ଦେଓଗାଁ, ୭ା୪(ଡି.ଏନ.ଏ.): ବଲାଙ୍ଗୀର ଜିଲା ଦେଓଗାଁ ବ୍ଲକ ଅନ୍ତର୍ଗତ ଉପରଝର ଅଙ୍ଗନୱାଡି ‘କ’ କେନ୍ଦ୍ର ନାନା ଅବ୍ୟବସ୍ଥାରେ ଚାଲିଛି। କେନ୍ଦ୍ରର ନିଜସ୍ବ କୋଠାନାହିଁ। ଫଳରେ ପିଲାଙ୍କ ପ୍ରିକ୍ଲାସ ଅଙ୍ଗନଓ୍ବାଡି କର୍ମୀଙ୍କ ବାରଣ୍ଡାରେ ଚାଲିଛି। ପ୍ରଶାସନିକ ଅବହେଳା ଯୋଗୁଁ ଆଜକୁ ୫ବର୍ଷ ହେଲା କୋଠା ନିମର୍ର୍ାଣ ସମ୍ପୂର୍ଣ୍ଣ ହୋଇପାରୁନାହିଁ। କାମ ତଦାରଖ କରୁଥିବା ଠିକାଦାରଙ୍କ କହିବାନୁସାରେ ଏମ୍ଜିଏନ୍ଆରଇଜିଏସ୍ ଟଙ୍କା ପଡି ନ ଥିବାରୁ କୋଠା ସମ୍ପୂର୍ଣ୍ଣ କରିହେଉନାହିଁ। ଉକ୍ତ ଅଙ୍ଗନଓ୍ବାଡି କେନ୍ଦ୍ରର ସମସ୍ୟା ନେଇ ୨୦୨୨ ମେ ୨୭ ତାରିଖରେ ଧରିତ୍ରୀରେ ଖବର ପ୍ରକାଶ ପରେ ପ୍ରଶାସନିକ ତପତ୍ରତା ପ୍ରକାଶ ପାଇଥିଲା। ବିଭାଗୀୟ ପଦକ୍ଷେପ ସ୍ବରୁପ କୋଠାକାମ କିଛି ମାତ୍ରାରେ ଆରମ୍ଭ ହୋଇଥିଲା। ହେଲେ ପୁନଶ୍ଚ ବିଲ ହୋଇ ନ ଥିବା ଦର୍ଶାଇ ସମ୍ପୃକ୍ତ ଠିକାଦାର କୋଠା ନିର୍ମାଣ ବନ୍ଦ କରିଦେଇଥିଲେ।
୧୯୯୩ ମସିହାରେ ଉପରଝର ଅଙ୍ଗନୱାଡି ‘କ’ କେନ୍ଦ୍ର ଗୃହ ନିର୍ମାଣ ହୋଇଥିଲା। ଜରାଜୀର୍ଣ୍ଣ ହୋଇପଡିଥିବା(କ) କେନ୍ଦ୍ର କୋଠାକୁ ୨୦୧୪ ମସିହାରେ ବ୍ଲକ ପ୍ରଶାସନ ବିପଦସଙ୍କୁଳ ଘୋଷଣା କରି କୋଠାରେ ତାଲା ପକାଇଦେଇଥିଲା। ଫଳରେ ଏକବର୍ଷ ଧରି ନିକଟସ୍ଥ ପ୍ରାଥମିକ ବିଦ୍ୟାଳୟ କୋଠାରେ ପ୍ରିକ୍ଲାସ ଚାଲିଲା। ପରେ ସେଠାରୁ ଉକ୍ତ ଗାଁର ହେମାଲ ପଧାନଙ୍କ ଘରେ ୫ଶହ ଟଙ୍କା ଭଡାସୂତ୍ରରେ ୨୦୧୮ ମସିହାରୁ ୨୦୨୧ ପର୍ଯ୍ୟନ୍ତ ୪ବର୍ଷ ଧରି ଚାଲିଥିଲା। ହେଲେ ବିଭାଗ କୋଠା ନିର୍ମାଣ ଦିଗରେ ଧ୍ୟ୍ୟାନ ନଦେବା ସହ ସମ୍ପୃକ୍ତ କର୍ମୀଙ୍କୁ ଘରଭଡା ଟଙ୍କା ମଧ୍ୟ ମଞ୍ଜୁର ନ କରିବାରୁ ବାଧ୍ୟ ହୋଇ ତାଙ୍କ ନିଜ ଘରେ ଶିଶୁମାନଙ୍କୁ ପ୍ରିକ୍ଲାସ ଓ ରନ୍ଧାଖାଦ୍ୟ ଦେଉଥିବା କର୍ମୀ ସୁନୟନା ବିଶ୍ୱାଳ କହିଛନ୍ତି। ଏଭଳି ଅବ୍ୟବସ୍ଥାରେ ଦୀର୍ଘବର୍ଷ ହେଲା ଚାଲିଥିବାରୁ ଅଭିଭାବକ ମହଲରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। ବର୍ତ୍ତମାନ ଏହି କେନ୍ଦ୍ରରେ ୨୫ଜଣ ଶିଶୁ ରହିଛନ୍ତି। ଏ ଦିଗରେ ଜଲାପାଳ ଦୃଷ୍ଟି ଦେବାକୁ ଅଭିଭାବକମାନେ ଦାବି କରିଛନ୍ତି।