କେନ୍ଦୁଝର,୨୫ା୨(ନରେଶ ଚନ୍ଦ୍ର ପଟ୍ଟନାୟକ)କେନ୍ଦୁଝର ସଦର ବ୍ଲକ୍ ଅନ୍ତର୍ଗତ ଶିରିଶପାଳ ହାଇସ୍କୁଲରେ ପିଲା ଅଭାବରୁ ବନ୍ଦହେବା ଆଶଙ୍କା ଦେଖାଦେଇଛି। ଛାତ୍ରୀଛାତ୍ର ସବୁଦିନ ଆସୁ ନ ଥିବାରୁ ଅଧାଦିନ ସ୍କୁଲରେ ତାଲା ପଡ଼ୁଛି। ସରକାର ଅନେକ କୋଟି ଟଙ୍କା ଖର୍ଚ୍ଚକରି ବିଦ୍ୟାଳୟ ରୂପାନ୍ତରୀକରଣ କରିବା ସହ ଶିକ୍ଷାର ମାନ ବୃଦ୍ଧି କରିବାକୁ ପ୍ରୟାସ କରୁଛନ୍ତି। ଏଭଳି କ୍ଷେତ୍ରରେ ସ୍କୁଲକୁ ପିଲା ନ ଆସିବା ପରିତାପର ବିଷୟ ହୋଇଛି। ଜିଲା ମୁଖ୍ୟାଳୟଠାରୁ ମାତ୍ର ୭ କି.ମି. ଦୂରରେ ଏହି ଉଚ୍ଚ ବିଦ୍ୟାଳୟଟି ଥିଲେ ହେଁ ଏଥିପ୍ରତି କାହାର ଦୃଷ୍ଟି ପଡ଼ୁନାହିଁ।
ସୂଚନା ଅନୁଯାୟୀ, ସ୍କୁଲରେ ନବମ ଏବଂ ଦଶମ ଶ୍ରେଣୀରେ ୯୩ ଜଣ ଛାତ୍ରୀଛାତ୍ର ଅଧ୍ୟୟନ କରୁଛନ୍ତି। ୪୬ ଛାତ୍ରୀଛାତ୍ର ମାଟ୍ରିକ ପରୀକ୍ଷା ଦେଉଥିବାବେଳେ ନବମ ଶ୍ରେଣୀରେ ୪୭ ପାଠ ପଢୁଛନ୍ତି। ବିଦ୍ୟାଳୟରେ ୬ ଜଣ ଶିକ୍ଷକ ଅଛନ୍ତି। ପିଲାମାନେ ନିୟମିତ ସ୍କୁଲ ଆସୁ ନ ଥିବାରୁ ଶିକ୍ଷକ ବସି ବସି ଯାଉଛନ୍ତି। ଏଥିସହ ଅଧିକାଂଶ ଦିନ ସ୍କୁଲରେ ତାଲା ପଡୁଛି। ଏହାର ସୁଯୋଗ ନେଇ କେତେଜଣ ଶିକ୍ଷକ ମଧ୍ୟ ନିୟମିତ ଆସୁନାହାନ୍ତି। ତଦାରଖ ଅଭାବରୁ ଅବ୍ୟବସ୍ଥା ଦୀର୍ଘ ବର୍ଷ ହେବ ଚାଲି ଆସୁଛି। ଅନ୍ୟପକ୍ଷେ ନୂତନ ଅନୁଦାନପ୍ରାପ୍ତ ବିଦ୍ୟାଳୟକୁ ଶତ ପ୍ରତିଶତ ଅନୁଦାନ ଦେବା କ୍ଷେତ୍ରରେ ସରକାରୀ ନିୟମକୁ ଏଠାରେ ଦଳିମକଚି ଅନୁକମ୍ପା ପ୍ରଦର୍ଶନ କରାଯାଇଥିବା ଗ୍ରାମବାସୀ ଅଭିଯୋଗ କରିଛନ୍ତି। ବିଶେଷତଃ ବିଦ୍ୟାଳୟର ଗତ ୩ ବର୍ଷର ମାଟ୍ରିକ ପରୀକ୍ଷା ଫଳାଫଳ ୫୦ ପ୍ରତିଶତରୁ ଅଧିକ, ସହରାଞ୍ଚଳରେ ୧.