ନୂଆଦିଲ୍ଲୀ,୨୫।୧୨: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶନିବାର ରାତିରେ ଦେଶବାସୀଙ୍କୁ ଉଦ୍ବୋଧନ ଦେଇ ବଡ଼ ଘୋଷଣା କରିଛନ୍ତି। ଜାନୁୟାରୀ ୩ ତାରିଖରୁ ଦେଶରେ ୧୫ରୁ ୧୮ ବର୍ଷ ବୟସର ପିଲାଙ୍କ ଟିକାକରଣ ଆରମ୍ଭ ହେବ ବୋଲି ପ୍ରଧାନମନ୍ତ୍ରୀ କହିଛନ୍ତି। ଏନେଇ ସରକାରୀସ୍ତରରେ ପ୍ରସ୍ତୁତି ଶେଷ ହୋଇଛି।
ସେହିପରି ଜାନୁଆରୀ ୧୦ତାରିଖରୁ ୬୦ ବର୍ଷରୁ ଅଧିକ ବୟସ୍କ ଓ ବହୁବିଧି ରୋଗରେ ଆକ୍ରାନ୍ତ ଲୋକଙ୍କୁ ବୁଷ୍ଟର ଡୋଜ ଦିଆଯିବ। ଡାକ୍ତରଙ୍କ ପରାମର୍ଶ କ୍ରମେ ଟିକାର ବୁଷ୍ଟର ଡୋଜ ନେଇପାରିବେ ବୋଲି ପ୍ରାଧନାମନ୍ତ୍ରୀ କହିଛନ୍ତି। ଏପରିକି କରୋନା ଯୋଦ୍ଧାଙ୍କୁ ମଧ୍ୟ ଟିକାର ବୁଷ୍ଟର ଡୋଜ ଦିଆଯିବ।
ସାରା ବିଶ୍ୱ ନୂଆବର୍ଷକୁ ସ୍ବାଗତ କରିବାକୁ ଯାଉଥିବାବେଳେ ଭାରତ ସମେତ ବିଭିନ୍ନ ଦେଶରେ କରୋନା ଭୂତାଣୁର ନୂଆ ଭାରିଆଣ୍ଟ ଓମିକ୍ରନ୍ ସଂକ୍ରମଣକୁ ନେଇ ଚିନ୍ତା ବଢ଼ିଛି। ତେବେ ଏଥିପାଇଁ ଆତଙ୍କିତ ହେବାର କାରଣ ନାହିଁ ବୋଲି ପ୍ରଧାନମନ୍ତ୍ରୀ ଦେଶବାସୀଙ୍କୁ କହିଛନ୍ତି। ଏବେ ସତର୍କ ହେବାର ସମୟ ଆସିଛି। କରୋନା ମହାମାରୀ ଏଯାଏ ଯାଇନି। ତେଣୁ ସତର୍କ ରହିବା, ସାବଧାନ ହେବା ସହ ମାସ୍କ ପିନ୍ଧିବା ଲାଗି ପ୍ରଧାନମନ୍ତ୍ରୀ ପରାମର୍ଶ ଦେଇଛନ୍ତି। ଦେଶରେ ୧.୪୦ ଲକ୍ଷ ଆଇସିୟୁ ବେଡ୍ ଏବଂ ୫ ଲକ୍ଷ ଅକ୍ସିଜେନ୍ ସମର୍ଥତ୍ତ ବେଡ୍ ଉପଲବ୍ଧ ରହିଛି। ବର୍ତ୍ତମାନ ସୁଦ୍ଧା ୯୦ ପ୍ରତିଶତ ଲୋକ କରୋନା ଟିକାର ପ୍ରଥମ ଡୋଜ୍ ନେଇଥିବାବେଳେ ୬୧ ପ୍ରତିଶତରୁ ଅଧିକ ଦୁଇଟି ଡୋଜ୍ ନେଇସାରିଲେଣି।