ଭୁବନେଶ୍ୱର,୧୯ା୧୧(ବ୍ୟୁରୋ): ଭୁବନେଶ୍ୱରସ୍ଥିତ ବିଜୁପଟ୍ଟନାୟକ ପୋଲିସ ଏକାଡେମୀରେ ଗୁରୁବାର ଦୀକ୍ଷାନ୍ତ ସମାରୋହ ଅନୁଷ୍ଠିତ ହୋଇଛି। ଏହି କାର୍ଯ୍ୟକ୍ରମରେ ‘ପାସିଂ ଆଉଟ୍ ପରେଡ୍’ ଆୟୋଜନ କରାଯାଇଥିଲା। ଏଥିରେ ପଞ୍ଚମ ବ୍ୟାଚ୍ର ୭ଜଣ ଡିଏସ୍ପି ଏବଂ ୧୦ମ ବ୍ୟାଚରେ ଉତ୍ତୀର୍ଣ୍ଣ ହୋଇଥିବା ୧୯୧ଜଣ ସବ୍ଇନ୍ସପେକ୍ଟର ଭାଗ ନେଇଥିଲେ। ସମସ୍ତଙ୍କୁ ଶପଥ ପାଠ କରାଯାଇଥିଲା। କାର୍ଯ୍ୟକ୍ରମରେ ରାଜ୍ୟପାଳ ପ୍ରଫେସର ଗଣେଶୀ ଲାଲ୍ ମୁଖ୍ୟ ଅତିଥି ଭାବେ ଯୋଗଦେଇ ଉଦ୍ବୋଧନ ଦେଇଥିଲେ। ନିଶା କାରବାର ଓ ସେବନରୁ ସବୁ ଅପରାଧ ଘଟୁଛି। ନାବାଳକ ତଥା ଶୈଶବମାନେ ନିଶା କବଳରେ ପଡୁଛନ୍ତି। ଓଡ଼ିଶାର ଭବିଷ୍ୟତଙ୍କୁ ନିଶା ଭଳି ରାକ୍ଷସ କବଳରୁ ବଞ୍ଚାଇବା ପାଇଁ ସେ ଅଧିକାରୀମାନଙ୍କୁ ରାଜ୍ୟପାଳ ଆହ୍ବାନ ଦେଇଥିଲେ। ତାଲିମ ସମୟରେ ବିଭିନ୍ନ ବର୍ଗର ପରୀକ୍ଷାରେ ଅଧିକ ନମ୍ବର ରଖିଥିବା ୫ମ ବ୍ୟାଚର ୭ ଜଣ ଡିଏସ୍ପି ଓ ୧୦ମ ବ୍ୟାଚର ୧୩ ଜଣ ଏସ୍ଆଇଙ୍କୁ ମେଡାଲ ଦିଆଯାଇ ସମ୍ମାନିତ କରାଯାଇଥିଲା। ସେହିପରି ୨୦୧୬-୨୦୧୭ ଓ ୨୦୧୮-୧୯ମସିହାର ଟ୍ରେନିଂ କ୍ଷେତ୍ରରେ ଉଲ୍ଲେଖନୀୟ ପ୍ରଦର୍ଶନ ପାଇଁ ୯ଜଣ ପୋଲିସ ଅଧିକାରୀଙ୍କୁ ‘ୟୁନିୟନ ହୋମ୍ ମିନିଷ୍ଟର ମେଡାଲ ଫର୍ ଏକ୍ସିଲେନ୍ସ ଇନ୍ ପୋଲିସ’ ସମ୍ମାନ ଦିଆଯାଇଛି। ଏହି କାର୍ଯ୍ୟକ୍ରମରେ ଡିଜି ଅଭୟଙ୍କ ସହ ବରିଷ୍ଠ ଆଇପିଏସ ତଥା ବିପିଏସ୍ପିଏ ନିର୍ଦ୍ଦେଶକ ଏଡିଜି ଅରୁଣ କୁମାର ଷଡ଼ଙ୍ଗୀ, ଆଇଜି(ଅପରେଶନ) ଅମିତାଭ ଠାକୁର, ଆଇଜି (ବିପିଏସ୍ପିଏ) ଏସ୍. ସାଇନି, ଡିଆଇଜି (ଗୋଇନ୍ଦା) ଅନୁପ ସାହୁ ପ୍ରମୁଖ ଉପସ୍ଥିତ ଥିଲେ।