୁ ସମ୍ପର୍କ ରହିଥିଲା। ତେଣୁ ରେଢାଖୋଲ ନୋଟାରୀ ପାଖରେ ସତ୍ୟପାଠ କରି ଶିଶୁକନ୍ୟାକୁ ନେଇଥିଲେ। ଶିଶୁକନ୍ୟାକୁ ଗ୍ରହଣ କରିଥିବା ଦମ୍ପତିଙ୍କ ପୂର୍ବରୁ କୌଣସି ସନ୍ତାନ ନ ଥିବା ଜଣାପଡିଛି।
ସୂଚନାଯୋଗ୍ୟ, ଚାରମାଳ ଥାନା ଅଞ୍ଚଳରେ ସ୍ବାମୀ ପରିତ୍ୟକ୍ତା ସମ୍ପୃକ୍ତା ମହିଳା ଜଣଙ୍କ ଚାରମାଲ ଡାକ୍ତରଖାନାରେ ସେପ୍ଟେମ୍ବର ୧୯ରେ ଏକ ଶିଶୁ କନ୍ୟାକୁ ଜନ୍ମ ଦେଇଥିଲେ। କିଛି ଦିନ ଘରେ ରହିଥିଲେ। ହେଲେ ଦିନ ମଜୁରି କରି ପେଟ ପୋଷୁ ଥିବା ମହିଳା ଜଣକୁ ଏଥପାଇଁ ସମସ୍ୟା ହୋଇଥିଲା। ପୂର୍ବରୁ ପରିଚିତ ଥିବା ରେଢାଖୋଲ ଥାନା ଅଞ୍ଚଳର ଜଣେ ମହିଳାଙ୍କୁ ସେ ନିଜ ଶିଶୁ କନ୍ୟାକୁ ଦାନ କରିଥିଲେ। ଘଟଣା ସମ୍ପର୍କରେ ଚାଇଲ୍ଡ ଲାଇନ ନମ୍ବରେ ଅଭିଯୋଗ ଆସିଥିଲା। ଚାଇଲ୍ଡ ଲାଇନ ପକ୍ଷରୁ ଚାରମାଲ ଥାନାରେ ୧୫ ହଜାର ଟଙ୍କାରେ ଶିଶୁ ବିକ୍ରି କରାଯାଇଥିବା ଭଳି ସାଂଘାତିକ ଅଭିଯୋଗ ହୋଇଥିଲା। ପୋଲିସ,ଚାଇଲ୍ଡ ଲାଇନ ସଦସ୍ୟ,ସ୍ଥାନୀୟ ଜନ ପ୍ରତିନିଧି ପହଞ୍ଚି ଶିଶୁକନ୍ୟାକୁ ଉଦ୍ଧାର କରିଥିଲେ। ଏହି ଘଟଣା ଜିଲାରେ ଆଲୋଡନ ସୃଷ୍ଟି କରିଛି।
