ଭୁବନେଶ୍ୱର,୧୩।୪(ବ୍ୟୁରୋ): ସ୍କୁଲ ଓ ଗଣଶିକ୍ଷା ବିଭାଗ ପକ୍ଷରୁ ଏକ ଗୁରୁତ୍ୱପୂର୍ଣ୍ଣ ବୈଠକ ମଙ୍ଗଳବାର ଲୋକସେବା ଭବନଠାରେ ଅନୁଷ୍ଠିତ ହୋଇଛି। ପିଲାମାନଙ୍କ ପାଠପଢା ଓ ପରୀକ୍ଷା ଆଦି ବିଷୟ ଉପରେ ମନ୍ତ୍ରୀ ସମୀର ରଞ୍ଜନ ଦାଶ ସମୀକ୍ଷା କରିଛନ୍ତି। ଏଥିରେ ବିଭାଗର ସମସ୍ତ ନିର୍ଦ୍ଦେଶକ, ସଚିବଙ୍କ ସମେତ ବରିଷ୍ଠ ଅଧିକାରୀ ଉପସ୍ଥିତ ଥିଲେ। ମୁଖ୍ୟତଃ ୧୧ଟି ପ୍ରସ୍ତାବ ଉପରେ ଆଲୋଚନା ହୋଇଛି। ମାଟ୍ରିକ ପରୀକ୍ଷା, ଯୁକ୍ତ ୨ ପରୀକ୍ଷା, ପ୍ରଶ୍ନପତ୍ର ଠିକ୍ଭାବେ ପ୍ରସ୍ତୁତ କରିବା ଏବଂ ଏଥିରେ ଯେପରି ବିଭ୍ରାଟ ନ ହୁଏ ସେଥିପ୍ରତି ଧ୍ୟାନ ଦେବା ଉପରେ ଆଲୋଚନା ହୋଇଛି। ସେହିପରି ସ୍କୁଲ ଓ କଲେଜ ପାଇଁ ଖରା ଛୁଟି ତାରିଖ ଚୁଡାନ୍ତ ହୋଇ ଉକ୍ତ ଫାଇଲ ଉନ୍ନୟନ କମିଶନରଙ୍କ ନିକଟକୁ ପଠାଯାଇଛି। ସେଠାରୁ ଫାଇଲ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅନୁମୋଦନ ପରେ ଘୋଷଣା କରାଯିବ। ତେବେ ଆସନ୍ତା ମାସରେ ଖରାଛୁଟି ହେବାକୁ ଥିବାବେଳେ ଏଥର ଦୁଇ ବର୍ଷ କୋଭିଡ ପାଇଁ ଯେଉଁ ପାଠପଢା ପିଲାଙ୍କ ନଷ୍ଟ ହୋଇଛି ତାକୁ ନେଇ ନୂଆ ଚିନ୍ତା କରାଯାଇଛି। ଖରାଛୁଟି ଲର୍ଣ୍ଣିଂ ରିକୋଭରି ପ୍ଲାନ ନେଇ ଚିନ୍ତା କରାଯାଇଥିବା ଜଣେ ବରିଷ୍ଠ ଅଧିକାରୀ କହିଛନ୍ତି। ଅର୍ଥାତ୍ ଏଥର ପିଲାଙ୍କୁ ଖରା ଛୁଟିରେ ପାଠ ପଢାଇ ଯେପରି ୨ ବର୍ଷର କ୍ଷତିପୂରଣ କରି ହେବ ସେଥିପ୍ରତି ଧ୍ୟାନ ଦିଆଯିବ। ସେହିପରି ୯୦୦ରୁ ଉର୍ଦ୍ଧ୍ୱ ସ୍କୁଲରେ ଜୁନିୟର ପ୍ରଧାନଶିକ୍ଷକଙ୍କୁ ସିନିୟର ପଦବୀକୁ ନେବା ଲାଗି ଆଲୋଚନା ହୋଇଛି। ଶିକ୍ଷକମାନଙ୍କ ବଦଳି ସମ୍ପର୍କିତ ବିଷୟ ଉପରେ ମଧ୍ୟ ଆଲୋଚନା ହୋଇଛି। ସେହିପରି ଗଣଶିକ୍ଷକମାନଙ୍କୁ ରେଗୁଲାର କରିବା ଉପରେ ଆଲୋଚନା ହୋଇଛି। ସେହିପରି ନିକଟରେ ନୂତନ ଭାବେ ନିଯୁକ୍ତି ପାଇଥିବା ୧୧ ହଜାର ଶିକ୍ଷୟତ୍ରୀ, ଶିକ୍ଷକମାନଙ୍କ ଟ୍ରେନିଂ ବାବଦ ଆଲୋଚନା ମଧ୍ୟ କରାଯାଇଛି। ସେହିପରି ଦଶମ ପିଲାଙ୍କ ପରୀକ୍ଷା ଫଳାଫଳ ସମୟ ଭିତରେ ପ୍ରକାଶ କରାଯିବା ଏବଂ ପରୀକ୍ଷା ସେଣ୍ଟର ଚୟନରେ ଯେପରି ସମସ୍ୟା ନ ଉପୁଜେ ସେଥିନେଇ ଆଲୋଚନା କରାଯାଇଛି।