ଯାଜପୁର,୧୫/୧୧: ଶିଶୁ ହସିଲେ ଦୁନିଆ ହସେ , ଏକଥା ତ ଆପଣମାନେ ନିଶ୍ଚୟ ଶୁଣିଥିବେ ହେଲେ ଶିଶୁଙ୍କ ମୁହଁରେ ହସ ଫୁଟାଇବା କାମ ଆମର । ତେବେ ଏକଥାକୁ ବିଭିନ୍ନ ସମୟରେ ବାସ୍ତବତାର ରୂପ ଦେଇ ଶିଶୁ ଦିବସରେ ବିଭିନ୍ନ କାର୍ଯ୍ୟକ୍ରମ ଅନୁଷ୍ଠିତ ହୋଇଥାଏ । ଯାଜପୁରରେ ଥିବା ଟାଟା ଷ୍ଟିଲ ତଥା ନିଳାଚଳ ଇସ୍ପାତର ଭେଣ୍ଡର ପାର୍ଟନର ୟୁନାଇଟେଡ ଇନ୍ଫ୍ରାକୋର୍ ଲିମିଟେଡ ବିଭାଗ ତରଫରୁ ନିଆରା ଢଙ୍ଗରେ ଶିଶୁ ଦିବସ ପାଳନ କରାଯାଇଛି। ବିଭାଗର ବହୁଜଣ ଏକାଠି ହୋଇ ଯାଜପୁରରେ ଥିବା ଅନ୍ନପୂର୍ଣ୍ଣା ଶିଶୁ ଗୃହ କନ୍ୟା ଆଶ୍ରମରେ ପହଞ୍ଚି ସେମାନଙ୍କୁ ସାହାଯ୍ୟର ହାତ ବଢ଼ାଇଛନ୍ତି । ଶିଶୁକନ୍ୟାଙ୍କୁ ବିଭିନ୍ନ ପାଠ୍ୟ ଉପକରଣ, ଅନ୍ୟାନ୍ୟ ଉପହାର ଦେବା ସହ କେକ୍ କାଟି ଶିଶୁ ଦିବସ ପାଳନ କରିଛନ୍ତି। ଏହା ସହ କନ୍ୟା ଆଶ୍ରମର ଜରୁରୀକାଳୀନ ସୁବିଧା ପାଇଁ ୫୧,୦୦୦ ଟଙ୍କାର ଚେକ୍ ପ୍ରଦାନ କରିଛନ୍ତି । ଏହା ବ୍ୟତୀତ ସେମାନଙ୍କୁ ଉତ୍ସାହିତ କରିବାକୁ ବିଭିନ୍ନ ପ୍ରତିଯୋଗିତା ଆୟୋଜନ କରାଯାଇ କୃତିମାନଙ୍କୁ ପୁରସ୍କାର ପ୍ରଦାନ କରାଯାଇଛି । ଏବଂ ସେମାନଙ୍କର ସ୍ବାସ୍ଥ୍ୟ ଅବସ୍ଥା, ଶିକ୍ଷା ସମ୍ବନ୍ଧୀୟ ତଥ୍ୟ ପଚାରି ବୁଝିବା ସହ ସେମାନଙ୍କୁ ବିଭିନ୍ନ ବିଷୟରେ ସଚେତନ କରିଥିଲେ । ତେବେ ଏହି କାର୍ଯ୍ୟକ୍ରମରେ ୟୁଆଇଏଲ୍ ବିଭାଗର ବିବେକ ଜେନ୍, ଦୀପ୍ତିରଞ୍ଜନ ସାମଲ, ହର୍ଷ ସିଂ,ଚକ୍ରଧର ବାରିକ୍, ରବିନ୍ଦ୍ର ବେହେରା, କୋରବାନ୍ ଖାନ୍ ଏବଂ ପ୍ରତାପ କେଶରୀ ମହାପାତ୍ର ଆଦି ଉପସ୍ଥିତ ରହିଥିଲେ ।