ଢେଙ୍କାନାଳ ଅଫିସ,୨୮ା୨: ଢେଙ୍କାନାଳ ଜିଲା କପିଳାସ୍ଥିତ ମହାପ୍ରଭୁ ଚନ୍ଦ୍ରଶେଖର ଜୀଉ ମହାଦେବଙ୍କ ପୀଠରେ ଆସନ୍ତା ୧ ତାରିଖରେ ହେବାକୁ ଥିବା ମହାଶିବରାତ୍ରୀ ଓ ଜାଗରଯାତ୍ରା ପ୍ରସ୍ତୁତି ନିମନ୍ତେ ରବିବାର ଜିଲାପାଳ ସରୋଜ କୁମାର ସେଠୀଙ୍କ ଅଧ୍ୟକ୍ଷତାରେ ଏକ ସମୀକ୍ଷା ବୈଠକ ଅନୁଷ୍ଠିତ ହୋଇଛି। ଜାଗର ଯାତ୍ରାକୁ ୬୦ବର୍ଷରୁ ଊର୍ଦ୍ଧ୍ୱ ବୟସ୍କ ଓ ୧୦ ବର୍ଷରୁ କମ୍ ବୟସ୍କ ପିଲାଙ୍କୁ ଆସିବାକୁ ପ୍ରଶାସନ ପକ୍ଷରୁ ବାରଣ କରାଯାଇଛି। ସେହିପରି ଜିଲା ବାହାର ଶ୍ରଦ୍ଧାଳୁଙ୍କୁ ପୀଠକୁ ବାରଣ କରାଯାଇଛି। କେବଳ ଜିଲାବାସୀ ଯେଉଁମାନେ କୋଭିଡର ଡବଲ ଡୋଜ୍ ଟିକା ନେଇଥିବେ ସେମାନେ ଜାଗର ଯାତ୍ରାକୁ ଆସିପାରିବେ। ମାସ୍କ ପରିଧାନକୁ ବାଧ୍ୟତାମୂଳକ କରାଯିବା ସହ ସାମାଜିକ ଦୂରତ୍ୱ ଅନୁପାଳନକୁ ଗୁରୁତ୍ୱ ଦିଆଯିବ। କେବଳ ସରକାରୀ କାର୍ଯ୍ୟରେ ନିୟୋଜିତ ଓ ଅନୁମତିପ୍ରାପ୍ତ ଯାନବାହାନକୁ ଛାଡି ସାଧାରଣ ଲୋକଙ୍କ କୌଣସି ଯାନବାହାନ ପୀଠ ଉପରକୁ ଯିବା ବାରଣ କରାଯାଇଛି। ଚା, ଜଳଖିଆ, ଖାଦ୍ୟ ଆଦି ଦୋକାନ ବ୍ୟବସାୟକୁ ଛାଡି ଅନ୍ୟ ବ୍ୟବସାୟକୁ ବାରଣ କରାଯାଇଛି। ମନ୍ଦିର ପରିସରକୁ ପରିସ୍କାର ପରିଚ୍ଛନ୍ନ ସହିତ ନିୟମିତ ବିଶୋଧନ ଉପରେ ବିଶେଷ ଧ୍ୟାନ ଦିଆଯାଇଛି। ଝରଣା ଜଳ ବିଶୋଧନ, ଅସ୍ଥାୟୀ ପରିଶ୍ରାଗାର ସ୍ଥାପନ, ଆଲୋକ ବ୍ୟବସ୍ଥା, ଆଶୁ ଚିକିତ୍ସା, ଟିକାକରଣ, ଥର୍ମାଲ ଟେଷ୍ଟିଂ, ସ୍ବେଚ୍ଛାସେବୀଙ୍କ ନିୟୋଜନ, ଶୃଙ୍ଖଳିତ ଦର୍ଶନ ବ୍ୟବସ୍ଥା ଆଦି ସମସ୍ତ ପ୍ରସ୍ତୁତି ସମ୍ପର୍କରେ ଜିଲାପାଳ ଉପସ୍ଥିତ ଅଧିକାରୀମାନଙ୍କ ସହ ଆଲୋଚନା କରିଥିଲେ। ଏସ୍ପି ଏଲ ଦିବ୍ୟା ଭି, ଜିଲା ମୁଖ୍ୟ ଚିକିତ୍ସାଧିକାରୀ ଡା. ଅଶୋକ କୁମାର ଦାଶ, ଗ୍ରାମ୍ୟ ଜଳଯୋଗାଣ ଓ ପରିମଳ ବିଭାଗର ନିର୍ବାହୀ ଯନ୍ତ୍ରୀ ସୁରେନ୍ଦ୍ର କୁମାର ବେହେରା, ପୂର୍ତବିଭାଗ ଅଧିକ୍ଷଣ ଯନ୍ତ୍ରୀ ମନୋରଞ୍ଜନ ବିଶ୍ୱାଳ, ଜିଲା ରେଡକ୍ରସ ଶାଖା ଉପସଭାପତି ବିରଞ୍ଚି ନାରାୟଣ ପାଣି, ସେବାୟତ ନିରଞ୍ଜନ ମହାପାତ୍ର ପ୍ରମୁଖ ଉପସ୍ଥିତ ଥିଲେ।