ଡା. ସମ୍ରାଟ କର
କରୋନା ପ୍ରକୋପ ପାଇଁ ପାଖାପାଖି ଦୁଇବର୍ଷ ପିଲାମାନେ ଘରେ ରହି ଅନ୍ଲାଇନରେ ପରୀକ୍ଷା ଦେଲେ। ତେବେ ଚଳିତ ବର୍ଷଠାରୁ ଅଫ୍ଲାଇନ ପରୀକ୍ଷା ଆରମ୍ଭ ହେବାକୁ ଯାଉଛି। ଏହିପରି ଏକ ଗୁରୁତ୍ୱପୂର୍ଣ୍ଣ ସମୟରେ ପିଲାମାନଙ୍କ ବ୍ରେନ ପାୱାର ବଢ଼ିବା ସହ ସେମାନଙ୍କୁ ପ୍ରେରଣା, ସହଯୋଗ ଓ ପ୍ରୋତ୍ସାହନ ଦେବା ପାଇଁ ଘରେ ମା’ବାପାଙ୍କଠାରୁ ପରିବାର ଲୋକଙ୍କ ଗୁରୁତ୍ୱପୂର୍ଣ୍ଣ ଭୂମିକା ରହିଛି। ବର୍ଷ ତମାମ ପାଠ ପଢ଼ିଥିବା ପିଲାଟି କିପରି ଚାପମୁକ୍ତ ହୋଇ ପଢ଼ିବ, ଏହା ସବୁଠାରୁ ଗୁରୁତ୍ୱପୂର୍ଣ୍ଣ କଥା। ଆସନ୍ତୁ ଏହାର ବିଭିନ୍ନ ଦିଗ ଉପରେ ଆଲୋକପାତ କରିବା। ପରୀକ୍ଷାରେ କେତେ ମାର୍କ ରଖୁଛି, ତାହା ତ ଗୁରୁତ୍ୱପୂର୍ଣ୍ଣ କଥା ନିଶ୍ଚୟ; କିନ୍ତୁ ଚାପ ଭିତରେ ରହି ପରୀକ୍ଷାକୁ ସାମ୍ନା କରିବା କଷ୍ଟକର ଏବଂ ଏହା ପିଲାପାଇଁ ଆଦୌ ଭଲ ନୁହେଁ।
ପିଲାଙ୍କ ସ୍ମରଣ ଶକ୍ତି ହ୍ରାସ ପଛରେ ଅଭିଭାବକ ବହୁ ପରିମାଣରେ ଦାୟୀ ଥାଆନ୍ତି। କ୍ୟାରିୟର ବିଶେଷଜ୍ଞଙ୍କ କହିବାନୁସାରେ, କେତେକ ଅଭିଭାବକ ପିଲାଙ୍କ ଉପରେ ଚାପ ପକାଇଥା’ନ୍ତି ଯେ ସେମାନଙ୍କୁ ଅଧିକ ପ୍ରତିଶତ ମାର୍କ ଆଣିବା ଦରକାର। ତେଣୁ ସେମାନେ ପାଠ ମନେରଖିବା ଅପେକ୍ଷା ଅଧିକ ପ୍ରତିଶତ ମାର୍କ ଉପରେ ବେଶି ଧ୍ୟାନ ଦେଇଥା’ନ୍ତି। ଏଥିପାଇଁ ଦିନସାରା ପରିଶ୍ରମ ବି କରିଥା’ନ୍ତି। ଏପରି କରିବା ପରିବର୍ତ୍ତେ ସେମାନେ ରିଭିଜନ ପ୍ରଣାଳୀରେ ପରିବର୍ତ୍ତନ ଆଣନ୍ତୁ। କୌଣସି ବିଷୟରେ ପଢ଼ିବା ସମୟରେ ତାକୁ ଲେଖିବାକୁ କୁହନ୍ତୁ। ଫଳରେ ଉକ୍ତ ବିଷୟଟି ତା’ର ଦୀର୍ଘ ଦିନଯାଏ ମନେ ରହିଯିବ।
