ଭୁବନେଶ୍ୱର,୨୨ା୭(ବ୍ୟୁରୋ): ଗାଁଗୁଡ଼ିକରେ ଟେଲିଫୋନ୍ ଟାୱାର ନ ଥିବାରୁ ବିଧାନସଭାରେ ଉଭୟ ଦଳର ସଦସ୍ୟମାନେ ଉଦ୍ବେଗ ପ୍ରକାଶ କରିଛନ୍ତି। ବର୍ତ୍ତମାନ ପ୍ରତ୍ୟେକ କାମ ଇଣ୍ଟରନେଟ୍ ଜରିଆରେ କରାଯାଉଛି। ଟେଲିଫୋନ ଟାଓ୍ବାର ନ ଥିବାରୁ ପିଲାମାନଙ୍କୁ ପାହାଡ଼ ଉପରକୁ ଯିବାକୁ ପଡୁଥିଲା। ଏବେ ଟେକ୍ନୋଲୋଜିର ସମୟ ହୋଇଥିବାରୁ ଅଧିକରୁ ଅଧିକ ଟେଲିଫୋନ ଟାୱାର ନିର୍ମାଣର ଆବଶ୍ୟକତା ରହିଛି। ଇଲେକ୍ଟ୍ରୋନିକ୍ସ ଓ ସୂଚନା ପ୍ରଯୁକ୍ତି ବିଦ୍ୟା ମନ୍ତ୍ରୀ ତୁଷାରକାନ୍ତି ବେହେରା କହିଛନ୍ତି ଯେ, ୩୦୯୩ ଗାଁରେ ୪୮୩ଟି ଟେଲିଫୋନ ଟାୱାର ନିର୍ମାଣ ପାଇଁ ନିଷ୍ପତ୍ତି ହୋଇଛି। ଏ ନେଇ କେନ୍ଦ୍ର ସରକାର ମଧ୍ୟ ଅନୁମତି ଦେଇଛନ୍ତି। ସେଥିରୁ ୧୫୮ ଟାୱାରର ନିର୍ମାଣ ଶେଷ ହୋଇଛି। ଅବଶିଷ୍ଟ ୩୨୫ଟି ଟାୱାର ୧୦ଟି ଜିଲାରେ ନିର୍ମାଣ ହେବ। ଏହାଛଡ଼ା ଆଉ ୧୦୦ ଟେଲିଫୋନ ଟାୱାର ସ୍ଥାପନ ପାଇଁ ପ୍ରସ୍ତାବ ରହିଛି। ସରକାରୀ କାର୍ଯ୍ୟାଳୟ ଉପରେ ମଧ୍ୟ ଟେଲିଫୋନ ଟାୱାର ନିର୍ମାଣ କରିବା ପାଇଁ ଯୋଜନା କରାଯାଉଛି।
ମୂଳ ପ୍ରଶ୍ନକର୍ତ୍ତା ବିଜେଡି ସଭ୍ୟ ରମେଶ ଚନ୍ଦ୍ର ବେହେରା ପଚାରିଥିଲେ, ଦଶପଲ୍ଲା ନିର୍ବାଚନମଣ୍ଡଳୀ ଅନ୍ତର୍ଗତ ନୂଆଗାଁ, ଗଣିଆ ଓ ଦଶପଲ୍ଲା ବ୍ଲକରେ କେତୋଟି ବିଏସ୍ଏନ୍ଏଲ ଓ ବେସରକାରୀ ସଂସ୍ଥାର ଟାଓ୍ବାର ସ୍ଥାପନ କରାଯାଇଛି। କେଉଁ ସ୍ଥାନରେ ଟାଓ୍ବାର ପ୍ରତିଷ୍ଠା ପାଇଁ କ’ଣ ବ୍ୟବସ୍ଥା କରାଯାଇଛି। ମନ୍ତ୍ରୀ କହିଲେ, ଗଣିଆ ବ୍ଲକର ଛାମୁଣ୍ଡିଆ ପଞ୍ଚାୟତରେ ଜିଓ ତରଫରୁ ଓ ଦଶପଲ୍ଲା ବ୍ଲକର ଚଢ଼େୟାପଲ୍ଲୀ, କଳସଖମଣ ଓ ଘୁଗୁଡିପଡ଼ା ପଞ୍ଚାୟତରେ ବିଏସ୍ଏନ୍ଏଲ୍ ଓ ଜିଓ ତରଫରୁ ମୋବାଇଲ ଟାଓ୍ବାର ସ୍ଥାପନ ଲାଗି ବ୍ୟବସ୍ଥା ହୋଇଥିଲା। ସେଥିରୁ ଚଢ଼େୟାପଲ୍ଲୀ, କଳସଖମଣ ଓ ଘୁଗୁଡିପଡ଼ା ପଞ୍ଚାୟତରେ ଟାଓ୍ବାର ସ୍ଥାପନ କରାଯାଇଛି। ବିଜେଡି ସଭ୍ୟ ନୃସିଂହ ସାହୁ, ଭାଜପା ସଭ୍ୟ ସନାତନ ବିଜୁଳି, ବିଜେଡି ସଭ୍ୟ ସତ୍ୟନାରାୟଣ ପ୍ରଧାନ ପ୍ରମୁଖ ମୋବାଇଲ ଟାଓ୍ବାର ନ ଥିବା ଗ୍ରାମରେ ଟାଓ୍ବାର ବସାଇବାକୁ ଦାବି କରିଥିଲେ। ମନ୍ତ୍ରୀ କହିଥିଲେ, ମୋବାଇଲ ଟାଓ୍ବାର ନିର୍ମାଣ କେନ୍ଦ୍ର ସରକାରଙ୍କ କ୍ଷମତା ପରିସରଭୁକ୍ତ। ମୋବାଇଲ ସେବା ସଂଯୋଗ ପାଇଁ ପ୍ରତି ୬ ମାସରେ ଥରେ ଏ ନେଇ ବୈଠକ ହେଉଛି। ନିକଟରେ କ୍ୟାବିନେଟ୍ରେ ଡିମ୍ଡ ଟୁ ବି ଆପ୍ରୁଭ୍କୁ ଅନୁମୋଦନ କରାଯାଇଛି। ସରକାରୀ କୋଠାରେ ଟାଓ୍ବାର ନିର୍ମାଣ ହେବ।