ସାରସକଣା,୧୨।୮(ଡି.ଏନ୍.ଏ.): ସରକାର ଗର୍ଭବତୀ, ପ୍ରସୂତି ଓ ଶିଶୁମାନଙ୍କୁ ସମନ୍ବିତ ଶିଶୁ ବିକାଶ ଯୋଜନା ମାଧ୍ୟମରେ ଛତୁଆ, ଅଣ୍ଡା, ସୁଜି ଆଦି ପୁଷ୍ଟିସାର ଯୁକ୍ତ ଖାଦ୍ୟ ଯୋଗାଉଛନ୍ତି। ତେବେ ମୟୂରଭଞ୍ଜ ଜିଲା ଉପାନ୍ତ ସାରସକଣା ବ୍ଲକ ଅଞ୍ଚଳରେ ଏହାର ବ୍ୟତିକ୍ରମ ଦେଖିବାକୁ ମିଳିଛି। ସୁଜି ନାଁରେ ଶିଶୁମାନଙ୍କୁ ଦିଆଯାଉଛି ପୋକ ସାଲୁବାଲୁ ଅଖାଦ୍ୟ। ପୁଷ୍ଟିକର କୁହାଯାଉଥିବା ସେହି ଖାଦ୍ୟ ଏବେ ଶିଶୁମାନଙ୍କ ପାଇଁ ହାନିକାରକ ହେବା ଆଶଙ୍କା ପ୍ରକାଶ ପାଇଛି।
ପ୍ରକାଶ ଥାଉକି, ସାରସକଣା ବ୍ଲକ ଜାଲଦା ପଞ୍ଚାୟତ ଜାଲଦା ଅଙ୍ଗନଓ୍ବାଡି କେନ୍ଦ୍ର ପକ୍ଷରୁ ମିଳିଥିବା ଅଗଷ୍ଟ ମାସର ଖାଦ୍ୟରେ ପୋକ ସାଲୁବାଲୁ ହେଉଥିବା ଦେଖିବାକୁ ମିଳିଛି। ଏହି ଖାଦ୍ୟର ପଲିଥିନ ଉପରେ ୬ (ଜୁନ ମାସ) ଲେଖା ଥିଲା ବେଳେ ଏହାକୁ ବଦଳାଇବା ପାଇଁ ପୁଣି ତାହା ଉପରେ ଆଉ ଥରେ ୭(ଜୁଲାଇ ମାସ) ଲେଖା ହୋଇଛି। ଏ ସଂକ୍ରାନ୍ତରେ ସିଡିପିଓ ଭାନୁମତୀ ବେହେରାଙ୍କୁ ପଚାରିବାରୁ ଅଭିଯୋଗ ମିଳିଛି ଓ ଖାଦ୍ୟ ବଣ୍ଟନ ଦାୟିତ୍ୱ ନେଇଥିବା ଏସ୍ଏଚ୍ଜି ଗ୍ରୁପ୍ଠାରୁ ତଥ୍ୟ ମଗାଯାଇଥିବା କହିଛନ୍ତି। ଏସ୍ଏଚ୍ଜି ଗ୍ରୁପ୍ ସଭାପତି କୁହନ୍ତି, ସୁଜି ଓ ଚିନିକୁ ମିଶାଇ ଜୁଲାଇ ୨୩ତାରିଖରେ ପ୍ୟାକିଂ ପରେ ୧ ତାରିଖରେ ବଣ୍ଟନ କରାଯାଇଥିଲା। ତେବେ କମ୍ ଦିନ ମଧ୍ୟରେ ସେଥିରେ ପୋକ ହେବା ଘଟଣାକୁ ସେ ଅସ୍ବୀକାର କରିଥିଲେ। ଜିଲା ପ୍ରଶାସନ ଏ ଦିଗରେ ପଦକ୍ଷେପ ଗ୍ରହଣ କରି ନିମ୍ନମାନର ଖାଦ୍ୟ ଯୋଗାଣ କରୁଥିବା ସଂସ୍ଥା ଏବଂ ଏଥିରେ ଜଡ଼ିତ ଅଧିକାରୀମାନଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଗ୍ରାମବାସୀ ଦାବି କରିଛନ୍ତି।