ଜୟପୁର,୨୪।୬: ସ୍କୁଲ ପିଲାଙ୍କ ପାଇଁ ରାଜସ୍ଥାନ ସରକାର ଶୁକ୍ରବାର ଏକ ବଡ଼ ଘୋଷଣା କରିଛନ୍ତି। ଏଣିକି ସରକାରୀ ସ୍କୁଲର ପିଲାଙ୍କୁ ସପ୍ତାହକୁ ୨ଥର କ୍ଷୀର ଦିଆଯିବ ବୋଲି ସରକାରଙ୍କ ପକ୍ଷରୁ କୁହାଯାଇଛି। ପୂର୍ବରୁ ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲଟ ବଜେଟରେ ଘୋଷଣା କରିଥିଲେ ଯେ, ‘ମୁଖ୍ୟମନ୍ତ୍ରୀ ବାଲ ଗୋପାଳ ଯୋଜନା’ ଅଧୀନରେ ପ୍ରଥମରୁ ୮ମ ଶ୍ରେଣୀର ପିଲାମାନଙ୍କୁ ସପ୍ତାହକୁ ଦୁଇଥର କ୍ଷୀର ଦିଆଯିବ। ତେବେ ଶୁକ୍ରବାର ଏଜେନ୍ସି ପକ୍ଷରୁ ଜାରି କରାଯାଇଥିବା ସୂଚନା ଅନୁସାରେ ଏହା ବର୍ତ୍ତମାନ ସରକାରୀ ବିଦ୍ୟାଳୟ, ମଦ୍ରାସା ଏବଂ ମଧ୍ୟାହ୍ନ ଭୋଜନ ଯୋଜନା ସହିତ ଜଡିତ ସ୍ବତନ୍ତ୍ର ତାଲିମ କେନ୍ଦ୍ରରେ କାର୍ଯ୍ୟକାରୀ ହେବ। ଏହା ଅନୁଯାୟୀ ପିଲାମାନଙ୍କର ବୟସ ଅନୁସାରେ କ୍ଷୀରର ପରିମାଣ ମଧ୍ୟ ସ୍ଥିର କରାଯାଇଛି। ଅତିରିକ୍ତ ମୁଖ୍ୟ ସଚିବ (ଶିକ୍ଷା) ପୱନ କୁମାର ଗୋଏଲ କହିଛନ୍ତି, ଏହି ଯୋଜନା ଅଧୀନରେ ସରକାରୀ ବିଦ୍ୟାଳୟରେ ପଢ଼ୁଥିବା ପ୍ରାୟ ୬୯.୨୧ ଲକ୍ଷ ପିଲାଙ୍କୁ ମଙ୍ଗଳବାର ଏବଂ ଶୁକ୍ରବାର ମିଲ୍କ ପାଉଡରରୁ ପ୍ରସ୍ତୁତ କ୍ଷୀର ଯୋଗାଇ ଦିଆଯିବ। ଯଦି ଏହି ଦିନଗୁଡିକ ଛୁଟିଦିନ ରୁହେ, ତେବେ ପରବର୍ତ୍ତୀ ସମୟରେ କ୍ଷୀର ଉପଲବ୍ଧ କରାଯିବ। ସୂଚନା ମୁତାବକ, ପ୍ରଥମରୁ ପଞ୍ଚମ ଶ୍ରେଣୀର ପିଲାମାନଙ୍କୁ ୧୫୦ ମିଲିଲିଟର କ୍ଷୀର ପାଇବେ ଏବଂ ଷଷ୍ଠରୁ ଅଷ୍ଟମ ଶ୍ରେଣୀର ପିଲାମାନେ ୨୦୦ ମିଲିଲିଟର କ୍ଷୀର ପାଇବେ। ସଚିବ ଗୋୟଲ କହିଛନ୍ତି ଯେ, ରାଜସ୍ଥାନ ସମବାୟ ଦୁଗ୍ଧ ଫେଡେରେଶନରୁ ପାଉଡର କ୍ଷୀର କ୍ରୟ କରାଯିବ। ପିଲାମାନଙ୍କୁ ପର୍ଯ୍ୟାପ୍ତ ପୁଷ୍ଟିକର ଖାଦ୍ୟ ଯୋଗାଇବା ପାଇଁ ମିଡ ଡେ’ ଭୋଜନ ଅଧୀନରେ କ୍ଷୀର ବଣ୍ଟନ କରିବାର ଏହି ଯୋଜନା ଆରମ୍ଭ ହୋଇଛି।