୫ ଏକର ଏବଂ ଗ୍ରାମାଞ୍ଚଳରେ ୩ ଏକର ସ୍କୁଲ ନାମରେ ପଟ୍ଟାଭୁକ୍ତ ଜମି ଏବଂ ଅନ୍ୟ କିଛି ସର୍ତ୍ତପୂରଣ ହେଲେ ଶତ ପ୍ରତିଶତ ଅନୁଦାନ ମିଳିଥାଏ। ମାତ୍ର ଏସବୁ ଠିକ୍ ଭାବରେ ଯାଞ୍ଚ କରା ନ ଯାଇ ଜିଲା ଶିକ୍ଷା ଅଧିକାରୀଙ୍କ କାର୍ଯ୍ୟାଳୟରୁ ଉକ୍ତ ସ୍କୁଲ ସମେତ ଜିଲାର ଅନେକ ବିଦ୍ୟାଳୟକୁ ଶତ ପ୍ରତିଶତ ଅନୁଦାନ ମଞ୍ଜୁର କରାଯାଇଥିବା ଅଭିଯୋଗ ହୋଇଛି। ଜିଲାରେ ୧୬୪ ବ୍ଲକ୍ ଗ୍ରାଣ୍ଟ ବା ନୂତନ ଅନୁଦାନପ୍ରାପ୍ତ ବିଦ୍ୟାଳୟ ରହିଛି। ସେଥି ମଧ୍ୟରୁ ୧୨୦ ବିଦ୍ୟାଳୟ ଶତ ପ୍ରତିଶତ ଅନୁଦାନ ପୂର୍ବରୁ ପାଇସାରିଛି। ଗତ ଅକ୍ଟୋବରରେ ୩୩ ଉଚ୍ଚ ବିଦ୍ୟାଳୟକୁ ଶତ ପ୍ରତିଶତ ଅନୁଦାନ ପ୍ରଦାନ କରାଯାଇଛି। ଏହି ଉଚ୍ଚ ବିଦ୍ୟାଳୟ ମଧ୍ୟରୁ ଅଧିକାଂଶ ସରକାରୀ ସର୍ତ୍ତପୂରଣ କରୁନାହାନ୍ତି। ବିଦ୍ୟାଳୟ ସମ୍ପାଦକ କିମ୍ବା ବିଦ୍ୟାଳୟ ନାମରେ ଗୋଟିଏ ସ୍ଥାନରେ ପଟ୍ଟା ଜମି ରହିଥିବାବେଳେ ଅନ୍ୟ ଗୋଟିଏ ସ୍ଥାନରେ ବିଦ୍ୟାଳୟ ରହିଥିବା ଅଭିଯୋଗ ହେଉଛି। ଶିରିଶପାଳ ହାଇସ୍କୁଲ ପ୍ରଧାନ ଶିକ୍ଷକ ଅନାଦି ଚରଣ ସାହୁ କହିଛନ୍ତି, ଘର ଘର ବୁଲି ଓ ଅଭିଭାବକମାନଙ୍କ ସହ ଆଲୋଚନାକରି ପିଲା ବିଦ୍ୟାଳୟକୁ ପାଠ ପଢ଼ିବାକୁ ଆସିବାକୁ ଉଦ୍ୟମ କରୁଛୁ। ଗରିବ ଶ୍ରେଣୀର ପିଲା ନିୟମିତ ଆସୁନାହାନ୍ତି। ଏ ନେଇ ଜିଲା ଶିକ୍ଷା ଅଧିକାରୀ ଗୌରମଣି ନାୟକଙ୍କୁ ଯୋଗାଯୋଗ କରାଯାଇଥିଲେ ହେଁ ସମ୍ଭବ ହୋଇନାହିଁ। ଅତିରିକ୍ତ ଜିଲା ଶିକ୍ଷା ଅଧିକାରୀ ଜଗବନ୍ଧୁ ସାହୁ କହିଛନ୍ତି, ଅଭିଯୋଗଗୁଡ଼ିକର ଯାଞ୍ଚକରି ପଦକ୍ଷେପ ନିଆଯିବ।