ଯୋଡ଼ା,୧୧ା୫(ଡି.ଏନ୍.ଏ.): କେନ୍ଦୁଝର ଜିଲା ଯୋଡ଼ା ବ୍ଲକ୍ ବଡ଼ କାଳିମାଟି ପଞ୍ଚାୟତ ଅଧୀନରେ ଥିବା ପୀଢ଼ପୋଖରୀ ଗାଁ ସରକାରୀ ଅବହେଳାର ଶିକାର ହୋଇଛି। ଏହି ଗାଁର ଅଧିକାଂଶ ଲୋକ ଦାରିଦ୍ର୍ୟ ସୀମାରେଖା ମଧ୍ୟରେ କାଳାତିପାତ କରୁଛନ୍ତି। ବ୍ଲକ୍ଠାରୁ ସ୍ବଳ୍ପ ଦୂରରେ ଏହି ଗାଁ ଅବସ୍ଥିତ ଥିବା ବେଳେ ଗାଁକୁ ବିକାଶ ପହଞ୍ଚତ୍ପାରିନି। ମୌଳିକ ସୁବିଧାରୁ ବଞ୍ଚତ୍ତ ହେବା ସହ ଗ୍ରାମର ଲୋକେ ଅନାହାରରେ ଜୀବନ ବିତାଉଛନ୍ତି। ଗ୍ରାମବାସୀ ଭାତ ସହ କଅଁଳିଆ ପତ୍ର ଓ ଗଛମୂଳ ଖାଉଥିବା ଦେଖିବାକୁ ମିଳିଛି। ସୁଷମ ଖାଦ୍ୟ ଅଭାବରୁ ଗାଁର ଅନେକ ଶିଶୁ କୁପୋଷଣର ଶିକାର ହେଉଛନ୍ତି।
ପ୍ରକାଶ ଯେ, ପୀଢ଼ପୋଖରୀ ଗାଁ ଯୋଡ଼ା ମୁଖ୍ୟ ସହର ତଥା ବ୍ଲକ୍ କାର୍ଯ୍ୟାଳୟଠାରୁ ୨୫ କି.ମି. ଏବଂ ବଡ଼ କାଳିମାଟି ପଞ୍ଚାୟତଠାରୁ ମାତ୍ର ୮ କି.ମି. ଦୂରରେ ଅବସ୍ଥିତ। ଏଠାକାର ଅଧିବାସୀ ଆଦିବାସୀ ଶ୍ରେଣୀର। ଗ୍ରାମର ଅଳ୍ପ ଦୂରରେ ଦୁଇଟି ଖଣି କାର୍ଯ୍ୟକ୍ଷମ ରହିଥିଲେ ମଧ୍ୟ ଗ୍ରାମବାସୀଙ୍କୁ କୌଣସି ନିଯୁକ୍ତି ମିଳିନାହିଁ। ବିଭିନ୍ନ ସମୟରେ ଗଣମାଧ୍ୟମରେ ଗାଁର ସ୍ଥିତି ଓ ବସବାସ କରୁଥିବା ଲୋକଙ୍କ ଜୀବନଶୈଳୀକୁ ନେଇ ଖବର ପ୍ରକାଶ ପରେ କିଛି ଦିନ ହେବ ଡିଏମ୍ଏଫ୍ ପକ୍ଷରୁ ଗ୍ରାମରୁ ନୂତନ ରାସ୍ତା ନିର୍ମାଣ ପାଇଁ ଅନୁମୋଦନ ମିଳିଛି। ମାତ୍ର ସ୍ବାସ୍ଥ୍ୟ ଓ ଶିକ୍ଷା କ୍ଷେତ୍ରରେ ଗ୍ରାମ ଏବେ ବି ବହୁ ପଛରେ। ଖଣି ଦ୍ୱାରା ପ୍ରଭାବିତ ହେଉଥିଲେ ବି ମୌଳିକ ସୁବିଧାରୁ ବଞ୍ଚତ୍ତ ରହିଛନ୍ତି। ସରକାରୀ ଯୋଜନାରେ ପାଉଥିବା ଚାଉଳ ହିଁ ତାଙ୍କର ଅଧା ମାସର ଆହାର ସାଜିଛି। ରୋଜଗାର କିଛି ନ ଥିବାରୁ ଭାତ ସାଙ୍ଗକୁ ଜଙ୍ଗଲୀ ଶାଗ(ପତ୍ର), ମୂଳ ଆହାର ଭାବେ ଗ୍ରହଣ କରୁଛନ୍ତି। ମା’ମାନେ ପୁଷ୍ଟିକର ଖାଦ୍ୟ ନ ପାଇବା ଦ୍ୱାରା ଜନ୍ମିତ ଶିଶୁମାନେ ମୁଖ୍ୟତଃ ରୁଗ୍ଣ ହେଉଥିବା ଦେଖିବାକୁ ମିଳୁଛି। ଫଳରେ ଗ୍ରାମର ଶିଶୁମାନେ କୁପୋଷଣର ଶିକାର ହେଉଛନ୍ତି। ଉତ୍ତମ ଓ ସୁଷମ ଖାଦ୍ୟ ନ ପାଇବା ଦ୍ୱାରା ଶିଶୁମାନଙ୍କର ଶାରୀରିକ ଓ ମାନସିକ ବିକାଶ ହୋଇପାରୁନାହିଁ। କିଛିଦିନ ପୂର୍ବେ ଯୋଡ଼ା ଖଣି ଅଞ୍ଚଳର ଶିଶୁମାନଙ୍କ ଅପପୁଷ୍ଟିର ଶିକାରକୁ ନେଇ ଖବର ପ୍ରସାରଣ ହୋଇଥିଲା। ପରେ ପ୍ରଶାସନ ପକ୍ଷରୁ ଅପପୁଷ୍ଟିର ଶିକାର ଶିଶୁମାନଙ୍କୁ ଚିହ୍ନଟ କରାଯାଇ ବଡ଼ବିଲସ୍ଥିତ ପୁଷ୍ଟି ସାଧନକେନ୍ଦ୍ରରେ ରଖାଯାଇଥିଲା। ପୁନର୍ବାର ଯୋଡ଼ା ବ୍ଲକ୍ ଅଧୀନ ପୀଢ଼ପୋଖରୀରେ ଅନୁରୂପ ଘଟଣା ଦେଖିବାକୁ ମିଳିଛି। ଏ ସଂକ୍ରାନ୍ତରେ ଯୋଡ଼ା ବ୍ଲକ୍ ସିଡିପିଓ ସୁକାନ୍ତି ପାତ୍ର କହିଛନ୍ତି, ଖୁବ୍ଶୀଘ୍ର ସେ ଅଞ୍ଚଳକୁ ଯାଇ ଯାଞ୍ଚ କରିବେ। କୁପୋଷଣର ଶିକାର ହୋଇଥିବା ଶିଶୁମାନଙ୍କୁ ଚିହ୍ନଟ କରାଯାଇ ସେମାନଙ୍କ ନିମନ୍ତେ ବ୍ୟବସ୍ଥା କରାଯିବ।
