ନୂଆପଡ଼ା ଅଫିସ,୧୪।୧୧: ନୂଆପଡା ଜିଲା କୋମନା ବ୍ଲକ ଅନ୍ତର୍ଗତ ସିଲଭା ପଞ୍ଚାୟତ ପଟପରପାଲି ଗାଁର ମହୁଲପଡାବାସୀ ଦୀର୍ଘ ବର୍ଷ ପରେ ମଧ୍ୟ ମୌଳିକ ସୁବିଧାରୁ ବଞ୍ଚତ୍ତ ହୋଇଛନ୍ତି। ମହୁଲପଡାରେ ୮ ପରିବାରର ୫୦ରୁ ଊର୍ଦ୍ଧ୍ୱ ସଦସ୍ୟ ରହିଛନ୍ତି। ସେମାନଙ୍କ ସୁବିଧା କହିଲେ କେବଳ ରାଶନ କାର୍ଡକୁ ଛାଡି ଦେଲେ ଅନ୍ୟ କୌଣସି ସୁବିଧାନାହିଁ। ପଡାକୁ ଯିବା ପାଇଁ ଭଲ ରାସ୍ତାଟିଏ ନାହିଁ। ପାଣିର ଅସୁବିଧା ହେତୁ ବନ୍ଧ, ମୁଡା କିମ୍ବା ଚହଲା ପାଣି ବ୍ୟବହାର କରି ବିଭିନ୍ନ ରୋଗର ଶିକାର ହେଉଛନ୍ତି। ଖରା ଦିନେ ସେହି ବନ୍ଧ, ମୁଡା କିମ୍ବା ଚହଲା ଶୁଖି ଗଲେ ବହୁତ ଅସୁବିଧାର ସମ୍ମୁଖିନ ହେଉଛନ୍ତି। ୨ରୁ ୩ କି.ମି. ରାସ୍ତା ଯିବା ପରେ ପାଣି ମିଳିଥାଏ। ପଡାରେ ବିଦ୍ୟୁତିକରଣ ହୋଇ ନ ଥିବାରୁ ଜଙ୍ଗଲ ଭିତରେ ଅନ୍ଧାରରେ ଦିନ ବିତାଉଛନ୍ତି। ପଡା ପାଖରେ ଲାଗିି ଭାଲୁଡୋଙ୍ଗରୀ ଜଙ୍ଗଲ ରହିଥିବାରୁ ବାଘ, ଭାଲୁ, ବାର୍ହା ତଥା ହିସତ୍ଜନ୍ତୁର ଭୟ ରହିଛି। ବର୍ତ୍ତମାନ କିରୋସିନ ମିଳୁ ନ ଥିବାରୁ ଅନ୍ଧାରରେ କିପରି ଜୀବନ ବିତାଉଛନ୍ତି ସହଜେ ଅନୁମେୟ। ପିଲାଛୁଆମାନଙ୍କ ପାଠପଢା ପ୍ରତି ବ୍ୟାହତ ସୃଷ୍ଟି ହେଉଛି। ପଡାବାସୀ ବର୍ତ୍ତମାନ ସୁଦ୍ଧା ପ୍ରଧାନମନ୍ତ୍ରୀ ଆବାସ କିମ୍ବା ବିଜୁ ପକ୍କା ଘର ପାଇ ନ ଥିବାରୁ କିଏ ଭଙ୍ଗା ଦଦରା ଘରେ ରହୁଛି ତ କିଏ ପାଇଖାନାକୁ ରୋଷେଇ ଘର କରି ରହୁନ୍ତି। ପ୍ରାଥମିକ ବିଦ୍ୟାଳୟ କଥା ଦୁରେ ଥାଉ ଅଙ୍ଗନୱାଡି କେନ୍ଦ୍ର ନ ଥିବାରୁ ମହୁଲପଡାଠାରୁ ପଟପରପାଲି ୨ କି.ମି., ଠାକୁରପାଲି ୨ କି.ମି., ଲଖନା ୩ କି.ମି., ଖଜୁରବାହାଲ ୪ କି.ମି. ହେଉଥିବାରୁ କୋମଳମତି ଶିଶୁମାନେ ଅଙ୍ଗନୱାଡି କେନ୍ଦ୍ରକୁ ଯାଇପାରୁନାହାନ୍ତି। ଫଳରେ ପୁଷ୍ଟିକର ଖାଦ୍ୟ ଓ ପ୍ରାକ୍ ଶିକ୍ଷାରୁ ବଞ୍ଚତ୍ତ ହେଉଛନ୍ତି। ଆଦିବାସୀ ଅଧ୍ୟୁଷିତ ଦାଦନ ପ୍ରବଣ ଉପାନ୍ତ ଅଞ୍ଚଳ ହୋଇଥିଲେ ମଧ୍ୟ କାହାର ଦୃଷ୍ଟି ପଡୁନାହିଁ। ଏହି ଅସୁବିଧା ବିଷୟରେ ପଞ୍ଚାୟତଠାରୁ ଆରମ୍ଭ କରି ବ୍ଲକ ଓ ଜିଲା ପର୍ଯ୍ୟନ୍ତ ଯାଇ ଗୁହାରି କରି ସାରୁଲେଣି। ହେଲେ କାହାର ଦୃଷ୍ଟି ପଡୁନାହିଁ। ନିର୍ବାଚନ ସମୟରେ ଅନେକ ନେତା ଆସି ପ୍ରତିଶ୍ରୁତି ଦେଇ ଯାଆନ୍ତି, ଭୋଟ ସରିଗଲେ ଆଉ କାହାର ଦେଖାମିଳେ ନାହିଁ। ଏ ସମ୍ପର୍କରେ କୋମନା ବିଡିଓ ସୁଶାନ୍ତ କୁମାର ରଣାଙ୍କୁ ପଚାରିବାରୁ ଗାଁକୁ ଯାଇ କେଉଁ କେଉଁ ସମସ୍ୟା ଅଛି, ତଦନ୍ତ କରି ସମସ୍ୟା ସମାଧାନ କରାଯିବ ବୋଲି କହିଥିଲେ। ସମସ୍ୟା ପୁରଣ ନ ହେଲେ ଆଗାମୀ ଦିନରେ ରାଜରାସ୍ତାକୁ ଓହ୍ଲାଇବୁ ବୋଲି ପିଲସିଂ ଶବର, ରୁପସିଂ ଶବର, ସୁନତାନ ଶବର, ଚବନ ଶବର, ଦିବାକର ଶବର, ଚନ୍ଦବ ଶବର, ଉଗ୍ରେସନ ଶବର, ଭୁମରାଜ ଶବର, ଭିତେଶ୍ୱର ଶବର, ଲକ୍ଷ୍ମୀ ଶବର, ଦୟନି ଶବର, ଫାଲଗୁନି ଶବର, ଭଗବତୀ ଶବର, ସୁକ ଶବର, ଆସମତୀ ଶବର, ସୁବିଧା ଶବର, ସରଧା ଶବର ପ୍ରମୁଖ ଚେତାବନୀ ଦେଇଛନ୍ତି।