ପଦ୍ମପୁର,୨୫ା୫(ଡି.ଏନ.ଏ.) ଶୈକ୍ଷିକ ବିକାଶ ପାଇଁ ୫-ଟି ରୂପାନ୍ତରଣ ଯୋଜନାରେ ବିଦ୍ୟାଳୟ ପିଛା ୬୦ରୁ ୭୦ ଲକ୍ଷ ଟଙ୍କା ଖର୍ଚ୍ଚ ହେଉଛି। ପିଲା ମାନଙ୍କର ପାଠପଢ଼ା ଉପକରଣ, ଭିତ୍ତିଭୂମିର ବିକାଶ ପାଇଁ ଚାଲିଛି ଜୋରଦାର ପ୍ରୟାସ। କିନ୍ତୁ ବାସ୍ତବ କ୍ଷେତ୍ରରେ ଏହାର ଓଲଟା ଚିତ୍ର ଦେଖିବାକୁ ମିଳିଛି ଭଦ୍ରକ ଜିଲା ରାଜଘରପୋଖରୀ ପଞ୍ଚାୟତ ଉଚ୍ଚବିଦ୍ୟାଳୟରେ। ୧୯୮୩ରୁ ସ୍ଥାପିତ ଏହି ଉଚ୍ଚ ବିଦ୍ୟାଳୟ ଏବେ ସମସ୍ୟା ଘେରରେ। ଗତ ଦୁଇ ବର୍ଷ ଧରି ଜଣେ ହିନ୍ଦୀ ଶିକ୍ଷକ ଓ ଖେଳ ଶିକ୍ଷକଙ୍କୁ ନେଇ ଚାଲିଛି ବିଦ୍ୟାଳୟ। ୧୦ମ ଶ୍ରେଣୀରେ ଚଳିତ ବର୍ଷ ୧୧୧ ଓ ୯ମ ଶ୍ରେଣୀରେ ୮୯ ଜଣ ପିଲା ପଢ଼ୁଛନ୍ତି। ପଞ୍ଚାୟତରେ ୫ ଶହରୁ ଊର୍ଦ୍ଧ୍ୱ ୯ମ, ୧୦ମ ଶ୍ରେଣୀର ଛାତ୍ର୍ରୀଛାତ୍ର ରହିଥିବା ବେଳେ କେତେକ ଛାତ୍ରୀଛାତ୍ର ଶିକ୍ଷକ ନ ଥିବାରୁ ଅନ୍ୟତ୍ର ପାଠ ପଢ଼ିବା ପାଇଁ ବିଦ୍ୟାଳୟ ପରିତ୍ୟାଗ କରିଛନ୍ତି। ଅନ୍ୟ ଛାତ୍ରୀଛାତ୍ରମାନେ ଦୂର ବିଦ୍ୟାଳୟକୁ ଯାଇ ନ ପାରି ବସ୍ତାନୀରେ ଡୋରି ବାନ୍ଧିଛନ୍ତି।
ସୂଚନା ଅନୁଯାୟୀ, ଶହେରୁ ଊର୍ଦ୍ଧ୍ୱ ଛାତ୍ରୀଛାତ୍ର ଅନ୍ୟତ୍ର ପଢ଼ିବା ପାଇଁ ଚାଲି ଯାଇଥିବା ବେଳେ ଶତାଧିକ ଛାତ୍ରୀଛାତ୍ର ପାଠ ପଢ଼ା ଛାଡ଼ିଛନ୍ତି। ପଞ୍ଚାୟତର ଏକମାତ୍ର ଉଚ୍ଚ ବିଦ୍ୟାଳୟ ଶିକ୍ଷକ ଅଭାବରୁ ଅଚଳାବସ୍ଥା ସୃଷ୍ଟି ହୋଇଛି। ଏ ସଂକ୍ରାନ୍ତରେ ସରପଞ୍ଚ ଅରୁଣ କୁମାର ମହାନ୍ତି ଜିଲା ଶିକ୍ଷାଧିକାରୀ କପିଳେନ୍ଦ୍ର ମିଶ୍ରଙ୍କଠାରେ ଲିଖିତ ଅଭିଯୋଗ କରିବା ସହ ଶିକ୍ଷକ ଯୋଗାଇ ଦେବାକୁ ଦାବି କରିଛନ୍ତି। ଏ ସମ୍ପର୍କରେ ଜିଲା ଶିକ୍ଷାଧିକାରୀ କୁହନ୍ତି, ବିଦ୍ୟାଳୟଟି ଏଡେଡ୍ ବିଦ୍ୟାଳୟ ହୋଇଥିବାରୁ କେବଳ ଅତିଥି ଶିକ୍ଷକଙ୍କୁ ଶିକ୍ଷାଦାନ କରିବା ପାଇଁ ନିୟୋଜିତ କରାଯାଇପାରିବ। ଏଥିପ୍ରତି ସେ ପଦକ୍ଷେପ ନେବେ। ଛାତ୍ରୀଛାତ୍ର ମାନଙ୍କର ପାଠପଢ଼ାରେ ଶିକ୍ଷକ ଅଭାବରୁ ସମସ୍ୟା ଉପୁଜିଥିବା ବେଳେ ଜିଲା ଶିକ୍ଷାଧିକାରୀ ଛାତ୍ରୀଛାତ୍ରଙ୍କର ଭବିଷ୍ୟତ ପାଇଁ ଚିନ୍ତା କରି ତୁରନ୍ତ ଶିକ୍ଷକ ଯୋଗାଇ ଦେବା ପାଇଁ ଭାରପ୍ରାପ୍ତ ପ୍ରଧାନ ଶିକ୍ଷକ ଘନଶ୍ୟାମ ବିଶ୍ୱାଳ ନିବେଦନ କରିଛନ୍ତି।