ପିଲାମାନେ ଲଗାତର ପଢ଼ିଲେ ପୂର୍ବ ପାଠକୁ ଭୁଲିଯାଇଥାନ୍ତି। ଷ୍ଟଡି ଟେବଲ୍ରେ ଅଧିକ ସମୟ ବସିବା ପରିବର୍ତ୍ତେ ଏକ ସୁସ୍ଥ ପରିବେଶରେ ପଢ଼ିବାକୁ ମା’ମାନେ ପିଲାଙ୍କ ପାଇଁ ଏକ ଟାଇମ୍ ଟେବୁଲ ପ୍ରସ୍ତୁତ କରିବା ଦରକାର। ପଢ଼ା ମଝିରେ ବ୍ରେକ୍ ରହିବା ନିହାତି ଦରକାର। ଅବସର ସମୟରେ ପିଲାର ପସନ୍ଦ ଅନୁଯାୟୀ କାମ କରିବାକୁ ଦିଅନ୍ତୁ ।
ଫଳରେ ସେ ଖୁସିରେ ରହିବା ସହ ପାଠ ପ୍ରତି ଉଚିତ୍ ଧ୍ୟାନ ଦେଇପାରିବ। ଦିନସାରା କେବଳ ପାଠ ପଢ଼ିବାକୁ ପିଲାକୁ କୁହନ୍ତୁ ନାହିଁ ବରଂ କେତେବେଳେ ଗପ ଶୁଣାନ୍ତୁ, ଆଉ କେତେବେଳେ ଗୀତ ବା କାର୍ଟୁନ୍ ଆଦି ବିଭିନ୍ନ ଜିନିଷ ସହ ଜଡ଼ିତ କରାନ୍ତୁ। ପିଲା ଗୋଟିଏ ଜିନିଷରେ ବାନ୍ଧି ହୋଇ ରହିଲେ ବୋର୍ ହୋଇଯିବାର ଆଶଙ୍କା ରହିଛି। ତେଣୁ ତାକୁ ତା’ ନିଜ ପସନ୍ଦର ଜିନିଷ ସହ ସାମିଲ କରାନ୍ତୁ।
ପରୀକ୍ଷା ପାଖେଇ ଆସିଲାଣି। ହେଲେ ପିଲାର କିଛି ମନେରହୁନି। ତେବେ ତା’ ରିଭିଜନ୍ରେ ପରିବର୍ତ୍ତନ ଆଣନ୍ତୁ। କୌଣସି ବିଷୟରେ ମନେରଖିଲାବେଳେ ତାକୁ ଲେଖିବାକୁ କୁହନ୍ତୁ। ବହୁ ସମୟରେ ଦେଖିବାକୁ ମିଳେ, ପିଲାମାନେ ଶର୍ଟକଟ୍ ବାଟ ଆପଣେଇବାକୁ ଯାଇ ନୋଟ୍ ପ୍ରସ୍ତୁତ କରି ନଥା’ନ୍ତି। ତେଣୁ ବର୍ଷ ଆରମ୍ଭରୁ ପିଲାଙ୍କ ପଢ଼ା ଉପରେ ମା’ମାନେ ଅଧିକ ଧ୍ୟାନ ଦେବା ଦରକାର। ସେମାନେ କିପରି ଦାୟିତ୍ୱବାନ୍ ହୋଇଗଲେ ନିଜେ ସବୁକିଛି ଠିକ୍ ଭାବେ କରିପାରିବେ। ପରୀକ୍ଷା ସମୟ ଆସିଲେ ପିଲାଙ୍କୁ ଏକ ସୁସ୍ଥ ଓ ଶାନ୍ତ ପରିବେଶ ଭିତରେ ରଖିବା ଦରକାର। ଅଭିଭାବକମାନେ ଜାଣିବା ଦରକାର ଯେ, ଏହି ସମୟରେ ପିଲାର କ୍ଷତି ହେଲା ଭଳି କୌଣସି କାମ ନ କରିବା ଉଚିତ, ଯେଭଳିକି ଟିଭି ଦେଖିବା ବା ଗୀତ ଶୁଣିବା ଆଦିଠାରୁ ସେମାନେ ନିଜକୁ ଦୂରେଇ ରଖିବା ନିହାତି ଦରକାର। ଏପରି ନ କଲେ ପିଲା ପାଠ ଉପରେ ଧ୍ୟାନ ଦେଇପାରେ ନାହିଁ। ବହୁତ ପିଲା ଶୁଆ ଭଳି ଘୋଷି ଘୋଷି ମନେ ରଖିବାକୁ ଭଲପାଆନ୍ତି। ତାଙ୍କୁ ବୁଝାନ୍ତୁ ଯେ ଏପରି କରିବା ପରିବର୍ତ୍ତେ କୌଣସି ଜିନିଷକୁ ଭଲରେ ବୁଝିଗଲେ, ତାହା କମ୍ ସମୟରେ ଓ ଅଧିକ ଦିନଯାଏ ମନେରହିବ।
