ୱାଶିଂଟନ,୧୮ ।୧: କରୋନାର ପ୍ରଭାବ ଶିଶୁଙ୍କ ଉପରେ ବେଶୀ ରହିବ ନାହିଁ । ଏବେ ଏହାର ବିପରିତ ପରିଣାମ ଆମେରିକାରେ ଦେଖିବାକୁ ମିଳିଲାଣି । ଏବେ ଶିଶୁଙ୍କ ପାଇଁ କରୋନା ସବୁଠାରୁ ବଡ ଶତ୍ରୁ ପାଲଟିଛି । ଯାହା ସାରା ବିଶ୍ୱ ପାଇଁ ବିପଦ ବୋଲି କୁହାଯାଉଛି । ୟୁନାଇଟେଡ ଷ୍ଟେଟ ସେଣ୍ଟର ଫର ଡିଜିଜ କଣ୍ଟ୍ରୋଲ ଆଣ୍ଡ ପ୍ରିଭେନଶନ(ସିଡିସି)ର ରିପୋର୍ଟ ଅନୁଯାୟୀ ଆମେରିକାରେ କରୋନା ମହାମାରୀ ଆରମ୍ଭ ହେବା ପରେ ଏବେ ଶିଶୁମାନେ ସବୁଠାରୁ ଅଧିକ ପ୍ରଭାବିତ ହେଉଛନ୍ତି ।
ଜଟିଳ କରୋନା ସଂକ୍ରମଣକୁ ନେଇ ପ୍ରତିଦିନ ୧୭ରୁ କମ୍ ବର୍ଷ ବୟସର ପ୍ରାୟ ୮୯୩ ଶିଶୁ ହସ୍ପିଟାଲରେ ଭର୍ତ୍ତି ହେଉଛନ୍ତି । ସିଡିସିର ରିପୋର୍ଟ କହୁଛି ୧ ଅଗଷ୍ଟ ୨୦୨୦ରୁ ୧୩ ଜାନୁୟାରୀ ୨୦୨୨ ପର୍ଯ୍ୟନ୍ତ ୧୭ ବର୍ଷରୁ କମ୍ ବୟସର ପ୍ରାୟ ୯୦,୦୦୦ରୁ ଅଧିକ ଶିଶୁ କରୋନା ମହାମାରୀ ଯୋଗୁ ହସ୍ପିଟାଲରେ ଭର୍ତ୍ତି ହୋଇଛନ୍ତି । ଏମାନଙ୍କ ମଧ୍ୟରେ ସବୁଠାରୁ ଅଧିକ ହେଉଛନ୍ତି ନବଜାତକଠାରୁ ୪ ବର୍ଷ ବୟସର ଯେଉଁମାନଙ୍କର ଟିକାକରଣ ଆରମ୍ଭ ହୋଇନାହିଁ । ସିଡିସି ଆହୁରି ମଧ୍ୟ କହିଛି ଆଗାମୀ ଦିନରେ ଶିଶୁମାନେ ଅଧିକ ପରିମାଣରେ କରୋନାରେ ପୀଡ଼ିତ ହେବେ । ତେଣୁ ସେମାନଙ୍କ ଟିକାକରଣ ଉପରେ ଗୁରୁତ୍ୱ ଦିଆଯିବ ଉଚିତ ।