ଏପରି କରିବାରେ ଆପଣ ତାକୁ ସାହାଯ୍ୟ କରନ୍ତୁ। କ୍ୟାରିୟର ବିଶେଷଜ୍ଞଙ୍କ କହିବାନୁସାରେ, ପିଲାମାନେ ପଢ଼ିଲା ପରେ ଅଭିଭାବକମାନେ ତାଙ୍କୁ ସେହି ବିଷୟରେ ବିଭିନ୍ନ ପ୍ରଶ୍ନ ପଚାରିବା ଦ୍ୱାରା ସେମାନେ ଅଧିକ ମନେ ରଖିପାରିବେ। ଆଉ ଯଦି ପିଲାମାନେ ସେହି ବିଷୟକୁ ମନେ ରଖିପାରି ନଥା’ନ୍ତି, ତେବେ ତା’ ବିଷୟରେ ଆଲୋଚନା କରନ୍ତୁ। ବାରମ୍ବାର ଏପରି କରିବା ଦ୍ୱାରା ତା’ର ମନେ ରହିଯିବ।
ପିଲାର ସ୍ମରଣ ଶକ୍ତି ବଢ଼ାଇବାକୁ ହେଲେ ତାକୁ ଏକ ଚିନ୍ତାଶୂନ୍ୟ ଓ ଶାନ୍ତ ପରିବେଶ ଦେବାକୁ ଚେଷ୍ଟା କରନ୍ତୁ। ଏପରି ଏକ ସକାରାତ୍ମକ ପରିବେଶ ପାଇଲେ ସବୁବେଳେ ଖୁସି ରହିବା ସହ ପାଠ ପ୍ରତି ଅଧିକ ଧ୍ୟାନ ଦେବାରେ ସକ୍ଷମ ହୋଇପାରିବ। ପରୀକ୍ଷା ପାଖେଇ ଆସିଲେ ବି ତାକୁ ଲଗାତର ପଢ଼ିବାକୁ ବାଧ୍ୟ କରନ୍ତୁ ନାହିଁ। ମଝିରେ ମଝିରେ ତାକୁ ତା’ ପସନ୍ଦର ଜିନିଷ କରିବାକୁ ଦିଅନ୍ତୁ, ଯେପରିକି ପାଠ ତା’ ପାଇଁ ବୋଝ ନ ହୋଇଯିବ।
ଏକ୍ସରସାଇଜ୍ କେବଳ ଶରୀରକୁ ସୁସ୍ଥତା ପ୍ରଦାନ କରି ନଥାଏ। ତା’ ସହିତ ମସ୍ତିଷ୍କକୁ ବି ସତେଜ ଓ ସନ୍ତୁଳିତ ରଖିଥାଏ। ୨୪ ଘଣ୍ଟା କେବଳ ପାଠ ପ୍ରତି ଧ୍ୟାନ ଦେବା ପରିବର୍ତ୍ତେ ପାଠ ସହିତ ପ୍ରତିଦିନ ସକାଳେ ମାଆମାନେ ନିଜେ ବ୍ୟାୟାମ ବା ଏକ୍ସରସାଇଜ୍ କରିବା ବେଳେ ପିଲାଙ୍କୁ ଏଥିରେ ସାମିଲ କରିବା ଦରକାର। ନଚେତ୍ ସକାଳୁ ପିଲାଙ୍କୁ ଘରଠାରୁ ବାହାରକୁ ନେଇ ଖୋଲା ପରିବେଶରେ ବୁଲାଇ ଆଣିବା ସହ ଯୋଗ ବା ବ୍ୟାୟାମ ଶିଖାଇବା ଉଚିତ୍।
ମାନସିକ ରୋଗ ବିଶେଷଜ୍ଞ, ଦି ବ୍ରେନ୍, ପୁରୀଘାଟ ରୋଡ଼, କଟକ,
ମୋ: ୯୧୩୨୪୩୩୩୩୩